កីឡា

គួរជាទីមោទនៈ កម្ពុជាដាក់កីឡាអត្តសញ្ញាណជាតិចំនួន៣ក្នុងស៊ីហ្គេម២០២៣

បានផុស

២ years មុន

នៅ

ថ្ងៃពុធ ២៥ មករា ២០២៣

ដោយ

ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាទទួលរៀបចំធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រត្រូវបានសម្រេចដាក់កីឡាចំនួន៣៨ប្រភេទ ស្មើនឹង ៦០៨វិញ្ញាសា និង១ប្រភេទកីឡាទៀតជាការប្រកួតសម្តែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមកីឡាប្រកួតប្រជែងដណ្តើមមេដាយជាផ្លូវការចំនួន៣៨ប្រភេទ គឺមានកីឡាអត្តសញ្ញាណជាតិរបស់កម្ពុជាចំនួន៣ រួមមាន កីឡាគុនល្បុក្កតោ កីឡាគុនខ្មែរ និងកីឡាអុកចត្រង្គ។ កីឡាអត្តសញ្ញាណជាតិទាំង៣ប្រភេទនេះគឺជាមរតកដូនតារបស់ខ្មែរសុទ្ធសាធតាំងពីរាប់ពាន់ឆ្នាំមកហើយ។

លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ (CAMSOC) បានឲ្យដឹងថា ៖«កម្ពុជាធ្វើជាម្ចាស់ផ្ទះស៊ីហ្គេម យើងមានប្រភេទកីឡាជាអត្តសញ្ញាណជាតិរបស់យើងគឺគុនខ្មែរ ល្បុក្កតោ និងអុកចត្រង្គ។ ការងារនេះត្រូវបានក្រុមប្រឹក្សា (អាស៊ីអាគ្នេយ៍) ឯកភាពគ្នា និងយល់ព្រមរួចរាល់ ក្នុងការផ្តល់ឲ្យបុព្វសិទ្ធិដល់ម្ចាស់ផ្ទះកម្ពុជាក្នុងការរៀបចំ»។

កីឡារ ពេជ្រ សម្បត្តិ ថ្វាយបង្គំគ្រូ មុនការប្រកួតគុនខ្មែរ

ប្រការនេះពិតជាគួរទីមោទនភាពសម្រាប់កម្ពុជាក្នុងនាមជាម្ចាស់ផ្ទះលើកដំបូងបានប្រឹងប្រែង និងតស៊ូដាក់បញ្ចូលប្រភេទកីឡាអត្តសញ្ញាណជាតិរបស់ខ្លួនក្នុងព្រឹត្តិការណ៍កីឡាធំប្រចាំតំបន់អាស៊ាន។ ប្រទេសអាស៊ានមួយចំនួនដែលធ្លាប់ធ្វើម្ចាស់ផ្ទះកីឡាស៊ីហ្គេមកន្លងមកក៏បានដាក់ប្រភេទកីឡាអត្តសញ្ញាណជាតិរបស់ខ្លួនឲ្យប្រកួតជាផ្លូវការដែរ។

សម្រាប់ប្រភេទកីឡាគុនខ្មែរមានប្រទេសមួយចំនួនបានយល់ព្រមបញ្ជូនអត្តពលិករបស់ខ្លួនចូលរួមប្រកួតគុនខ្មែរគឺ វៀតណាម ឡាវ មីយ៉ាន់ម៉ា ម៉ាឡេស៊ី ហ្វីលីពីន និងឥណ្ឌូនេស៊ី បូករួមទាំងម្ចាស់ផ្ទះកម្ពុជាគឺមាន៦ប្រទេសដែលមានអត្តពលិកចូលរួមប្រកួតគុនខ្មែរនៅស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា៕