ម៉ាឡេស៊ីគ្រោងផ្តល់​ប្រាក់​ខែ​ជិត​៥ម៉ឺនដុល្លារក្នុងខែ​ដល់គ្រូបង្វឹក​ថ្មី

សមាគមបាល់ទាត់ម៉ាឡេស៊ី (FAM) បានសម្រេចចិត្ត​ក្នុង​ការ​កំណត់​បេក្ខភាព​​៥​រូប​ចុង​ក្រោយ​ហើយ​ ក្នុងនោះក៏មានអតីតគ្រូបង្វឹកជម្រើស​ជាតិ​វៀតណាមលោក Park Hang-seo ផងដែរ។

ក្រុមបាល់ទាត់ម៉ាឡេស៊ី ​គ្មាន​គ្រូ​​បង្គោល​ជា​ផ្លូវ​ការ​តាំង​ពី​ពាក់​កណ្តាល​ខែ​កក្កដា​មក បន្ទាប់​ពី​លោក​ Kim Pan-gon លាលែង​ពី​តំណែង​ដោយ​ហេតុផល​ផ្ទាល់​ខ្លួន បើ​ទោះ​បី​នៅ​សល់​កុងត្រាជាង១ឆ្នាំ​​ទៀត។ លោក Kim Pan-gon បានត្រឡប់​ទៅ​កូរ៉េខាងត្បូងវិញ ហើយ​ទទួល​ការងារ​ជា​គ្រូ​បង្វឹក​នៅ​ក្លិប​ Ulsan Hyundai ភ្លាម​ៗ​តែ​ម្តង ដែល​បាន​ធ្វើឲ្យប្រធានសមាគមបាល់ទាត់ម៉ាឡេស៊ី និងអ្នកគាំទ្របាល់ទាត់ម៉ាឡេស៊ីខឹងសម្បារយ៉ាងខ្លាំង។

ក្នុងពេលថ្មីៗនេះ សមាគមបាល់ទាត់ម៉ាឡេស៊ី បាន​កំណត់បេក្ខភាព​៥រូប​ចុង​ក្រោយ​ហើយ​ ក្នុងនោះក៏មានអតីតគ្រូបង្វឹកវៀតណាមលោក Park Hang-seo ផងដែរ។ សមាគមបាល់ទាត់ម៉ាឡេស៊ីបាន​បញ្ជាក់​ថា ខ្លួននឹងផ្តល់ប្រាក់ខែ​ឲ្យគ្រូបង្វឹកថ្មីជាមួយប្រាក់ខែ២០០,០០០ រីងហ្គីត (​ប្រាក់​ម៉ាឡេស៊ី) ស្មើ៤៧,០០០ដុល្លារ ក្នុងមួយខែ។

អនុប្រធានសមាគមបាល់ទាត់ម៉ាឡេស៊ី លោក Datuk Yusoff Mahadi បាននិយាយនៅឯសន្និសីទសារព័ត៌មានថា ៖«​ប្រាក់​នោះគឺសម្រាប់គ្រូបង្វឹកដែលអាចនាំក្រុមទៅកម្រិតខ្ពស់» ។

ចំពោះប្រាក់​ខែ​នេះ​គឺ​ច្រើន​ជាង​ទ្វេ​ដង​នូវ​អ្វី​ដែល​លោក Kim Pan-gon អតីតគ្រូ​បង្វឹក​ម៉ាឡេស៊ី​មុន​បាន​ទទួល។ ចំពោះប្រាក់ខែនេះស្ទើរតែស្មើគ្នានឹងប្រាក់ខែ​របស់​លោក​ Park Hang-seo ​នៅ​វៀតណាម។ លោក Park អាយុ៦៦ឆ្នាំត្រូវបានគេរំពឹង​ជាបេក្ខភាពឈានមុខគេ ក្នុងនាមជាគ្រូបង្វឹកថ្មីរបស់ក្រុមជម្រើសជាតិម៉ាឡេសុី។

បច្ចុប្បន្នក្រុមបាល់ទាត់ជម្រើសជាតិម៉ាឡេស៊ី កំពុងដឹកនាំដោយលោក Paul Marti Vicente ក្នុងនាមជាគ្រូបង្វឹកបណ្តោះអាសន្ន។ គ្រូ​បង្វឹក​សញ្ជាតិ​អេស្ប៉ាញ​រូប​នេះ​បាន​ជួយ​ម៉ាឡេស៊ី​យក​ឈ្នះ​ហ្វីលីពីន ២-១ និង​ឈ្នះ​លីបង់ ១-០ ​ឈ្នះ​ពាន Merdeka Cup ឆ្នាំ២០២៤។ សមាគមបាល់ទាត់ម៉ាឡេស៊ី បានយល់ព្រមអនុញ្ញាតឲ្យលោក Vicente ធ្វើជាគ្រូបង្វឹកក្រុមជម្រើសជាតិរហូតដល់ក្រោយ AFF Championship ឆ្នាំ២០២៤ ដែល​នៅ​ពូល​ជា​មួយ​កម្ពុជា៕

ប្រែសម្រួល៖ ផា រតនា