កីឡា

ធ្លាប់ជួបបញ្ហាធ្ងន់ធ្ងរ ធន់ ចាន់តាក់ នៅតែតស៊ូក្នុងអាជីពប្រដាល់

បានផុស

៣ ខែ មុន

នៅ

ថ្ងៃអង្គារ ២ មេសា ២០២៤

ដោយ

កីឡាករ ធន់ ចាន់តាក់ បានរងរបួសធ្ងន់ធ្ងរពីការឡើងសង្វៀនរហូតត្រូវបានគ្រូពេទ្យណែនាំឲ្យបញ្ចប់ពីអាជីពប្រដាល់ ប៉ុន្តែរូបគេនៅតែតស៊ូក្នុងអាជីពឈឺសាច់រហូតដល់សព្វថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ធន់ ចាន់តាក់ កូនសិស្សរបស់លោកគ្រូ ធន់ សុភា ស្ទើរតែបោះបង់អាជីពប្រដាល់ បន្ទាប់ពីជួបបញ្ហារបួសតំរង់នោម នៅពេលប្រកួតជាមួយកីឡាករ ឯម ខ្លឹមខ្មៅ ដែលបានទាត់ត្រូវតំរង់នោមមុនពេលវិបត្តិកូវីដ-១៩។ កីឡាករត្រូវបានបញ្ជូនទៅព្យាបាលនៅមន្ទើរពេទ្យ បន្ទាប់ពីបត់ជើងតូចចេញសុទ្ធតែឈាម។ ពេលនោះជាគ្រាដ៏លំបាកបំផុតសម្រាប់អ្នកប្រដាល់មកពីខេត្តកំពង់ឆ្នាំងដែលបានតស៊ូព្យាបាលក្នុងអំឡុងពេលរឹតត្បិតជំងឺរាតត្បាតកូវីដ-១៩។

កីឡាករ ធន់ ចាន់តាក់ បានប្រាប់«កម្ពុជាថ្មី»ថា ៖«អំឡុងពេលកូវីដ-១៩ ពេលប្រកួត ខ្ញុំមានបញ្ហាតំរង់នោម ដោយសារ ឯម ខ្លឹមខ្មៅ ទាត់ត្រូវ។ ក្រោយបញ្ចប់៥ទឹក ខ្ញុំឈ្នះពិន្ទុ។ បន្ទាប់មកអាការៈធ្វើទុក្ខ ខ្ញុំបត់ជើងតូចចេញឈាម ត្រូវសម្រាកនៅមន្ទើរពេទ្យយូរ។ ពេលនោះសម័យកូវីដពិបាកចេញចូលមន្ទីរពេទ្យទៀត។ ខ្ញុំត្រូវផ្អាកប្រកួតមួយរយៈយូរ ហើយខ្ញុំគិតថា មិនអាចវិលមកប្រកួតវិញទេ ពីព្រោះពេទ្យហាមធ្វើការងារធ្ងន់ ប៉ុន្តែអារម្មណ៍នៅតែស្រឡាញ់ប្រដាល់»។

ធន់ ចាន់តាក់ បានព្យាយាមលាក់បាំងរឿងនេះមិនឲ្យឪពុកម្តាយដឹងឡើយ ព្រោះខ្លាចពួកគាត់ពិបាកចិត្ត ប៉ុន្តែពេលធូរស្រាល រូបគេបានត្រឡប់ទៅស្រុកកំណើតវិញ។ ឪពុកម្ដាយដឹងបញ្ហារបួសនេះ និងរឹតតែហាមឃាត់ក្នុងការធ្វើកិច្ចការធ្ងន់។ រឿងនឹកស្មានមិនដល់ រូបគេបានកើតមានអាការៈធ្ងន់ធ្ងរម្តងទៀត ដោយសាររអិលដួលជិតបន្ទប់ទឹក ធ្វើឲ្យហូរឈាមរហូតដល់សន្លប់។ រូបគេត្រូវបានបញ្ជូនទៅមន្ទីរពេទ្យក្នុងអន្តរកាលវិបត្តិកូវីដ-១៩ជាពេលវេលាដ៏លំបាកក្នុងការធ្វើដំណើរ និងចេញចូលមន្ទីរពេទ្យ។

