Nick Taylor ថា រ៉ាប៊ី​ ជាភរិយា​ដ៏​អស្ចារ្យ​ ឃើញថ្ងៃ​ដំបូង​ចង់​រៀប​ការតែ​ម្តង

ខ្សែបម្រើការពារ Nick Taylor របស់ក្លិបព្រះខ័នរាជស្វាយរៀង បានរៀបការជាមួយតារាចម្រៀង​ រ៉ាប៊ី កាលពីថ្ងៃទី៩ ខែឧសភា ឆ្នាំ២០២៥ បន្ទាប់ពីមកប្រកបអាជីពបាល់ទាត់នៅកម្ពុជារយៈពេល២រដូវកាល។

Nick Taylor ត្រូវបានអ្នកគាំទ្រមើលឃើញពីជោគជ័យទាំងអាជីពបាល់ទាត់ និងការងារក្រៅទីលាន ក្នុងនោះការទទួលបានឱកាសថតផ្សាយពាណិជ្ជកម្ម និងជីវិតស្នេហា។ ក្នុងបទសម្ភាសជាមួយសារព័ត៌មាន«កម្ពុជាថ្មី» កាលពីយប់ថ្ងៃទី១៨ ខែឧសភា ឆ្នាំ២០២៥ កីឡាករបានប្រាប់ថា ជីវិតរបស់ខ្លួននៅកម្ពុជារយៈពេលពីរឆ្នាំពិតជាវិសេសវិសាលខ្លាំងណាស់ ហើយពិតជាមានសំណាងដែលព្រះជាម្ចាស់ប្រទានពរជ័យដល់ជីវិតរបស់ខ្លួនដ៏អស្ចារ្យមួយនេះ។

Nict Laylor បាននិយាយថា ៖«ជីវិតរបស់ខ្ញុំពិតជាពិសេសខ្លាំងណាស់ ហើយអរគុណព្រះជាម្ចាស់សម្រាប់ជីវិតមួយនេះ។ ព្រះជាម្ចាស់ប្រទានពរខ្ញុំ ជាពិសេសខ្ញុំបានជួបភរិយាដ៏អស្ចារ្យ។ គាត់ជាស្ត្រីដ៏ល្អឥតខ្ចោះ ហើយខ្ញុំដឹងខ្លួន​តាំងពីថ្ងៃជួបគាត់ដំបូងម្ល៉េះ គឺខ្ញុំនឹងរៀបការជាមួយគាត់»។

កីឡាករបន្តថា ៖«បាល់ទាត់ក៏ជោគជ័យ​ដែរ។ ខ្ញុំពិតជាមនុស្សមានសំណាង ហើយខ្ញុំ​សូម​អរគុណដល់អ្នកគាំទ្រទាំងអស់គ្នា។ អរគុណសម្រាប់ការគាំទ្រខ្ញុំ អរគុណសម្រាប់ការគាំទ្រព្រះខ័នរាជស្វាយរៀង អរគុណសម្រាប់ការគាំទ្រភរិយាខ្ញុំ អរគុណសម្រាប់ការគាំទ្រ​កីឡា​បាល់ទាត់កម្ពុជា»។

«ខ្ញុំមិនអាចរកពាក្យអ្វីមកនិយាយអរគុណឲ្យគ្រប់គ្រាន់សម្រាប់អ្នកគាំទ្រទេ អរគុណខ្លាំងណាស់។ នៅកម្ពុជាពិតជាមានអ្នកគាំទ្របាល់ទាត់កម្ពុជាច្រើន​មែន​ទែន។ ការគាំទ្រកាន់តែច្រើនដល់ក្លិប គឺជា​រឿងសំខាន់បំផុតសម្រាប់បាល់ទាត់។ ក្រុមជម្រើសជាតិ ពួកគេចូលរួមគ្នា នៅពេលណាមួយក្នុងឆ្នាំនេះ អ្នកដឹងទេនៅក្លិប ពួកយើងខិតខំហ្វឹកហាត់ខ្លាំង​ និងប្រកួតជារៀងរាល់ចុងសប្តាហ៍»។

Nick Taylor ដែល​មាន​ដើម​កំណើត​នៅ​សហរដ្ឋ​អាមេរិក​ត្រូវ​បាន​កោះ​ហៅ​ចូល​ជម្រើស​ជាតិ​កម្ពុជា​កាល​ពី​ចុង​ឆ្នាំ​២០២៣ និង​បាន​ចូល​រួម​ជា​មួយ​ក្លិប​ ព្រះ​ខ័ន​រាជ​ស្វាយរៀង ដែល​ជា​កន្លែង​រូប​គេ​បាន​ឈ្នះ​ជើង​ឯក​លីគ​កំពូល​កម្ពុជា​២​លើក​គឺ​ឆ្នាំ​២០២៣-២៤ និង​២០២៤-២៥ ឈ្នះ​ពាន​សម្តេច​តេជោ ហ៊ុន សែន ឆ្នាំ​២០២៣-២៤ និង​ឈាន​ដល់​វគ្គ​ផ្តាច់​ព្រ័ត្រពាន​ដដែល​នេះ​ ឆ្នាំ​២០២៤-២៥ ឈ្នះ​ពាន​ខេមបូឌានស៊ុបភើខាប់ ឆ្នាំ​២០២៤ និង​ជើង​ឯក​រង​ពាន​អាស៊ី AFC Challenge League ២០២៤-២៥៕

អត្ថបទ៖ វីរបុត្រ