មូលហេតុ ASEAN Championship ២០២៤ ផ្លាស់ប្ដូរពេលប្រកួត

បើតាមការគ្រោងទុកការប្រកួតពានរង្វាន់ ASEAN Championship ឆ្នាំ២០២៤ ​នឹង​ត្រូវ​ធ្វើ​ឡើងនៅខែវិច្ឆិកាខាងមុខ ប៉ុន្តែបានលើកទៅលេងនៅខែធ្នូវិញ។

សហព័ន្ធកីឡាបាល់ទាត់អាស៊ាន (AFF) បានប្រកាសថា ការប្រកួតពានរង្វាន់ ASEAN Championship (អតីត AFF Cup) នឹងប្រព្រឹត្តទៅចាប់ពីថ្ងៃទី៩ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥។ បើតាមផែនការចាស់ការប្រកួតនឹងធ្វើឡើងចាប់ពីថ្ងៃទី២៣ ខែវិច្ឆិកា ដល់ថ្ងៃទី២១ ខែធ្នូ ឆ្នាំ២០២៤។

ការផ្លាស់ប្តូរនេះគឺដោយសារ​កាលវិភាគក្នុងពានរង្វាន់នេះត្រួតស៊ីគ្នាជាមួយនឹងការប្រកួតក្លិបអាជីពក្នុងពានរង្វាន់អាស៊ីនៅចុងឆ្នាំនេះ។ ក្នុងនោះមានក្រុមនៅតំបន់អាស៊ីអាគ្នេយ៍មាន២ក្រុម ចូលរួមប្រកួតក្នុងពូល AFC Champions League នៅថ្ងៃទី២៥ ខែវិច្ឆិកា ថ្ងៃទី២ ខែធ្នូ។ សម្រាប់១០ក្រុមទៀតត្រូវលេងក្នុងវគ្គចែកពូលនៃពានរង្វាន់ AFC Cup នៅថ្ងៃទី២៦ ខែវិច្ឆិកា និងថ្ងៃទី៣ ខែធ្នូ។

ចំពោះកាលវិភាគប្រកួតដើមក៏បានបង្កការលំបាកដល់ក្រុមជម្រើសជាតិឥណ្ឌូណេស៊ី​ផងដែរ ខណៈពួកគេត្រូវជួបជាមួយក្រុមអារ៉ាប៊ីសាអូឌីតក្នុងពូល C នៃការប្រកួតជម្រុះ World Cup ឆ្នាំ២០២៦ ជុំទី៣ នៅថ្ងៃទី១៩ ខែវិច្ឆិកា។ សមាគមបាល់ទាត់ឥណ្ឌូណេស៊ី (PSSI) បានពិភាក្សាជាមួយគ្រូបង្វឹក Shin Tae-yong អំពីការប្រើប្រាស់ក្រុម U22 ក្នុងការប្រកួត ASEAN Cup ដើម្បីផ្តោតលើធនធានអតិបរមាសម្រាប់ការប្រកួតជម្រុះ World Cup។

ការប្រកួតពានរង្វាន់ ASEAN Championship ឆ្នាំ២០២៤ ក្រុមជម្រើសជាតិកម្ពុជាស្ថិតក្នុងពូល A ជាមួយក្រុមជម្រើសជាតិ​ថៃ ម៉ាឡេសុី សង្ហិបុរី និង​១ក្រុមទៀតត្រូវរងចាំមើលប្រកួតវគ្គជម្រុះរវាង ទីម័រខាងកើត និង​ព្រុយណេ៕

ប្រែសម្រួល៖ ផា រតនា