កីឡា

មហាសន្និបាតគុនខ្មែរអន្តរជាតិអនុម័តគោលការណ៍សំខាន់៦ចំណុច

បានផុស

៤ ខែ មុន

នៅ

ថ្ងៃពុធ ២៩ វិច្ឆិកា ២០២៣

ដោយ

សហព័ន្ធកីឡាប្រដាល់គុនខ្មែរអន្តរជាតិបានរៀបចំមហាសន្និបាតរបស់ខ្លួនកាលពីថ្ងៃទី២៥ ខែវិច្ឆិកា ឆ្នាំ២០២៣ ដោយបានអនុម័តគោលការណ៍សំខាន់ចំនួន៦ចំណុចដើម្បីជំរុញអភិរក្ស និងអភិវឌ្ឍគុនខ្មែរលើឆាកអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហាសន្និបាតមានការចូលរួមពីសមាជិកផ្ទាល់ចំនួន១៧ប្រទេស និងប្រទេសជាសមាជិកបានផ្តល់សិទ្ធិប្រទានជាង៤០ប្រទេសទៀតដែលសរុបមានចំនួន៦០ប្រទេសបានគាំទ្រដល់សេចក្តីសម្រេចរបស់មហាសន្និបាត។

មហាសន្និបាតដែលមានបេសកកម្ម«អភិរក្សដើម្បីអភិវឌ្ឍគុនខ្មែរ និងអភិវឌ្ឍដើម្បីអភិរក្សគុនខ្មែរ»បានសម្រេចគោលការណ៍សំខាន់ៗចំនួន៦ដូចខាងក្រោម៖

សហព័ន្ធគុនខ្មែរអន្តរជាតិ និងសមាជិកគុនខ្មែរអន្តរជាតិទាំងអស់បានឯកភាពគ្នារក្សាឲ្យបាននូវនិរន្តរភាពនៃការរៀបចំការប្រកួតគុនខ្មែរជ្រើសរើសជើងឯកពិភពលោកឲ្យបានទៀងទាត់ជារៀងរាល់ឆ្នាំ។
សហព័ន្ធគុនខ្មែរអន្តរជាតិបាននិងកំពុងខិតខំប្រឹងប្រែងពង្រឹងយន្តការគ្រប់គ្រង ការដឹកនាំសមាជិកទាំង៦០ប្រទេស និងបង្កើនសមាជិកភាពបន្ថែមឲ្យបានដល់៧៥ប្រទេសក្នុងអាណត្តិ៥ឆ្នាំទៀត ចាប់ពីឆ្នាំ២០២៤ ដើម្បីឈានទៅដាក់ពាក្យស្នើសុំទទួលស្គាល់ពីគណៈកម្មាធិការអូឡាំពិកអន្តរជាតិ និងអង្គការកីឡាអន្តរជាតិពាក់ព័ន្ធ។
សហព័ន្ធគុនខ្មែរអន្តរជាតិអំពាវនាវសុំការឧបត្ថម្ភគាំទ្រឲ្យមាន«ចលនាជាតិអភិវឌ្ឍគុនខ្មែរ»ដើម្បីសម្រេចបានគោលដៅយុទ្ធសាស្ត្រជាតិ ការបញ្ចូលកីឡាគុនខ្មែរអន្តរជាតិទៅក្នុងកីឡាអូឡាំពិក។
សហព័ន្ធគុនខ្មែរអន្តរជាតិបើកទ្វារចំហជានិច្ចរង់ចាំទទួលសមាជិកភាពគុនខ្មែរពីគ្រប់ប្រទេសទូទាំងពិភពលោក។
មហាសន្និបាត និងការប្រកួតគុនខ្មែរជ្រើសរើសជើងឯកពិភពលោក លើកទី៥ ឆ្នាំ២០២៤ នឹងធ្វើនៅប្រទេសកម្ពុជា ប៉ុន្តែការប្រកួតចាប់ពីឆ្នាំ២០២៥នឹងធ្វើនៅតាមប្រទេសជាសមាជិកដែលស្នើសុំរៀបចំធ្វើម្ចាស់ផ្ទះ។ ប្រសិនបើគ្មានប្រទេសជាសមាជិកស្នើសុំធ្វើម្ចាស់ផ្ទះ កម្ពុជាត្រូវរក្សាសិទ្ធិរៀបចំធ្វើឲ្យរក្សានិរន្តរភាពព្រឹត្តិការណ៍ដ៏មានសារសំខាន់នេះ។
សហព័ន្ធគុនខ្មែរអន្តរជាតិប្តេជ្ញាគោរពយ៉ាងម៉ឺងម៉ាត់នូវគោលការណ៍យុត្តិធម៌ (Fair Play) និងគោលការណ៍កីឡាស្អាតស្អំ (Clean Sport) ដោយគោរពបទដ្ឋានគតិយុត្តនៃការប្រឆាំងដាច់ខាតការប្រើប្រាស់សារធាតុលើកកម្លាំង (Anti-Doping Rule៕

សូមបញ្ជាក់ថា កម្ពុជាបានរៀបចំមហាសន្និបាតគុនខ្មែរអន្តរជាតិកាលពីថ្ងៃទី២៥ ខែវិច្ឆិកា និងបានរៀបចំការប្រកួតជ្រើសរើសជើងឯកគុនខ្មែរពិភពលោករយៈពេល៣ថ្ងៃនៅថ្ងៃទី២៦-២៧-២៨ ខែវិច្ឆិកា ឆ្នាំ២០២៣ នៅខេត្តសៀមរាប៕