កីឡា

ត្រៀមការពារមេដាយមាស អ្នកគាំទ្រវៀតណាមជាង២ម៉ឺននាក់គ្រោងមកស៊ីហ្គេមនៅកម្ពុជា

បានផុស

២ years មុន

នៅ

ថ្ងៃអង្គារ ១៤ មីនា ២០២៣

ដោយ

អ្នកគាំទ្រកីឡាបាល់ទាត់វៀតណាមប្រហែលជាង២ម៉ឺននាក់គ្រោងធ្វើដំណើរមកប្រទេសកម្ពុជាដើម្បីគាំទ្រ និងលើកទឹកចិត្តដល់ក្រុមបាល់ទាត់ជម្រើសជាតិវៀតណាមអាយុក្រោម២២ឆ្នាំ (U22) ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

ដំណឹងនេះត្រូវបាននាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា ប្រាប់ Cambodia2023 ឲ្យដឹង បន្ទាប់ពីលោកទទួលបានព័ត៌មានផ្ទាល់ពីភាគីវៀតណាម កាលពីចុងសប្ដាហ៍កន្លងទៅ ហើយចំនួននឹងកើនឡើងជាង២ម៉ឺននាក់ ដោយសារការប្រកួតកីឡាស៊ីហ្គេម នៅសល់ប្រហែលជា៥០ថ្ងៃទៀតទើបមកដល់។

ប្រធានសហព័ន្ធកីឡាបាល់ទាត់កម្ពុជាបន្ថែមថា ក្រៅពីអ្នកគាំទ្រវៀតណាម ក៏នឹងមានអ្នកគាំទ្រជាច្រើនទៀតពីប្រទេសដែលមានព្រំប្រទល់ជាប់កម្ពុជា និងប្រទេសអាស៊ានជាច្រើនទៀត ដូច្នេះលោករំពឹងមានអ្នកគាំទ្រមកពីប្រទេសផ្សេងៗរាប់សែននាក់។

សូមបញ្ជាក់ថា ក្រុមបាល់ទាត់ U23 វៀតណាម និងក្រុមកីឡាការិនីបាល់ទាត់ជម្រើសជាតិវៀតណាមជាម្ចាស់មេដាយមាសស៊ីហ្គេម លើកទី៣១ ទាំងពីរវិញ្ញាសានៅពេលវៀតណាមធ្វើជាម្ចាស់ផ្ទះកាលពីឆ្នាំ២០២២កន្លងទៅ។

កាលពីថ្ងៃអាទិត្យ ទី២៦ ខែកុម្ភៈ កន្លងទៅ សហព័ន្ធកីឡាបាល់ទាត់វៀតណាម បានតែងតាំងលោក Philippe Troussier ជនជាតិបារាំងជាគ្រូបង្គោលថ្មីទាំងជម្រើសជាតិវៀតណាមឈុតធំ និងយុវជនអាយុក្រោម២២ឆ្នាំ។ បន្ទាប់មកលោកគ្រូបង្វឹកថ្មីបានដឹកនាំ U22 និងឈុតធំទៅហ្វឹកហាត់នៅប្រទេសកាតាដោយបានដាក់គោលដៅការពារមេដាយមាសស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕

អត្ថបទ៖ វីរបុត្រ