ប្រយ័ត្ន! AirTag ប្រើរកវត្ថុដែលបាត់ អាចមានជនខិលខូចប្រើតាមដានអ្នកបានដែរ

ឧបករណ៍ AirTag របស់ក្រុមហ៊ុន Apple ដែលប្ជារើជំនួយដើម្បីរកវត្ថុដែលបាត់ទៅ ក៏អាចមានហានិភ័យដែរ ព្រោះជាឱកាសសម្រាប់ជនកំហូចមួយចំនួនប្រើតាមដានសកម្មភាពរបស់អ្នកក្នុងបំណងមិនល្អ។

កាលពីពេលថ្មីៗនេះក្រុមហ៊ុន Apple បានប្រកាសដាក់ឱ្យប្រើប្រាស់ឧបករណ៍ AirTag សម្រាប់ស្វែងរកវត្ថុដែលអ្នកងាយនឹងបាត់ឬភ្លេចមានដូចជា កូនសោរ និងកាបូបជាដើម។

ត្បិតតែឧបករណ៍នេះមានប្រយោជន៍ ប៉ុន្តែក្រុមអ្នកស្រាវជ្រាវជាច្រើនបានបង្ហាញពីការព្រួយបារម្ភ ព្រោះជនខិលខូចក៏អាចប្រើវាដើម្បីតាមដានជនណាម្នាក់បានផងដែរ។

ដើម្បីចៀសវាងកុំឱ្យជនខិលខូចប្រើឧបករណ៍ AirTag ដើម្បីតាមដានជនណាម្នាក់នោះក្រុមហ៊ុន Apple បានបង្កប់ជាមួយនឹងមុខងារមួយចំនួនមានដូចជា ការបញ្ចេញសំឡេងនៅពេលដែលឧបករណ៍ AirTag មិននៅជិតជាមួយនឹងទូរសព្ទដែលត្រូវបានកំណត់អស់រយៈពេល ៣ថ្ងៃ ឬប្រសិនបើអ្នកប្រើទូរសព្ទ iPhone វិញនោះ អ្នកនឹងទទួលបានស្រ្គីនក្រើនរំឭក ប្រសិនបើមានឧបករណ៍ AirTag ដែលនៅជិត ហើយវាមិនមែនជារបស់អ្នក។

ប៉ុន្តែទោះបីជាក្រុមហ៊ុន Apple មានការប្រុងប្រយ័ត្នជាងក្រុមហ៊ុនដទៃទៀតទាក់ទងនឹងការការពារកុំឱ្យមានការប្រើប្រាស់ឧបករណ៍នេះសម្រាប់ការតាមដាននោះក្ដី ក៏ជនខិលខូចអាចប្រើឧបករណ៍នេះសម្រាប់ធ្វើការតាមដានបានយ៉ាងងាយស្រួលផងដែរ។

ជាឧទាហរណ៍ ឧបករណ៍ AirTag នឹងបញ្ចេញសំឡេងបន្ទាប់ពីរយៈពេលបីថ្ងៃដែលវាមិននៅជិតទូរសព្ទដែលត្រូវបានកំណត់ ដូច្នេះជនខិលខូចអាចតាមដានអ្នកបានដល់ទៅ ៣ថ្ងៃមុននឹងលោកអ្នកមានការចាប់អារម្មណ៍នោះ។ ជាងនេះទៅទៀត ប្រសិនបើជនខិលខូចគឺជាអ្នកធ្វើការ ឬជាអ្នករស់នៅជាមួយអ្នកផងនោះ ឧបករណ៍នេះនឹងមិនបញ្ចេញសំឡេងអ្វីទាំងអស់ ដោយសារតែជនខិលខូចមានឱកាសច្រើនដើម្បីឱ្យទូរសព្ទរបស់គេអាចនៅជិតឧបករណ៍នេះបាន៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា