កីឡា

ព្រះខ័នរាជស្វាយរៀង សង្ឃឹមខ្ពស់ឡើងវគ្គ៨ក្រុមចុងក្រោយ ពាន AFC Challenge League

បានផុស

២ years មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

ក្លិបបាល់ទាត់ព្រះខ័នរាជស្វាយរៀង សង្ឃឹមខ្ពស់ក្នុងការឈានដល់វគ្គ៨ក្រុមចុងក្រោយ ពានរង្វាន់លំដាប់ទី៣អាស៊ី AFC Challenge League 2024/25 បន្ទាប់ពីចាប់ឆ្នោតស្ថិតនៅពូល E ដែលប្រទេសម៉ុងហ្គោលីធ្វើជាម្ចាស់ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់នេះមានក្លិប១៨ចូលរួមប្រកួតដែលត្រូវបានបែងចែកជា២តំបន់ផ្សេងគ្នាគឺ តំបន់អាស៊ីខាងលិច (West Zone) មាន១២ក្រុម និងតំបន់អាស៊ីខាងកើត (East Zone) មាន៦ក្រុម។

រូបមន្តនៃការប្រកួត បន្ទាប់ពីចប់វគ្គសន្សំពិន្ទុក្នុងពូលគឺ ក្រុម៤មកពីតំបន់អាស៊ីខាងលិច និង៤ក្រុមមកពីតំបន់អាស៊ីខាងកើតឡើងវគ្គ៨ក្រុមចុងក្រោយ។ ក្រុម៨ប្រចាំតំបន់អាស៊ីខាងលិចនឹងធ្លាក់ត្រឹមវគ្គសន្សំពិន្ទុក្នុងពូល ដោយក្រុមលេខ១នៃពូលទាំង៣ និងក្រុមលេខ២ល្អបំផុត១ ឡើងទៅកាន់វគ្គ៨ក្រុមចុងក្រោយ។

ចំណែកតំបន់អាស៊ីខាងកើតវិញមាន២ក្រុមប៉ុណ្ណោះត្រូវធ្លាក់ត្រឹមវគ្គសន្សំពិន្ទុក្នុងពូល ខណៈលេខ១ និងលេខ២នៃពូលទាំង២ ឡើងទៅកាន់វគ្គ៨ក្រុមចុងក្រោយ។ ព្រះខ័នរាជស្វាយរៀងក៏សង្ឃឹមខ្ពស់ក្នុងការឆ្លងផុតវគ្គសន្សំពិន្ទុក្នុងពូល ដោយត្រូវប៉ះ Madura United (ឥណ្ឌូណេស៊ី) និងក្រុមម្ចាស់ផ្ទះ SP Falcons (ម៉ុងហ្គោលី)។

តំបន់អាស៊ីខាងលិច

ពូល A៖ East Bebgak FC (ឥណ្ឌា) Nejmech SC (លីប៉ង់) Bashudhara Kings (បង់ក្លាដែស) និងក្រុមម្ចាស់ផ្ទះ Paro FC (ប៉ូតាន)
ពូល B៖ ក្រុមម្ចាស់ផ្ទះ Al Arasi SC (គុយវែត) FC Arkadag (តួកម៉េនីស្ថាន) Maziya Sportss & Recreation (ម៉ាឌីវ) និង FC Abdysh ATA (គីជីស្ថាន)
ពូល C៖ Al Ahli (បារ៉ែន) Al Futowa SC (ស៊ីរី) ក្រុមម្ចាស់ផ្ទះ Al Seeb Club (អូម៉ង់) និង Hilal Al-Quds (ប៉ាឡេស្ទីន)

តំបន់អាស៊ីខាងកើត

ពូល D៖ ក្រុមម្ចាស់ផ្ទះ Shan United, Taivan City FC (ឆាយនីសតៃប៊ិ) និង Young Elephants (ឡាវ)
ពូល E៖ Madura United (ឥណ្ឌូណេស៊ី) ព្រះខ័នរាជស្វាយរៀង (កម្ពុជា) និងក្រុមម្ចាស់ផ្ទះ SP Falcons (ម៉ុងហ្គោលី)

ការប្រកួតវគ្គសន្សំពិន្ទុក្នុងពូលដែលធ្វើតែមួយជើងចាប់ពីថ្ងៃទី២៦ ខែតុលា ដល់ថ្ងៃទី២ ខែវិច្ឆិកា ឆ្នាំ២០២៤ ខណៈការប្រកួតវគ្គ៨ក្រុមចុងក្រោយ វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ពីថ្ងៃទី៥ ខែមីនា ដល់ទី១០ ខែឧសភា ឆ្នាំ២០២៥៕

អត្ថបទ៖ វីរបុត្រ