Ronaldo ទទួលបាន Guinness World Record ជាអត្តពលិកមានប្រាក់ចំណូលខ្ពស់បំផុត

Cristiano Ronaldo បានជាប់កំណត់ត្រាពិភពលោក Guinness World Records ក្នុងការទទួលបានប្រាក់ចំណូលខ្ពស់បំផុតសម្រាប់អត្តពលិកនៅឆ្នាំ២០២៣នេះ។

កីឡាករវ័យ ៣៨ ឆ្នាំត្រូវបានប៉ាន់ប្រមាណថារកបាន ១០៧.៥ លានផោនក្នុងរយៈពេល ១២ ខែរហូតដល់ថ្ងៃទី០១ ខែឧសភា ឆ្នាំ២០២៣។

Ronaldo បំបែកកំណត់ត្រារបស់ Lionel Messi ដែលជាអត្តពលិកដែលមានប្រាក់ចំណូលខ្ពស់បំផុតនៅឆ្នាំ​២០២២ ជាមួយនឹងការប៉ាន់ប្រមាណ ១០៣ លានផោននៅពេលលេងឱ្យ Paris Saint-Germain ។

ប្រាក់ចំណូលបំបែកឯតទគ្គកម្មរបស់តារាឆ្នើម Al Nassr រួមមាន ៣៥ លានផោនក្នុងការរកប្រាក់ចំណូលនៅលើទីលាន និង ៦៨.៥លានផោន នៅក្នុងកិច្ចសន្យាព្រមព្រៀងក្រៅពីទីលាន។

ប្រាក់ចំណូលនៅលើទីលានរួមមានប្រាក់ខែ ប្រាក់រង្វាន់ និងប្រាក់បន្ថែមលើកទឹកចិត្ត ខណៈដែលប្រាក់ចំណូលក្រៅទីលាន គឺជាការប៉ាន់ប្រមាណនៃកិច្ចព្រមព្រៀងឧបត្ថម្ភ ថ្លៃបង្ហាញខ្លួន វត្ថុអនុស្សាវរីយ៍ និងប្រាក់ចំណូលអាជ្ញាប័ណ្ណ។

Ronaldo មានប្រាក់ចំណូលក្រៅទីលានដ៏ច្រើនសន្ធឹកសន្ធាប់ដែលរួមមានកុងត្រាជាមួយ Nike និងតាមរយៈទំនិញម៉ាក CR7 ផ្ទាល់ខ្លួន៕

ប្រែសម្រួល៖ មន្នីរ័ត្ន
ប្រភព៖ sportbible.com