កីឡា

សៀង ចន្ធា ប្រាប់ថា នឹងមានអ្វីថ្មីសម្រាប់អ្នកគាំទ្រនៅក្រុមជម្រើសជាតិ

បានផុស

២ years មុន

នៅ

ថ្ងៃអង្គារ ៥ កញ្ញា ២០២៣

ដោយ

កីឡាករបាល់ទាត់ សៀង ចន្ធា រំពឹងបង្ហាញអ្វីពិសេសប្លែកនៅក្នុងក្រុមបាល់ទាត់ជម្រើសជាតិកម្ពុជា បន្ទាប់ពីរូបគេបានផ្លាស់ទៅក្លិប Al Shahaniya FC នៃលីគទី២របស់ប្រទេសកាតាររយៈពេលជាងមួយខែកន្លងទៅ។

សៀង ចន្ធា បានវិលត្រឡប់មកដល់កម្ពុជាកាលពីល្ងាចថ្ងៃទី៤ ខែកញ្ញា ឆ្នាំ២០២៣ ដើម្បីចូលរួមជាមួយក្រុមបាល់ទាត់ជម្រើសជាតិកកម្ពុជាសម្រាប់ការប្រកួតមិត្តភាពអន្តរជាតិជាមួយ ហុងកុង នៅថ្ងៃទី៧ ខែកញ្ញា និងជាមួយ ម៉ាកាវ នៅថ្ងៃទី១១ ខែកញ្ញា ក្នុងថ្ងៃ FIFA Days។ សម្រាប់ការចូលរួមជាមួយក្រុមជម្រើសជាតិនេះ រូបគេសង្ឃឹមមានអ្វីថ្មីសម្រាប់អ្នកគាំទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សៀង ចន្ធា បាននិយាយថា ៖«ខ្ញុំសប្បាយរីករាយដែលមានឱកាសបានទៅលេងលីគទី២របស់ប្រទេសកាតារដើម្បីបង្កើនបទពិសោធថ្មី។ នៅទីនោះមានការប្រកួតប្រជែងខ្លាំង ហើយខ្ញុំទទួលបានឱកាសលេង និងអាចរកបានគ្រាប់បាល់»។

«ខ្ញុំរីករាយដែលវិលត្រឡប់មកចូលរួមជាមួយក្រុមជម្រើសជាតិកម្ពុជាជាថ្មី។ ខ្ញុំគិតថា នឹងមានអ្វីពិសេសថ្មីដែលអ្នកគាំទ្រយើងចង់បាន។ ជាពិសេសខ្ញុំចង់បង្ហាញអ្វីដែលខ្ញុំទទួលបានពីការហ្វឹកហាត់នៅប្រទេសកាតារ។ ខ្ញុំគិតថា នឹងមានអ្វីថ្មីនៅក្នុងក្រុមជម្រើសជាតិ ពីព្រោះខ្ញុំបានជួប និងអនុវត្តនូវអ្វីដែលថ្មីច្រើន។ ទាំងនោះជាកត្តាល្អសម្រាប់ខ្ញុំចូលរួមនឹងជម្រើសជាតិ»។ សៀង ចន្ធា បានរៀបរាប់។

នៅពេលសួរថា តើអ្វីជាលក្ខណៈពិសេសដែល សៀង ចន្ធា ជួបផ្ទាល់នៅប្រទេសកាតារ? កីឡាករបានឆ្លើយថា ៖«ទី១គឺការហ្វឹកហាត់ខ្លាំង ហើយការហ្វឹកហាត់នៅ Gym ក៏ខុសប្លែកពីកម្ពុជាដែរ។ នៅកាតារមានការប្រកួតប្រជែងខ្លាំង ពីព្រោះកីឡាករម្នាក់ៗចង់បង្ហាញខ្លួនជម្រើស១១នាក់ដំបូង។ ក្នុងនាមជាកីឡាករបរទេស យើងនឹងមិនមានឱកាសលេងច្រើនទេ ប្រសិនបើកម្រិតសមត្ថភាពរបស់យើងទាប ឬប្រហាក់ប្រហែលកីឡាករក្នុងស្រុក ដូច្នេះគ្មានអ្វីផ្សេងក្រៅតែពីការខិតខំហ្វឹកហាត់ខ្លាំង»។

សៀង ចន្ធា បានបន្ថែមថា ក្រុមការងារ និងកីឡាករនៅក្លិប Al Shahaniya FC មានការគោរពវិន័យបានល្អ។ កីឡាករទៅកន្លែងហ្វឹកហាត់មុនមួយម៉ោងដោយមានទាំងបំពេញឯកសារដើម្បីបញ្ជាក់ពីការទៅដល់កន្លែងហ្វឹកហាត់។

សៀង ចន្ធា ដែលបានផ្លាស់ទៅក្លិប Al Shahaniya FC ក្នុងលក្ខខណ្ឌខ្ចីជើងរយៈពេលមួយឆ្នាំបានចូលរួមបោះជំរំហ្វឹកហាត់នៅក្រៅប្រទេស។ រូបគេតែងតែបានបង្ហាញខ្លួននៅលើទីលានក្នុងការប្រកួតមិត្តភាព និងជាពិសេសការប្រកួតផ្លូវការកាលពីថ្ងៃទី៣ ខែកញ្ញា ឆ្នាំ២០២៣ រូបគេរកបាន១គ្រាប់ក្នុងពានរង្វាន់ Qatar FA Cup ឆ្នាំ២០២៣៕

អត្ថបទ៖ វីរបុត្រ