កីឡា

លោក Muñoz ប្រាប់កីឡាករគ្រោះថ្នាក់របស់ Young Elephants មុនប៉ះគ្នាស្អែក

បានផុស

២ years មុន

នៅ

ថ្ងៃអង្គារ ១៦ កក្កដា ២០២៤

ដោយ

ខ្សែប្រយុទ្ធសញ្ជាតិអ៊ូបេគីស្ថាន និងកីឡាករជប៉ុន Takumu Nishihara ជាកម្លាំងស្នួលដែលបានធ្វើឲ្យគ្រូបង្វឹកព្រះខ័នរាជស្វាយរៀងចាត់ទុកគ្រោះថ្នាក់នៅពេលត្រូវប៉ះក្រុម Young Elephants ជើងទី១ វគ្គជម្រុះជើងឯកក្លិបអាស៊ាន (ASEAN Club Championship) ម៉ោង៧:៣០នាទីយប់ ថ្ងៃទី១៧ ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Josep Muñoz គ្រូបង្វឹកព្រះខ័នរាជស្វាយរៀងបាននិយាយថា ៖«អ្វីដែលគ្រោះថ្នាក់គឺកីឡាករបរទេសរបស់ពួកគេ ដូចជា Takumu និង Suzuki សុទ្ធតែយើងធ្លាប់ស្គាល់។ ពួកគេធ្លាប់លេងនៅកម្ពុជា។ ជាពិសេសកីឡាករអ៊ូបេគីស្ថានជាខ្សែប្រយុទ្ធដែលគ្រោះថ្នាក់ ហើយតំបន់ការពារក៏ល្អដែលមានខ្សែការពារប្រេស៊ីល។ ខ្ញុំបានតាមដានពីរបៀបលេងរបស់ Young Elephants គឺតំបន់ការពារនៅកៀកគ្នា អីចឹងអាចនឹងធ្វើឲ្យយើងពិបាកនៅតំបន់ប្រយុទ្ធ ហើយគេវាយបកលឿនៗ។ នេះហើយជាចំណុចគ្រោះថ្នាក់របស់ក្រុមជើងឯកឡាវ»។

មុនប៉ះព្រះខ័នរាជស្វាយរៀង ក្រុមជើងឯកឡាវមួយនេះបានត្រៀមខ្លួនយ៉ាងល្អទាំងបច្ចេកទេស និងកីឡាករ។ ជាពិសេស ពួកគេបាននាំចូលសមាជិកមួយចំនួនមានបទពិសោធទាំងកីឡាករក្នុងស្រុក និងកីឡាករបរទេស។ កីឡាករបរទេស៥រូបគឺមានខ្សែការពារសញ្ជាតិប្រេស៊ីល Maycom Carvalho ខ្សែបម្រើសញ្ជាតិជប៉ុន Yuta Suzuki ខ្សែប្រយុទ្ធសញ្ជាតិជប៉ុន Takumu Nishihara ខ្សែប្រយុទ្ធសញ្ជាតិអ៊ូបេគីស្ថាន Shokhrukh Makhmukkhozhiev និងខ្សែប្រយុទ្ធសញ្ជាតិអ៊ូបេគីស្ថាន Komiljon Tojidinov។

កីឡាករបរទេសដែលមានបទពិសោធច្រើន និងគួរឲ្យកត់សំគាល់គឺ Takumu Nishihara ដែលជាខ្សែប្រយុទ្ធធ្លាប់លេងនៅកម្ពុជាជាមួយក្លិបក្រសួងការពារជាតិ និង វិសាខា ពីឆ្នាំ២០២១ដល់២០២៣ និងកីឡាករ Yuta Suzuki ដែលធ្លាប់លេងនៅកម្ពុជាជាមួយក្លិបភ្នំពេញក្រោន និងនគរបាលជាតិ ឆ្នាំ២០១៨-១៩។

ខ្សែប្រយុទ្ធ៖ Takumu (ឆ្វេង) កីឡាករឡាវ Kydavone (កណ្តាល) និង Shokhrukh (ស្តាំ)

ក្រុម Young Elephants ជាក្រុមខ្លាំង និងឈានមុខគេនៅក្នុងប្រទេសឡាវដែលបានឈ្នះជើងឯកលីគកំពូលឡាវ២រដូវកាលជាប់គ្នាគឺឆ្នាំ២០២២ និង២០២៣ ព្រមទាំងជាជើងឯកពាន Lao FF Cup ពីរលើកគឺឆ្នាំ២០២០ និង២០២២។

កាលពីរដូវកាលមុន Young Elephants បានប្រកួតជម្រុះជាមួយភ្នំពេញក្រោន ក្នុងពានរង្វាន់ AFC Cup ដែលបានចាញ់ដោយលទ្ធផល ៣-០ នៅទឹកដីកម្ពុជា។ រដូវកាល២០២៤-២៥ ពួកគេត្រូវលេងពានរង្វាន់អន្តរជាតិ២ដូចព្រះខ័នរាជស្វាយរៀងដែរគឺ ASEAN Club Championship និង AFC Challenge League៕