មន្ត្រី​របស់​FIFAជាប់ឆ្នោតជាប្រធានបាល់ទាត់ម៉ាលី ទោះកំពុងនៅក្នុងពន្ធនាគារ

សមាជិកក្រុមប្រឹក្សានៃ​សហព័ន្ធ​កីឡា​បាល់ទាត់​អន្តរជាតិ (FIFA) លោក Mamoutou Touré ត្រូវបានបោះឆ្នោតជ្រើសរើសឡើងវិញដោយមិនមានការជំទាស់​ដើម្បីក្លាយ​ជាប្រធានសហព័ន្ធបាល់ទាត់​ប្រទេស​ម៉ាលី (Femafoot) ទោះបីជាត្រូវបានឃុំខ្លួនដោយចោទប្រកាន់ពីបទកេងបន្លំមូលនិធិសាធារណៈក៏ដោយ បន្ទាប់ពីបេក្ខជន ៣នាក់ផ្សេងទៀតត្រូវបាន​ចាត់ទុកថាមិនមានសិទ្ធិឈរឈ្មោះ។

លោក Touré ស្ថិត​នៅ​ក្នុង​​ការ​ឃុំ​ខ្លួន​​កំពុង​​រង់ចាំការកាត់ទោស បន្ទាប់ពីត្រូវបានចោទប្រកាន់ពីបទរំលោភលើទ្រព្យសម្បត្តិរដ្ឋសាធារណៈ និងការក្លែងបន្លំរវាងឆ្នាំ២០១៣ និង២០១៩ ក្នុងអំឡុងពេលលោកជានាយកផ្នែកហិរញ្ញវត្ថុ និងរដ្ឋបាល នៅក្នុងរដ្ឋសភាម៉ាលី។

លោក និងមនុស្ស ៤នាក់ផ្សេងទៀតត្រូវបាន​ចោទប្រកាន់ថាបានកេងបន្លំប្រាក់ចំនួន ២៨លានដុល្លារនៅក្នុងមូលនិធិរដ្ឋ។ ទោះបីករណីនេះកំពុងបន្តក៏ដោយ លោក Touré គឺជាបេក្ខជនតែម្នាក់គត់ក្នុងចំណោមបេក្ខជនទាំង ៤ដែលបានជាប់ឆ្នោត។

លោក Touré ​ធ្លាប់​កាន់​តួ​នាទី​ជា​ប្រធានសហព័ន្ធបាល់ទាត់ម៉ាលី​ក្នុងឆ្នាំ២០១៩ ហើយអាណត្តិថ្មីរបស់លោកមានរយៈពេល ៤ឆ្នាំរហូតដល់ឆ្នាំ២០២៧។

រដ្ឋមន្ត្រីកីឡារបស់ប្រទេសម៉ាលី លោក Abdoul Kassim Ibrahim Fomba បានសរសេរទៅកាន់អគ្គលេខាធិការ FIFA លោក Fatma Samoura នៃប្រទេសសេណេហ្គាល់ ដែលចាកចេញកាលពីដើមខែនេះ ដោយសម្តែងការព្រួយបារម្ភចំពោះដំណើរការបោះឆ្នោត។

អ្នកសង្កេតការណ៍មកពីសហព័ន្ធបាល់ទាត់អាហ្វ្រិក (CAF) និង FIFA បានចូលរួមមហាសន្និបាតវិសាមញ្ញដើម្បីត្រួតពិនិត្យការបោះឆ្នោត។ លោក Touré ក៏ជាសមាជិកនៃគណៈកម្មាធិការប្រតិបត្តិ CAF និងក្រុមប្រឹក្សា FIFA ផងដែរ៕

ប្រែសម្រួល៖ មន្នីរ័ត្ន
ប្រភព៖ mirror.co.uk