ព្រះខ័នរាជស្វាយរៀង កំពុងស្នើ AFC យក​កីឡដ្ឋាន​ ស្វាយរៀង ធ្វើជាម្ចាស់ផ្ទះពានអន្តរជាតិ

លោក Christopher Grant អ្នកចាត់ការទូទៅរបស់ក្លិបព្រះខ័នរាជស្វាយរៀង បានបង្ហើបអំពីផែនការរបស់ក្លិប ក្នុងការយកកីឡដ្ឋាន ស្វាយរៀង ដែលបច្ចុប្បន្នកំពុងកែប្រែ និងសាងសង់បន្ថែមកន្លែងអង្គុយ ធ្វើជាម្ចាស់ផ្ទះពានអន្តរជាតិ នៅពេលអនាគត។

តាមការបញ្ជាក់របស់បុរសសញ្ជាតិ ស្កុតលែនដ៍ វ័យ ៣៨ ឆ្នាំ គឺកីឡដ្ឋាន ស្វាយរៀង នៅពេលបន្ថែមកន្លែងអង្គុយរួចរាល់ នឹងអាចបង្កើនកន្លែងអង្គុយសម្រាប់អ្នកទស្សនាបានចន្លោះពី ៧,០០០ ទៅ ៨,០០០ នាក់។ ជាមួយគ្នានេះ លោកក៏បានប្រាប់ផងដែរ ថា ក្លិបកំពុងតែស្នើទៅសហព័ន្ធបាល់ទាត់ អាស៊ី (AFC) ដើម្បីយកកីឡដ្ឋាននេះ ធ្វើជាម្ចាស់ផ្ទះពានអន្តរជាតិ AFC និង The ASEAN Club Championship – Shopee Cup។

ថ្លែងនៅក្នុងសន្និសីទកាសែតអំពីការប្រកាសគ្រូបង្វឹកថ្មីរបស់ព្រះខ័នរាជស្វាយរៀង កាលពីថ្ងៃ អង្គារ៍ ទី ៤ ខែ មិថុនា ម្សិលមិញ លោក Christopher បានមានប្រសាសន៍ថា៖ «ហេដ្ឋារចនាសម្ព័ន្ធថ្មីរបស់យើង ដូចដែលបានឃើញនៅលើបណ្តាញសង្គម យើងបានសង់បន្ថែម។ នៅកីឡដ្ឋានខេត្តស្វាយរៀងនេះ យើងនឹងត្រូវចំណាយពេលរយៈពេល ១ ឆ្នាំក្នុងការសាងសង់។ កីឡដ្ឋាននេះនឹងអាចផ្ទុកអ្នកទស្សនាបានដល់ពី ៧,០០០ ទៅ ៨,០០០ នាក់។ យើងក៏កំពុងធ្វើការជាមួយ AFC អំពីកីឡដ្ឋាននេះដូចគ្នា ថាតើកីឡដ្ឋានរបស់យើងអាចចូលរួមរៀបចំការប្រកួតពានអន្តរជាតិ AFC ឬ Shopee Cup បានដែរឬទេ»។

កីឡដ្ឋាន ស្វាយរៀង ដែលកំពុងសាងសង់បន្ថែមនេះ នឹងត្រូវប្រើរយៈពេល ១ ឆ្នាំ។ ដូច្នេះ​រដូវកាល ២០២៥-២០២៦ នេះ ព្រះខ័នរាជស្វាយរៀង ទំនងជាមិនទាន់អាចប្រើប្រាស់កីឡដ្ឋាននេះធ្វើជាម្ចាស់ផ្ទះបានទេទាំងការប្រកួតលីគ ពានសម្តេចតេជោ ហ៊ុន សែន និងពានផ្សេងៗទៀត។ ទោះបីជាយ៉ាងណា លោក Christopher បានបញ្ជាក់រួចហើយថា ក្លិបគ្រោងនឹងយក ពហុកីឡដ្ឋានជាតិមរតកតេជោ ធ្វើជាម្ចាស់ផ្ទះបណ្តោះអាសន្ន ប្រសិនបើកីឡដ្ឋាន ស្វាយរៀង ធ្វើមិនទាន់រួចរាល់។

ទាក់ទងនឹងរឿងនេះ បុរសសញ្ជាតិ ស្កុតលែនដ៍ បានបន្ថែមថា៖ «យើងនៅរង់ចាំមើលការវិវត្តនៃការសាងសង់កីឡដ្ឋានរបស់យើងនៅខេត្តស្វាយរៀង ប៉ុន្តែបច្ចុប្បន្នយើងបានជ្រើសរើសកីឡដ្ឋានខេត្តស្វាយរៀង គឺជាទីលានសម្រាប់ធ្វើជាម្ចាស់ផ្ទះដដែល។ ប្រសិនបើការសាងសង់នៅមិនទាន់ហើយ ឬមានការប្រែប្រួលយ៉ាងម៉េច យើងនឹងជ្រើសរើសយកពហុកីឡដ្ឋានជាតិមរតកតេជោធ្វើជាម្ចាស់ផ្ទះ»៕

អត្ថបទ៖ សេម កុសល