កីឡា

ថ្ងៃនេះ ជប៉ុន ប៉ះ ចិន ក្នុងព្រឹត្តិការណ៍ជើងឯកបាល់ទះពិភពលោក

បានផុស

២ ម៉ោង មុន

នៅ

ថ្ងៃពុធ ១១ មិថុនា ២០២៥

ដោយ

ព្រឹត្តិការណ៍បាល់ទះពិភពលោក FIVB Men’s Volleyball Nations League ឆ្នាំ២០២៥ នឹងចាប់ផ្តើមបើកទំព័រថ្មីនៅថ្ងៃទី១១ ខែមិថុនានេះដោយមានក្រុមបាល់ទះជម្រើសជាតិខ្លាំងលំដាប់កំពូលទាំង១៨ចូលរួមប្រកួត ដែលមានប្រទេសចំនួន៩ធ្វើម្ចាស់ផ្ទះតាមពូលទាំង៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនៅថ្ងៃទី១១ ខែមិថុនា ចាប់ផ្តើមពីម៉ោងខុសៗគ្នាទៅតាមតំបន់អឺរ៉ុប និងអាស៊ី ក្នុងនោះមានការប្រកួតទាំង៩គូតែម្តង។

មកចាប់អារម្មណ៍ពីក្រុមបាល់ទះជម្រើសជាតិជប៉ុន កាលពីសប្តាហ៍មុន ក្រុមនារីជប៉ុនធ្វើបានល្អណាស់ ដោយឆ្លងកាត់៤ប្រកួត ក្នុងសប្តាហ៍ទី១ គឺឈ្នះទាំងអស់ ដោយឈរលើកំពូលតារាងតែម្តងក្នុងពានរង្វាន់បាល់ទះពិភពលោកផ្នែកនារី Women’s Volleyball Nations League។ នៅសប្តាហ៍ក្រោយទើបដំណើរការប្រកួតសប្តាហ៍ទី២ផ្នែកនារី។

ឥឡូវនេះដល់ផ្នែកបុរសវិញម្តង ក្រុមបុរសជប៉ុនបានខកចិត្តយ៉ាងខ្លាំងក្នុងព្រឹត្តិការណ៍កីឡាអូឡាំពិក កាលពីឆ្នាំ ២០២៤ នៅប្រទេសបារាំង ក្រោមថ្វីដៃរបស់ជម្រើសជាតិ អ៉ីតាលី។ បន្ទាប់ពីឆ្លងផុតវគ្គសន្សំពិន្ទុក្នុងពូល ជប៉ុន ប៉ះ អ៉ីតាលី នៅវគ្គ៨ក្រុមចុងក្រោយ។ ពួកគេធ្វើបានយ៉ាងល្អនៅពីរសិតដំបូង គឺឈ្នះ ២៥-២០, ២៥-២៣ ហើយសិតទី៣នាំ មុខដោយពិន្ទុ២៤ ទល់២០ ដែលត្រូវការតែ១ពិន្ទុទៀតប៉ុណ្ណោះដើម្បីទទួលបានជ័យជម្នះ ប៉ុន្តែ១ពិន្ទុចុងក្រោយរកមិនបានសោះ រហូតត្រូវ អ៉ីតាលី វាយបកយកឈ្នះដោយពិន្ទុ ២៧-២៥ ហើយយកឈ្នះ២សិតចុងក្រោយទៀតគឺ ២៦-២៤ និង ១៧-១៥ ដែលធ្វើឲ្យជប៉ុន ខកចិត្តយ៉ាងខ្លាំងបំផុត។

ឥឡូវនេះ ដល់ពេលដែល ក្រុមបុរសជប៉ុន ស្វែងរកលទ្ធផលល្អមកវិញដើម្បីផ្តល់កម្លាំងចិត្តដល់ក្រុមក្នុងព្រឹត្តិការណ៍ពិភពលោក។ ពួកគេត្រូវប៉ះក្រុមអាស៊ីដូចគ្នា គឺ ម្ចាស់ផ្ទះ ចិន នៅវេលាម៉ោង៤រសៀលនេះ។ នៅថ្ងៃស្អែកទី១២ ជប៉ុន បន្តប៉ះ ប៉ូឡូញ, ថ្ងៃទី១៣ ប៉ះ ស៊ែប៊ី និងថ្ងៃទី១៥ ប៉ះ ហូឡង់ សម្រាប់ការប្រកួតសប្តាហ៍ទី១។