Messi ទិញក្លិបមួយនៅ អេស្ប៉ាញ ជាអតីតក្លិបយុវជនរបស់ Alba, David Raya, Gerard Martin

ខ្សែប្រយុទ្ធម្ចាស់ពាន Ballon d’Or ៨ សម័យ កីឡាករ Lionel Messi ត្រូវបានប្រកាសជាផ្លូវការ អំពីការទិញយកក្លិប UE Cornellà នៃលីគ អេស្ប៉ាញ លំដាប់ទី ៥ មកគ្រប់គ្រងទាំងស្រុង ១០០%។

ក្លិប UE Cornellà ត្រូវបានបង្កើតឡើងនៅឆ្នាំ ១៩៥១ ដោយប្រវត្តិសាស្ត្ររបស់ក្លិបនេះ បានឡើងខ្ពស់បំផុត ស្ថិតនៅលីគលំដាប់ទី ៣ របស់ អេស្ប៉ាញ។ ក្លិបមានមូលដ្ឋាននៅតំបន់ កាតាឡាន់ មួយនេះ ត្រូវបានគេដឹង ថា មានប្រព័ន្ធបណ្តុះបណ្តាលយុវជនល្អ និងមានគុណភាពខ្ពស់។ ជាក់ស្តែង ពួកគេបានផលិតកីឡាករលំដាប់កំពូលៗជាច្រើន ដូចជា David Raya, Jordi Alba, Gerard Martin, Javi Puado, Keita Baldé, Aitor Ruibal និង Ilie Sánchez ជាដើម។

ការវិនិយោគរបស់ Messi ពេលនេះ គឺស្របទៅនឹងផែនការរបស់គាត់ ដែលចង់អភិវឌ្ឍលើថ្នាលយុវជន ដូចគម្រោងរបស់គាត់កន្លងមក ដែលគ្រោងបង្កើតពានយុវជន Messi Cup។ ការមកដល់របស់ខ្សែប្រយុទ្ធ Inter Miami វ័យ ៣៨ ឆ្នាំ បានបើកទំព័រថ្មីមួយសម្រាប់ក្លិប UE Cornellà ដែលមានគោលបំណងអភិវឌ្ឍទាំងផ្នែកកីឡា និងរចនាសម្ព័ន្ធក្លិប ជាមួយនឹងយុទ្ធសាស្ត្រយូរអង្វែង ដែលផ្អែកលើមហិច្ឆតា ស្ថិរភាព និងការតភ្ជាប់ជាមួយសហគមន៍មូលដ្ឋាន។

គួរឱ្យដឹង ថា ក្លិប UE Cornell គឺជាក្លិបទី ២ ដែល Messi បានទិញយកមកគ្រប់គ្រង បន្ទាប់ពីក្លិបដំបូង ដែលគាត់បានចូលហ៊ុនគ្នាទិញយកក្លិប Deportivo LSM នៃលីគទី ៤ អ៊ុយរូហ្គាយ ជាមួយនឹងមិត្តរួមក្រុម Luis Suarez៕

ប្រែសម្រួល៖ សេម កុសល
ប្រភព៖ គេហទំព័រក្លិប UE Cornellà