ក្រុមខ្លាំង៣ មិនទាន់ចាញ់ក្នុងពានសម្ដេចក្រឡាហោមត្រូវប្រកួតថ្ងៃនេះ

ការប្រកួតបាល់ទះពានរង្វាន់សម្ដេចក្រឡាហោម ស ខេង បានឈានដល់វគ្គ១៦ បន្ទាប់​ពី​ចប់​ការ​ប្រកួត​វគ្គ​សន្សំ​ពិន្ទុ​ក្នុង​ពូល។ ថ្ងៃពុធ ទី១៥ ខែវិច្ឆិកា ឆ្នាំ២០២៣ មានចំនួន៤គូ ត្រូវ​ប្រកួតប្រជែងដើម្បីបានឡើងទៅវគ្គ​៨​ក្រុម​ចុងក្រោយ​​សាលវិមាននៃពហុកីឡដ្ឋាន​ជាតិអូឡាំពិក។

ការប្រកួតនៅវគ្គ១៦នៅក្រុមចុងក្រោយ នៅថ្ងៃនេះគឺសុទ្ធតែគូជក់ចិត្ត ជាពិសេសក្រុមខ្លាំង៣ ដែលមិនស្គាល់ពាក្យថាចាញ់ក្នុងការប្រកួតវគ្គសន្សំពិន្ទុក្នុងពូលកន្លងមក​គឺ​ក្លិបស្នងការនគរបាលខេត្តកណ្ដាល ក្លិបបញ្ជាការដ្ឋានអង្គរក្ស B និង ក្លិបរដ្ឋបាលរាជធានីភ្នំពេញ។

នៅវេលាម៉ោង១២ថ្ងៃត្រង់ ស្នងការនគរបាលខេត្តកណ្ដាលត្រូវជួប​ស្នងការនគរបាលខេត្តត្បូងឃ្មុំ។ ស្នងការនគរបាលខេត្តកណ្ដាលគឺជាក្រុមខ្លាំងប្រចាំពូល A ដោយឈរលេខ១ក្នុងពូល ប្រកួត៣លើកឈ្នះទាំង៣ មាន៨ពិន្ទុ ខណៈ​ស្នងការនគរបាលខេត្តត្បូងឃ្មុំ ជាក្រុមឈរលេខ២ក្រុមក្នុងពូល E ដោយប្រកួត៣លើក ឈ្នះ២ និងចាញ់១ មាន៦ពិន្ទុ។

វេលាម៉ោង២ថ្ងៃត្រង់ ក្លិបបញ្ជាការដ្ឋានអង្គរក្ស B ត្រូវជួប​ស្នងការនគរបាលខេត្តមណ្ឌលគិរី។ ក្លិបបញ្ជាការដ្ឋានអង្គរក្ស B ជាក្រុមខ្លាំងក្នុងពូល B ដោយប្រកួត៣លើក ឈ្នះទាំង៣ មាន៩ពិន្ទុ ឈរនៅចំណាត់ថ្នាក់លេខ១ក្នុងពូល។ ចំណែកក្លិបស្នងការនគរបាលខេត្តមណ្ឌលគិរី ជាក្រុមឈរលេខ២ ក្នុងពូល F ប្រកួត៣លើក ឈ្នះ២ ចាញ់១ មាន៥ពិន្ទុ។

វេលាម៉ោង៤រសៀល ក្លិបរដ្ឋបាលរាជធានីភ្នំពេញត្រូវជួប​ស្នងការនគរបាលខេត្តកោះកុង។ រាជធានីភ្នំពេញ​ជា​ក្រុមខ្លាំងដែលមិនស្គាល់ពាក្យ​ចាញ់​ក្នុងពូល ដោយប្រកួត៣លើក ឈ្នះ៣ មាន៩ពិន្ទុ ឈរលេខ១ ក្នុងពូល C។ ចំណែកក្លិបស្នងការនគរបាលខេត្តកោះកុង ជាក្រុមឈរលេខ​២​ក្នុងពូល G ប្រកួត២លើកឈ្នះ១ ចាញ់១ មាន៤ពិន្ទុ។

សម្រាប់កាលវិភាគប្រកួតវគ្គ១៦ក្រុមក្នុងថ្ងៃនេះរួមមាន៖
ម៉ោង១២ថ្ងៃត្រង់
-ក្លិបស្នងការនគរបាលខេត្តកណ្ដាល vs ក្លិបស្នងការនគរបាលខេត្តត្បូងឃ្មុំ
ម៉ោង២ថ្ងៃត្រង់
-ក្លិបបញ្ជាការដ្ឋានអង្គរក្ស B vs ក្លិបស្នងការនគរបាលខេត្តមណ្ឌលគិរី
ម៉ោង៤ថ្ងៃរសៀល
-ក្លិបរដ្ឋបាលរាជធានីភ្នំពេញ vs ក្លិបស្នងការនគរបាលខេត្តកោះកុង
ម៉ោង៦យប់
-ក្លិបស្នងការនគរបាលខេត្តកំពង់ចាម vs ក្លិបយុវជនបក្សីឆ្លងដែន

អត្ថបទ៖ ផា រតនា​