កីឡា

សម្ដេច ទៀ បាញ់ មានប្រសាសន៍ពីការត្រៀមពិធីរាប់ថយក្រោយ ១០០ថ្ងៃឆ្ពោះទៅស៊ីហ្គេម២០២៣

បានផុស

២ years មុន

នៅ

ថ្ងៃសុក្រ ២០ មករា ២០២៣

ដោយ

គិតត្រឹមថ្ងៃទី២៥ ខែមករា ខាងមុខនេះ កម្ពុជានៅសល់តែ១០០ថ្ងៃទៀតប៉ុណ្ណោះនឹងមកដល់ព្រឹត្តិការណ៍កីឡាស៊ីហ្គេម លើកទី៣២ និង អាស៊ានប៉ារ៉ាហ្គេម លើកទី១២ ឆ្នាំ២០២៣ ជាប្រវត្តិសាស្ត្រដំបូងនៅកម្ពុជា។

ការត្រៀមខ្លួនរបស់កម្ពុជាបានចំណាយពេលជាច្រើនឆ្នាំមកទទួលបន្ទុកដោយគណៈកម្មាធិការជាតិរៀបចំការប្រកួតកីឡាស៊ីហ្គេម (CAMSOC) ដែលមានសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន ហើយឈានដល់ឆ្នាំ២០២៣គឺជាពេលវេលាប្រតិបត្តិហ្គេម។

ក្នុងកិច្ចប្រជុំបូកសរុបការងារ ឆ្នាំ២០២២ និងលើកទិសដៅ ឆ្នាំ២០២៣ សម្ដេចពិជ័យសេនា ទៀ បាញ់ បានចាត់ទុកជាដំណាក់កាលចុងក្រោយ ដែលតម្រូវឲ្យគណៈកម្មការ អនុគណៈកម្មការទាំង ១៤ និងភាគីពាក់ព័ន្ធទាំងអស់ ត្រូវពង្រឹងការងារបន្ថែមទៀត ដើម្បីឆ្ពោះទៅរកភាពជោគជ័យដ៏ត្រចះត្រចង់ក្នុងព្រឹត្តិការណ៍ជាប្រវត្តិសាស្ដ្រនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចពិជ័យសេនាលើកឡើងថា ៖«ក្នុងនាមជាប្រធានគណៈកម្មាធិការរៀបចំការប្រកួតកីឡាស៊ីហ្គេម ឆ្នាំ២០២៣ ច្បាស់ណាស់ សម្រាប់ពេលវេលាកាន់ខិតជិតមកដល់។ ពិសេសយើងកំពុងត្រៀមរៀបចំពិធីរាប់ថយក្រោយ ១០០ថ្ងៃ (ថ្ងៃទី២៥ ខែមករា ឆ្នាំ២០២៣)។ កិច្ចការងារនេះ សូមយើងទាំងអស់គ្នា ចូលរួមធ្វើយ៉ាងណាឲ្យឃើញថា ការប្រុងប្រៀបរៀបចំរបស់យើង មួយៗថ្ងៃកាន់តែកៀកហើយ។ គ្រប់ទិសទី គ្រប់កន្លែងទាំងអស់ ត្រូវតែចូលប្រុងប្រៀបខ្លួន ដើម្បីធ្វើម្ចាស់ផ្ទះឲ្យទទួលបានជោគជ័យដ៏ធំធេង»។

«យើងឃើញថា ការប្រុងប្រៀបរបស់យើង គឺរួចរាល់ជាស្ថាពរហើយ ឈានដល់ដំណាក់ចុងក្រោយ គឺក្នុងដំណាក់កាលនៅសល់ ១០០ថ្ងៃនេះ គឺជារយៈពេល ដែលយើងត្រូវពង្រឹង និងរៀបចំឲ្យកាន់តែល្អថែមទៀត ដើម្បីធានាថា កិច្ចការទាំងអស់របស់យើង គឺបានរួចស្រេចបាច់។ ពិសេសការងារដែលយើងយកចិត្តទុកដាក់ខ្លាំងបំផុត គឺគ្រប់ផ្នែកទាំងអស់ ទាំងគណៈកម្មការ អនុគណៈកម្មការទាំង១៤ យើងបានបំពេញការងារពេញលេញអស់ហើយ។ បានន័យថា ការនៅសល់ ១០០ថ្ងៃ គឺជាពេលវេលា ដែលយើងត្រូវរៀបរយ និងបំពេញបន្ថែមឲ្យកាន់តែសព្វគ្រប់ និងពេញលេញ ដើម្បីត្រៀមទទួលបដិសណ្ឋារកិច្ចបណ្ដាគណៈប្រតិភូកីឡាទាំងអស់ ដែលចូលរួមប្រកួតនៅប្រទេសរបស់យើង»។

សម្ដេចពិជ័យសេនា ទៀ បាញ់ បានសម្ដែងការគោរពនូវអនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជា ដែលសម្ដេចតេជោនាយករដ្ឋមន្ដ្រី បានជំរុញឲ្យបំផ្ទុះការផ្សព្វផ្សាយពីការរាប់ថយក្រោយ ១០០ថ្ងៃ ឆ្ពោះទៅព្រឹត្តិការណ៍ជាប្រវត្តិសាស្ដ្រ ដែលកម្ពុជារង់ចាំអស់ ៦៤ឆ្នាំ៕

Related Topics:កីឡាស៊ីហ្គេម ឆ្នាំ២០២៣