កីឡា

លោក Gyotoku ត្រូវបានតែងតាំងជាគ្រូជម្រើសជាតិកម្ពុជាផ្លូវការ

បានផុស

១ year មុន

នៅ

ថ្ងៃចន្ទ ១០ មីនា ២០២៥

ដោយ

សហព័ន្ធកីឡាបាល់ទាត់កម្ពុជា បានសម្រេចតែងតាំងលោក Koji Gyotoku ជាគ្រូបង្គោលក្រុមជម្រើសជាតិកម្ពុជា និងក្រុមជម្រើសជាតិកម្ពុជាអាយុក្រោម២៣ឆ្នាំជាផ្លូវការហើយដែលកុងត្រាមានរយៈពេលមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការងារសំខាន់របស់លោកក្នុងនាមជាគ្រូបង្គោលក្នុងឆ្នាំ២០២៥គឺ ដឹកនាំក្រុមជម្រើសជាតិកម្ពុជាអាយុក្រោម២៣ឆ្នាំ ប្រកួតក្នុងព្រឹត្តិការណ៍កីឡាស៊ីហ្គេម នាខែធ្នូ នៅប្រទេសថៃដែលដាក់គោលដៅឲ្យឈានដល់វគ្គពាក់កណ្តាលផ្តាច់ព្រ័ត្រ និងការប្រកួតមិត្តភាពអន្តរជាតិរបស់ក្រុមជម្រើសជាតិកម្ពុជា ជម្រើសទី១ ពីព្រោះក្រុមជម្រើសជាតិជម្រើសទី១មានគ្មានពានរង្វាន់អន្តរជាតិផ្លូវការទេរហូតដល់ពេលនេះ។ យ៉ាងណា នៅពេលខាងមុខ សហព័ន្ធកីឡាបាល់ទាត់កម្ពុជាអាចនឹងរៀបចំឲ្យមានការប្រកួតពានរង្វាន់ផ្លូវការណាមួយដែលត្រូវអញ្ជើញក្រុមជម្រើសជាតិផ្សេងឲ្យចូលរួមប្រកួត។

លោក Koji Gyotoku បានដឹកនាំក្រុមជម្រើសជាតិកម្ពុជាក្នុងនាមជាគ្រូបង្វឹកបណ្តោះអាសន្នកាលពីខែតុលា ឆ្នាំ២០២៤ បន្ទាប់ពីសហព័ន្ធកីឡាបាល់ទាត់កម្ពុជាបានចែកផ្លូវគ្នាជាមួយគ្រូបង្គោល លោក Felix Dalmas។

លោកបានដឹកនាំក្រុមជម្រើសជាតិកម្ពុជាប្រកួតមិត្តភាពអន្តរជាតិ ឈ្នះ ឆាយនីសតៃប៊ិ ដោយលទ្ធផល ៣-២ កាលពីថ្ងៃទី១១ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក។ បន្ទាប់ពីមក កម្ពុជា បានចាញ់ ហុងកុង ដោយលទ្ធផល ០-៣ ក្នុងការប្រកួតមិត្តភាពនៅតឹកដីហុងកុង នៅថ្ងៃទី១៥ ខែតុលា ឆ្នាំ២០២៤ ព្រមទាំងចាញ់ កាតារ ១-២ នៅទឹកដីកាតារ ក្នុងមិត្តភាពបិទទ្វារ ថ្ងៃទី១៦ ខែវិច្ឆិកា ឆ្នាំ២០២៤។

លោកបានបន្តដឹកនាំក្រុមជម្រើសជាតិកម្ពុជាក្នុងពានរង្វាន់ផ្លូវការ ASEAN Championship ចំនួន៤ប្រកួតគឺឈ្នះ ទីម័រខាងកើត ២-១, ស្មើ ម៉ាឡេស៊ី ២-២, ចាញ់ សិង្ហបុរី ១-២ និងចាញ់ថៃ ២-៣ កាលពីចុងឆ្នាំ២០២៤។

លោក Koji Gyotoku បានចូលមកធ្វើការផ្នែកបាល់ទាត់នៅប្រទេសកម្ពុជាតាំងពីឆ្នាំ២០១៩ដោយបានដឹកនាំតែក្រុមយុវជនប៉ុណ្ណោះគឺគិតចាប់ពីកម្រិតអាយុ១៥ឆ្នាំ ដល់២៣ឆ្នាំ។

សម្រាប់ការដឹកនាំកម្រិតយុវជន លោក Gyotoku បានបង្កើតកំណត់ល្អៗជាច្រើន ដូចជាជួយក្រុម U20 កម្ពុជាបានឡើងទៅជុំចុងក្រោយ ក្នុងពានរង្វាន់យុវជនអាស៊ីអាយុ២០ឆ្នាំ (AFC U20 Asian Cup) កាលពីឆ្នាំ២០២០។ ខែមិថុនា ឆ្នាំ២០២៤ លោកបានដឹកនាំក្រុម U16 កម្ពុជាមិនចាញ់សោះក្នុងការប្រកួតសន្សំពិន្ទុក្នុងពូលពានរង្វាន់ AFF U16 Championship នៅប្រទេសឥណ្ឌូណេស៊ី ព្រមទាំងបានដឹកនាំក្រុម U20 កម្ពុជាប្រកួតជម្រុះ AFC U20 Asian Cup នៅឆាយនីសតៃប៊ិ។

លោកជាគ្រូបង្វឹកម្នាក់ដែលបានដឹកនាំយុវជនកម្ពុជាឲ្យស្គាល់ជ័យជម្នះលើក្រុមខ្លាំងៗដូចជា ថៃ វៀតណាម បារ៉ែន និងស្មើជាមួយចិនជាដើម៕