ពេលនោះ ធន់ ចាន់តាក់ កាន់តែអស់សង្ឃឹម។ បន្ទាប់ពីត្រូវបញ្ចូនចូលមន្ទីរពេទ្យសង្រ្គោះបន្ទាន់ ហើយក្រុមគ្រូពេទ្យបានណែនាំម្ដងទៀត ហាមធ្វើការងារធ្ងន់។ ជាពិសេសប្រុងប្រយ័ត្នកុំឲ្យមានអាការរើឡើងវិញ អាចប្រឈមគ្រោះថ្នាក់ដល់អាយុជីវិត។

ទោះបីជាយ៉ាងណា ក្រោយធូរស្បើយ ធន់ ចាន់តាក់ បានចាប់ផ្តើមហ្វឹកហាត់បន្តិចៗម្តង។ កីឡាករបានប្រាប់ថា ពេលចាប់ផ្តើមហាត់ឡើងវិញអត់ប្រាប់ឪពុកម្តាយទេ។ ការហ្វឹកហាត់ពីមួយថ្ងៃទៅមួយថ្ងៃ អាការជំងឺក៏មិនមានកើតឡើងជាថ្មីគួរឲ្យកត់សំគាល់ ដូច្នេះរូបគេក៏បង្កើនការហ្វឹកហាត់កាន់តែខ្លាំង។ ទីបំផុត រូបគេក៏ត្រូវបានលោកគ្រូអនុញ្ញាតឲ្យឡើងប្រកួតរហូតដល់បច្ចុប្បន្ន។

ធន់ ចាន់តាក់ បាននិយាយថា ៖«ខ្ញុំប្រៀបដូចជាត្រកួតស្វិតស្រពោនស្ទើរងាប់ទៅហើយ តែបានស្រស់រស់ឡើងវិញ។ ខ្ញុំមានតែខំប្រឹងប្រែងបន្ថែមទៀតប៉ុណ្ណោះ»។

កីឡាករ ធន់ ចាន់តាក់ ធ្លាប់ឈ្នះបានខ្សែក្រវាត់២គ្រឿងក្នុងនោះឈ្នះខ្សែក្រវាត់លីអូឆ្នាំ២០១៦ និងខ្សែក្រវាត់កម្ពុជាឆ្នាំ២០២០ ហើយរូបគេបានប្រកួតជាមួយកីឡាករបរទេសរហូត ព្រមទាំងធ្លាប់បានទៅប្រកួតនៅក្រៅប្រទេសថែមទៀត។

ធន់ ចាន់តាក់ បានប្រាប់ថា រហូតដល់ពេលនេះ រូបគេមិនទាន់ពេញចិត្តនឹងអាជីពប្រដាល់របស់ខ្លួនឡើយពោលគឺនៅមានចំណុចខ្វះខាតច្រើនដែលត្រូវកែលំអ។ ជាពិសេសទៀតនោះ រូបគេសូមការអធ្យាស្រ័យពីអ្នកគាំទ្រដែលសមត្ថភាពរបស់ខ្លួនមិនអាចវ៉ៃល្អមើលដូចកីឡាករផ្សេង។

កីឡាករបាននិយាយថា ៖«មនុស្សយើងមិនអាចមានអ្វីដូចគ្នាទេ ប្រៀបដូចជាសរសេរអក្សរអីចឹង។ អ្នកខ្លះសរសេរអក្សរស្អាត អ្នកខ្លះសរសេរអក្សរមិនស្អាត ទោះខំប្រឹងយ៉ាងណាក៏នៅតែមិនស្អាត ព្រោះវាបានក្លាយជាទម្លាប់ទៅហើយ។ ដូច្នេះរបៀបវ៉ៃរបស់កីឡាករម្នាក់ៗក៏មិនដូចគ្នាដែរ»៕

អត្ថបទ៖ ផា រតនា