រកឃើញ៧ក្រុមឡើងវគ្គ៨ក្រុមចុងក្រោយពានសម្តេចតេជោ ហ៊ុន សែន ថ្នាក់ខេត្ត

ក្រុមបាល់ទាត់ឈើតុំ-ខេត្តពោធ៍សាត់ បានក្លាយជាក្រុមទី៧ ដណ្ដើមកៅអីឡើងវគ្គបន្ត ៨ក្រុមចុងក្រោយ នៃពានរង្វាន់សម្ដេចតេជោ ហ៊ុន សែន លើកទី១៧ ថ្នាក់ខេត្ត ឆ្នាំ២០២៣/២៤  បន្ទាប់ពីវាយបកយកឈ្នះក្រុមម្ចាស់ផ្ទះខេត្តឧត្តរមានជ័យ ដោយលទ្ធផល ៥-១ ក្នុងជំនួបបញ្ចប់ពូល C កាលពីថ្ងៃទី២៧ ខែកញ្ញា ឆ្នាំ២០២៣។

ជ័យជម្នះនេះ នាំឲ្យក្រុមឈើតុំ-ខេត្តពោធ៍សាត់ ឡើងទៅឈរលេខ២ ក្នុងពូល C ដោយមាន ១៥ពិន្ទុ ស្មើក្រុមកំពូលតារាងខេត្ដបន្ទាយមានជ័យ។ ក្រុមទាំងពីរ បានដឹកដៃគ្នាឡើងវគ្គ ៨ក្រុមចុងក្រោយ ស្របពេលក្រុមយុវជនខេត្តបាត់ដំបង ដែលរកបាន ១៤ពិន្ទុ បានត្រឹមសោកស្ដាយ ដោយធ្លាក់មកឈរលេខ៣ វិញ ពុំអាចឡើងវគ្គបន្ដនោះឡើយ។

ដោយឡែកការប្រកួត ២គូ​ទៀតពីម្សិលមិញនេះ ក្រុម​ខេត្តស្វាយរៀង បានយកឈ្នះក្រុមម្ចាស់ផ្ទះ ខេត្តកណ្ដាល ៨-២ ដើម្បីឈរចំណាត់ថ្នាក់លេខ៣ ក្នុងពូល B។ រីឯក្រុមកំពូលតារាងពូល D គឺក្រុមបាល់ទាត់សន្ដិភាព-ខេត្តកំពង់ធំ បានយកឈ្នះក្រុមភ្ញៀវសមាគមកីឡាបាល់ទាត់ខេត្តមណ្ឌលគិរី ដោយលទ្ធផល ៤-០ មុនបន្ដដំណើរទៅវគ្គបន្ដ។

គិតត្រឹមពេលនេះ ពានរង្វាន់សម្ដេចតេជោ ហ៊ុន សែន ថ្នាក់ខេត្ត បានរកឃើញបេក្ខភាពឡើងវគ្គ ៨ក្រុមចុងក្រោយ ចំនួន ៧ក្រុមហើយ រួមមាន៖

ពូល A៖ ក្រុមភ្នំពេញហ្គាឡាក់ស៊ី និងខេត្តព្រះសីហនុ

ពូល B៖ ខេត្តត្បូងឃ្មុំ និងខេត្តកំពង់ចាម

ពូល C៖ ខេត្តបន្ទាយមានជ័យ និងក្រុមឈើតុំ-ខេត្ដពោធិ៍សាត់

ពូល D ៖ ក្រុមសន្ដិភាព-ខេត្តកំពង់ធំ ខណៈរង់ចាំក្រុមសៀមរាប ជាមួយរតនគីរី 

ខេត្តសៀមរាប ត្រូវរង់ចាំការប្រកួតរបស់រតនគិរី ទល់នឹងខេត្តកំពង់ធំ នៅថ្ងៃទី២៩ ខែកញ្ញាខាងមុខនេះ ខណៈបើរតនគិរី ឈ្នះ ឬស្មើ នោះសៀមរាប នឹងធ្លាក់ត្រឹមនេះ ប៉ុន្តែបើរតនគិរី ចាញ់ សៀមរាប នឹងបានឡើងទៅវគ្គបន្តវិញជំនួសវិញ៕

អត្ថបទ៖ មន្នីរ័ត្ន