កីឡាករលើកទម្ងន់អ៊ីរ៉ង់ម្នាក់ជាប់បំរាមមួយជីវិត ក្រោយ​ចាប់ដៃកីឡាករអ៊ីស្រាអែល

សហព័ន្ធកីឡាលើកទម្ងន់អ៉ីរ៉ង់​បាន​ដាក់​បំរាម​លើ​កីឡាករ Mostafa Rajaei អស់មួយជីវិត បន្ទាប់ពីរូប​គេបានចាប់ដៃជាមួយ​កីឡាករ​ជនជាតិអ៉ីស្រាអែល​ក្នុងព្រឹត្តិការណ៍​ប្រកួត​ទម្ងន់​ជើងឯកពិភពលោក (Masters Championships) នៅទីក្រុង Krakόw ប្រទេសប៉ូឡូញ។

កីឡាករ Rajaei បានបញ្ចប់ក្នុងចំណាត់ថ្នាក់លេខ២ ហើយឈរនៅលើវេទិកាបំពាក់មេដាយដោយមានទង់ជាតិអ៉ីរ៉ង់រុំជុំវិញខ្លួន ប៉ុន្តែរូប​គេ​បានស្វាគមន៍កីឡាករ Maksim Svirsky របស់អ៉ីស្រាអែល ដែល​ទទួល​បាន​ចំណាត់​ថ្នាក់​លេខ​៣។

អ្នកទាំងពីរត្រូវបានគេថតរូបពី​ការ​ចាប់ដៃគ្នា និយាយគ្នាទៅវិញទៅមក ដែលបានទាញកំហឹងយ៉ាងឆាប់រហ័សពីសហព័ន្ធកីឡាលើកទម្ងន់អ៉ីរ៉ង់ និងរដ្ឋាភិបាលរបស់ប្រទេស ដែលហាមពលរដ្ឋខ្លួនពីការប្រកួតប្រជែងដោយផ្ទាល់ជាមួយអ៉ីស្រាអែល។

សហព័ន្ធកីឡាលើកទម្ងន់អ៉ីរ៉ង់ បានពណ៌នាសកម្មភាពរបស់ Rajaei ថា ជាការបំពានដែលមិនអាចអត់ទោសបាន។

សេចក្តីថ្លែងការណ៍របស់សហព័ន្ធ​កីឡា​លើក​ទម្ងន់​អ៉ីរ៉ង់បានសរសេរថា ៖«មុខតំណែងរបស់សហព័ន្ធគឺស្របទៅនឹងមុខតំណែងនៃការបង្កើតដ៏បរិសុទ្ធនៃសាធារណរដ្ឋអ៉ិស្លាមអ៉ីរ៉ង់» និង​បាន​បញ្ជាក់​ថា Rajaei ត្រូវបានហាមឃាត់មិនឱ្យចូលទៅក្នុង “កន្លែងកីឡាទាំងអស់” ពេញមួយជីវិត។

លោក Hamid Salehinia ជាអ្នក​ដឹកនាំគណៈប្រតិភូនៅប្រទេសប៉ូឡូញ ក៏ត្រូវបានសហព័ន្ធបណ្តេញចេញផងដែរ ដែលបានបញ្ជាក់ថា គណៈកម្មការ​មួយដែលត្រូវបានបង្កើតឡើងដើម្បីតំណាងឱ្យអ្នកលើកទម្ងន់ជើងចាស់ត្រូវបានរំលាយផងដែរ។

អ៉ីរ៉ង់ មិនទទួលស្គាល់ អ៉ីស្រាអែល ជាប្រទេសមួយឡើយ ហើយតែងតែចេញសេចក្តីថ្លែងការណ៍ថ្កោលទោសជាប្រចាំ ខណៈអត្តពលិកអ៉ីរ៉ង់ត្រូវបានរដ្ឋាភិបាលហាមប្រាមយូរមកហើយមិនឱ្យប្រកួតជាមួយអ៉ីស្រាអែល។

សហព័ន្ធយូដូអន្តរជាតិ បានព្យួរប្រទេសអ៉ីរ៉ង់ ពីការប្រកួតរយៈពេល៤ឆ្នាំ ក្នុងឆ្នាំ២០២១ បន្ទាប់ពីមានការលេចចេញថាមានកីឡាករមួយរូប ត្រូវបានបង្ខំឱ្យដកខ្លួនចេញពីការប្រកួតជើងឯកពិភពលោកឆ្នាំ២០១៩ ដើម្បីជៀសវាងការប្រឈមមុខនឹងគូប្រជែងពីអ៉ីស្រាអែល៕

ប្រែសម្រួល៖ មន្នីរ័ត្ន
ប្រភព៖ insidethegames.biz