Messi គ្រោងដើរចេញពី PSG រដូវក្តៅនេះ ខណៈគ្រួសាររបស់ខ្លួនចង់ទៅ Barcelona វិញ

Lionel Messi ត្រៀមផ្លាស់ប្តូរចិត្ត ក្នុង​ការ​ចាកចេញពីក្លឹប​អ្នក​មាន​ Paris Saint-Germain នៅរដូវក្តៅនេះ។ ស្របពេល​កុងត្រារបស់ខ្លួន​នឹងអស់​នា​ចុងបញ្ចប់​រដូវកាលនេះ ដោយក្លឹបយក្សរបស់បារាំងអាចផ្តល់ឱ្យរូបគេមួយឆ្នាំទៀត។

ពេល​ការប្រកួត World Cup នៅប្រទេសកាតា រដូវរងាឆ្នាំ​ ២០២២ គ្រា​ដែល Messi បាន​ជួយ​អាហ្សង់ទីនឈ្នះ​ជើងឯក​ពិភព​លោក ឪពុករបស់ខ្លួន លោក Jorge បានបង្ហាញទៅកាន់ប្រធានក្លឹប PSG លោក Nasser Al-Khelaifi ថា Lionel បានយល់ព្រមស្នាក់នៅ។ 

ទោះ​បី​ជា​យ៉ាង​ណា ឥឡូវនេះ យោងតាមសារព័ត៌មានបារាំង L’Equipe បានឲ្យដឹង​ថា Messi  និងក្លឹប​យក្ស​បារាំង ជិតឈានដល់ការចែកផ្លូវគ្នាហើយ។ កីឡាករជើងចាស់រូបនេះនឹងដើរចេញនៅពេល​លីគ​ចប់ បន្ទាប់ពីការចរចា​ក្នុងប៉ុន្មានសប្តាហ៍ថ្មីៗនេះឃើញថា ភាគីទាំងពីរ​ខ្វែង​គំនិត​គ្នា។

គ្រួសាររបស់កីឡាកររូបនេះចង់​វិល​ត្រឡប់​ទៅ ទីក្រុង Barcelona វិញ​ជាកន្លែងដែលគេបានចំណាយពេលស្ទើរ​ពេញមួយអាជីព មុនពេលផ្លាស់ទៅ​ទីក្រុង Paris ក្នុងឆ្នាំ២០២១។

PSG ចង់ឱ្យ Messi កាត់បន្ថយប្រាក់ខែ ២៥% លើកិច្ចសន្យាដែល​ទទួល​បាន​កម្រៃបាន ២៥.៦លានផោនក្នុងមួយឆ្នាំ ដោយសារ​បញ្ហារបស់ពួកគេមិនគោរពតាមគោលការណ៍ហិរញ្ញវត្ថុ (Financial Fair Play)។

Messi ក៏ត្រូវបានគេរាយការណ៍ថា ចង់បានការធានាលើអ្នកចាត់ការទូទៅ និងកីឡាករដែលក្លឹបដាក់គោលដៅនៅរដូវក្ដៅនេះ ខណៈ PSG នៅមិនទាន់អាចដោះស្រាយកង្វល់​របស់ Messi បាន​ទេ។

ភាពមិនច្បាស់លាស់អំពីអនាគតរបស់គេ បាននាំឱ្យអ្នកគាំទ្រក្លឹបសម្តែងការខកចិត្ត ដោយពេលប្រកួតក្នុង​កីឡដ្ឋាន​ Parc des Princes អ្នកគាំទ្របានស្រែកចំអកដាក់ Messi បន្ទាប់ពី​បរាជ័យក្នុងដី ជាមួយនឹងក្រុម Lyon។

អតីតក្លឹប Barcelona របស់ Messi ត្រូវបានគេនិយាយថា កំពុង ‘ចាប់ផ្តើមការវាយលុក’ ដើម្បីបញ្ចុះបញ្ចូលតារារូបនេះឱ្យត្រឡប់​​ទៅ Nou Camp វិញក្នុងនាមជាកីឡាករគ្មានតម្លៃខ្លួន៕

អត្ថបទ៖ មន្នីរ័ត្ន
ប្រភព៖ dailymail.co.uk