មុន​ពេល​ចាកចេញ លោក Munoz ចាត់​ទុកក្លិប ព្រះខ័នរាជស្វាយរៀង ជា​កន្លែង​ដ៏​ត្រឹម​ត្រូវក្នុង​អាជីព​

លោក Pep Munoz បានចាត់ទុកក្លិបព្រះខ័នរាជស្វាយរៀង ជាកន្លែងដ៏ត្រឹមត្រូវសម្រាប់អាជីពរបស់លោក បន្ទាប់ពីលោកមកដល់ទីនេះថ្ងៃដំបូង។

បុរសសញ្ជាតិ អេស្ប៉ាញ វ័យ ៤៥ ឆ្នាំ ត្រូវបានប្រកាសចាកចេញពីព្រះខ័នរាជស្វាយរៀងផ្លូវការហើយ បន្ទាប់ពីលោកដឹកនាំក្រុមបានរយៈពេល ២ រដូវកាល គឺរដូវកាល ២០២៣-២០២៤ និង ២០២៤-២០២៥។

នៅក្នុងកិច្ចសម្ភាសជាមួយក្លិប ដែលបានបង្ហោះនៅលើទំព័រ Facebook កាលពីព្រឹកមិញថ្ងៃទី ៣១ ខែ ឧសភា ឆ្នាំ ២០២៥ លោក Pep Munoz បានមានប្រសាសន៍យ៉ាងដូច្នេះថា ៖«បើតាមខ្ញុំចាំ នៅថ្ងៃទីមួយ ដែលខ្ញុំមកកាន់ទីនេះ ខ្ញុំគិតថា ខ្ញុំបានរកឃើញកន្លែងដែលត្រឹមត្រូវហើយ។ កីឡដ្ឋានពិតជាស្រស់ស្អាត អារម្មណ៍ខ្ញុំនៅពេលនោះគឺថា ពួកយើងគួរចាប់ផ្តើមធ្វើអ្វីមួយ។ បង្កើតអ្វីមួយ ដែលអស្ចារ្យសម្រាប់ក្លិបមួយនេះ។ នេះជាអារម្មណ៍ខ្ញុំមកកាន់ទីនេះដំបូង»។

លោក Munoz បានចាត់ទុកក្លិប ព្រះខ័នរាជស្វាយរៀង ជាកន្លែងដ៏ត្រឹមត្រូវសម្រាប់លោកអាជីពរបស់លោក គ្រាន់តែលោកមកដល់ទីនេះថ្ងៃដំបូង។ យ៉ាងណា លោកពិតជាទទួលបានភាពជោគជ័យពិតមែន បន្ទាប់ពីមកដល់ទីនេះ ២ រដូវកាល លោកបានជួយឱ្យក្រុមរហស្សនាម ព្រះខ័នខៀវ ឈ្នះពានលីគកំពូលកម្ពុជា Cambodian Premier League ២ សម័យកាល, ពាន Cambodian Super Cup ១ និងពានសម្តេច​អគ្គមហាសេនាបតី​​តេជោ ហ៊ុន សែន ១ ព្រម​ទាំង​ជើង​ឯក​រង AFC Challenge League៕

អត្ថបទ៖ សេម កុសល