កីឡាករអាស៊ាន២រូបត្រូវបានហាមពីបាល់ទាត់ក្រោយបន្លំអាយុ

កីឡាករបាល់ទាត់ទីម័រខាងកើត២រូប ត្រូវបានហាមពីសកម្មភាពកីឡាបាល់ទាត់មួយរយៈ បន្ទាប់ពីរកឃើញមានការក្លែងបន្លំអាយុនៅក្នុងការប្រកួតកម្រិតយុវជន ក្រោយការស៊ើបអង្កេតដោយសហព័ន្ធបាល់ទាត់អាស៊ី (AFC)។

ខ្សែការពារ Jaimito Antonio Da Costa Soares ត្រូវបានហាមឃាត់រាល់ការចូលរួមសកម្មភាព​បាល់ទាត់រយៈពេល១២ខែ និងពិន័យជាប្រាក់ចំនួន១០,០០០ ដុល្លារ ខណៈខ្សែបម្រើ Antonio Da Costa Soares Moniz ជាប់បម្រាមរយៈពេល៩ខែ និងពិន័យជាប្រាក់ចំនួន៥,០០០ដុល្លារ។ កីឡាករទាំង២រូបមិនបានចូលរួមផ្ដល់បទសម្ភាសន៍ ឬឆ្លើយតបទៅនឹងសំណើជាលាយលក្ខណ៍អក្សរសម្រាប់ព័ត៌មានជំរុញករណីទៅកាន់សហព័ន្ធបាល់ទាត់អាស៊ីទេ នៅបញ្ចប់ការស៊ើបអង្កេតនិងសម្រេចដាក់ទណ្ឌកម្ម។

កីឡាករ Moniz កើតក្នុងឆ្នាំ១៩៩៦ បានចូលរួមក្នុងវគ្គជម្រុះ AFC U19 Championship ឆ្នាំ២០១៦ ទោះបីជាគេអាយុលើសក៏ដោយ។ សហព័ន្ធបាល់ទាត់ទ្វីបអាស៊ី បាននិយាយថា Moniz បានប្រើអត្ដសញ្ញាណប័ណ្ណ (ID) របស់អ្នកដទៃដើម្បីចូលរួមក្នុងការប្រកួត។ ចំណែកឯកីឡាករ Jaimito កើតនៅថ្ងៃទី១០ ខែមិថុនា ឆ្នាំ ២០០៣ ត្រូវបានគេរកឃើញថាបានប្រើប្រាស់អត្ដសញ្ញាណប័ណ្ណក្លែងក្លាយ ដើម្បីចូលរួមក្នុងការប្រកួតវគ្គជម្រុះ AFC U19 Championship ឆ្នាំ២០២០ និងវគ្គជម្រុះ AFC U23 Championship ឆ្នាំ២០២២។

ទីម័រខាងកើត ដែលជាប្រទេសកំពុងអភិវឌ្ឍមួយនៅតំបន់អាស៊ីអាគ្នេយ៍ដែលមានប្រជាជន ១.៣៥លាននាក់។ ប្រទេសមួយនេះបានប្រឈមមុខនឹងការសង្ស័យជាញឹកញាប់នៃការក្លែងបន្លំអាយុនៅក្នុងវិស័យកីឡាបាល់ទាត់ និងការប្រើប្រាស់ឯកសារមិនពិតដើម្បីផ្តល់សញ្ជាតិ។

ឆ្នាំ២០១៧ សហព័ន្ធបាល់ទាត់ទ្វីបអាស៊ី បានដកសិទ្ធិកីឡាករទីម័រខាងកើតចំនួន១២នាក់ដែលមានដើមកំណើតប្រេស៊ីល បន្ទាប់ពីរកឃើញថាលិខិតឆ្លងដែនរបស់ពួកគេខុសច្បាប់។ សហព័ន្ធកីឡាបាល់ទាត់ទីម័រខាងកើត ត្រូវបានពិន័យជាប្រាក់ចំនួន ៧៦,០០០ដុល្លារ ខណៈអគ្គលេខាធិការសហព័ន្ធកីឡាបាល់ទាត់ទីម័រខាងកើត លោក Amandio de Araujo Sarmento ត្រូវបានហាមឃាត់​ក្នុង​សកម្មភាពបាល់ទាត់រយៈពេល៣ឆ្នាំ និងពិន័យជាប្រាក់ចំនួន៩,០០០ដុល្លារ៕

ប្រែសម្រួល៖ ផា រតនា