លោក McConkey ថា យប់មិញព្រះខ័នរាជស្វាយរៀង គួរឈ្នះ វិសាខា ៦-០ មិនមែនត្រឹម ២-០ ទេ

គ្រូបង្គោលរបស់ក្រុមព្រះខ័នរាជស្វាយរៀង លោក Matthew McConkey ជឿជាក់ អំពីការប្រកួតទល់នឹង វិសាខា ម្សិលមិញ គួរតែឈ្នះក្នុងលទ្ធផល ៦-០ ពោលគឺមិនមែនឈ្នះត្រឹមលទ្ធផល ២-០ នោះទេ។

ក្រុម ព្រះខ័នរាជស្វាយរៀង នៅតែបន្តធ្វើបានល្អ សម្រាប់ការប្រកួតនៅក្នុងលីគកំពូលកម្ពុជា Cambodian Premier League ដោយការប្រកួតសប្តាហ៍ទី ៤ កាលពីយប់ថ្ងៃ អាទិត្យ ទី ១៤ ខែ កញ្ញា ឆ្នាំ ២០២៥ ម្សិលមិញ ក្រុមរបស់លោក McConkey បានយកឈ្នះលើក្រុម វិសាខា នៅកីឡដ្ឋាន ព្រីនស៍ ក្នុងលទ្ធផល ២ ទល់នឹង ០។

ក្រោយការប្រកួតនោះបញ្ចប់ លោក McConkey បានមានប្រសាសន៍ ថា៖ «អំឡុងពេលប៉ុន្មានថ្ងៃ ដែលយើងហ្វឹកហាត់ត្រៀម ការប្រកួតជាមួយ វិសាខា គឺយកមកទីនេះ ធ្វើយ៉ាងម៉េចត្រូវតែគ្រប់គ្រងការប្រកួត។ យើងអាចធ្វើបាន។ យើងមានឱកាសច្រើនក្នុងការស៊ុតបញ្ចូលទី។ ប្រសិនបើយើងមើលលើលទ្ធផល ២-០ ប៉ុន្តែគិតទៅ យើងគួរតែឈ្នះក្នុងលទ្ធផល ៦-០»។

គ្រូបង្វឹកសញ្ជាតិ អៀរឡង់ វ័យ ៣២ ឆ្នាំបានមានប្រសាសន៍បន្ត ថា៖ «នៅពេលដែលយើងបាត់បាល់វិញ គឺក្រុមរបស់យើងធ្វើការខ្លាំង និងធ្វើការបានល្អមែនទែន។ យើងអត់ទុកពេលឱ្យពួកគេ មានឱកាសលេងនោះទេ។ យើងឃើញ វិសាខា មានឱកាសប៉ុន្មានលើក គឺដោយសារពួកយើងបង្កើតកំហុស ប៉ុន្តែបើយើងមើលលម្អិតអំពីការប្រកួត គឺយើងពិតជាធ្វើបានល្អសម្រាប់ការប្រកួតនេះ…»។

លោក Conkey បានបង្ហាញការកោតសរសើរលើកូនក្រុមរបស់លោក ដែលធ្វើបានល្អ ក្នុងការប្រកួតទល់នឹង វិសាខា កាលពីម្សិលមិញ។ យ៉ាងណា លោកយល់ ថា ព្រះខ័នរាជស្វាយរៀង គួរតែឈ្នះដល់ ៦-០ ពោលគឺមិនមែន ២-០ ទេ។ នេះបើផ្អែកតាមការលេង និងឱកាសផ្សេងៗ ដែលក្រុមរបស់លោកមានក្នុងការប្រកួត។

គួរឱ្យដឹងថា គិតត្រឹមការប្រកួតសប្តាហ៍ទី ៤ ក្នុងលីគកំពូល កម្ពុជា នៅរដូវកាល ២០២៥-២០២៦ នេះ គឺពុំទាន់មានក្រុមណាមួយអាចស៊ុតបញ្ចូលទីលើ ព្រះខ័នរាជស្វាយរៀង បាននៅឡើយទេ។ ក្នុងនោះឆ្លងកាត់ការប្រកួត ៤ ប្រកួត គឺពួកគេឈ្នះទាំង ៤ ប្រកួត និងកំពុងកាន់កាប់តំណែងកំពូលតារាងក្នុងលីគកំពូល កម្ពុជា៕

អត្ថបទ៖ សេម កុសល