គ្រូក្រសួងមហាផ្ទៃថា ឆ្នាំនេះពិបាកការពារជើងឯកសម្ដេចក្រឡាហោម ស ខេង

ការប្រកួតពានរង្វាន់កីឡាបាល់ទះពានរង្វាន់សម្ដេចក្រឡាហោម ស ខេង រដូវកាលទី៣ ឆ្នាំ២០២៤ នឹងចាប់ផ្ដើមដំណើរការ​ពីថ្ងៃទី១០ ដល់​ទី​២១ ខែធ្នូ ឆ្នាំ២០២៤ នៅវិមានសាលបាល់ទះក្នុង​ពហុកីឡដ្ឋានជាតិអូឡាំពិក។

ការប្រកួតឆ្នាំនេះ សហព័ន្ធកីឡាបាល់ទះកម្ពុជាបានកែប្រែលក្ខខណ្ឌមួយ​ចំនួន​គឺ​​ក្រុមនីមួយៗ អាចដាក់កីឡាករកម្រិត A លេងនៅក្នុងទីលាន បានចំនួន២នាក់ និងកីឡាករបរទេសបាន១នាក់។ ក្រោយការ​កំណត់​លក្ខខណ្ឌនៃការប្រកួតថ្មីនេះ ក្រុមដែលមានកីឡាករលំដាប់ A ច្រើន អាចដាក់ឲ្យក្រុមមកពីតាមបណ្ដាខេត្តខ្ចីជើងកីឡាកររបស់​ពួក​គេ​បាន។

ចំពោះលោក អ៊ូ សុផល គ្រូបង្វឹកក្លិបបាល់ទះក្រសួងមហាផ្ទៃ ក្រោយឃើញពីការប្រែលក្ខខណ្ឌថ្មី លោកក៏​ពេញ​ចិត្ត​ដែល​អាច​ធ្វើ​ឲ្យ​ការប្រកួត​​ឆ្នាំនេះកាន់ជក់ចិត្ត ក្រោយក្រុមចូលរូមទាំងអស់មានសមត្ថភាពមិនលើសខ្វះខ្លាំងពេកទេ។ ក្នុងនាមជាម្ចាស់ជើងឯកពានរង្វាន់សម្ដេចក្រឡាហោម ស ខេង រដូវកាលទី២ ឆ្នាំ២០២៣ លោក​បានមើលថា ក្រុមខ្លួនអាចនឹងពិបាកក្នុងការពារតំណែងជើងឯក​ឆ្នាំ​ចាស់ គឺដោយសារក្រុមចូលរួម​ច្រើន ជាពិសេសកម្រិតសមត្ថភាពក្រុមចូលរួមសុទ្ធតែខ្លាំងដូច​គ្នា។

លោក អ៊ូ សុផល បានប្រាប់«កម្ពុជាថ្មី»ថា ៖«ឆ្នាំនេះដោយសារមានក្រុមចូលរួមប្រកួតច្រើន ចឹងការប្រកួតប្រជែងកាន់តែខ្លាំង ហើយខ្ញុំក៏មិនរំពឹងខ្ពស់ពេកដែរ ក្នុងការការពារ​ជើងឯក​ឆ្នាំ​ចាស់។ មូលហេតុដោយសារក្លិបមកពីបណ្ដាខេត្តផ្សេងៗគេក៏ល្អ​ ហើយពួកគេក៏នាំយកកីឡាករដែលមានគុណផលល្អច្រើនចូលរួមក្នុងក្លិប»។

ក្នុងការប្រកួតពានរង្វាន់សម្ដេចក្រឡាហោម ស ខេង ឆ្នាំនេះមានក្រុមចូលរួមសរុបរហូតដល់៣១ក្រុម ជាហេតុធ្វើឲ្យការប្រកួតប្រជែងឆ្នាំនេះ កាន់តែតានតឹងជាមួយក្រុមនីមួយៗសុទ្ធតែត្រៀមខ្លួនបានល្អ ដើម្បីប្រជែងជាម្ចាស់ជើងឯក៕

អត្ថបទ៖ ផា រតនា