សមត្ថកិច្ចឃាត់តៃកុងរថយន្តកុងតឺន័រ​សណ្ដោងរ៉ឺម៉កយកទៅប៉ុស្តិ៍​ បន្ទាប់បើកបុករថយន្ត​ATon​គាបជាប់ផ្ទះពលរដ្ឋ

បុរសម្នាក់ត្រូវបានសមត្ថកិច្ចឃាត់ខ្លួនបន្ទាប់ពីបើករថយន្តហ៊ីយ៉ាន់ដាយសណ្ដោងរ៉ឺម៉កមួយគ្រឿង រេចង្កូតឡើងខឿនផ្លូវជ្រុលទៅបុករថយន្តATon ដែលចតនៅចិញ្ចើមផ្លូវ និងរុញទៅគាបជាប់ផ្ទះប្រជាពលរដ្ឋបណ្ដាល ឱ្យ​រងការខូចខាតយ៉ាងដំណំ ដែលហេតុការណ៍នេះបានកើតឡើងកាលពីវេលាម៉ោង១១៖៤០​នាទីយប់ ថ្ងៃទី ២៣ ខែកក្កដា ឆ្នាំ២០២១ នៅចំណុចមុខវត្តនិរោធ តាមបណ្ដោយផ្លូវជាតិលេខ១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរសម្នាក់បើករថយន្តម៉ាក ហ៊ីយ៉ាន់ដាយ សណ្ដោងរ៉ឺម៉ក បើកតាមបណ្ដោយផ្លូវជាតិលេខ១ ក្នុងទិសដៅពីកើតទៅលិចក្នុងល្បឿន​លឿន ខណៈមកដល់ចំណុចកើតហេតុក៏រេចង្កូតមកស្ដាំដៃឡើងខឿនទៅបុករថយន្តម៉ាក ATon ពណ៌ក្រហម ដែលចតនៅចិញ្ចើមផ្លូវរុញទៅផ្ទប់គាបជាប់ទ្វារផ្ទះប្រជាពលរដ្ឋ បណ្ដាលឱ្យរងការខូចខាតយ៉ាងដំណំសំ​ណាង​​ល្អមិនបណ្ដាលឲ្យមនុស្សណាម្នាក់រងរបួសនោះទេ។

ក្រោយកើតហេតុ សមត្ថកិច្ចមូលដ្ឋានបានចុះមកដល់ ហើយឲ្យតៃកុងរថយន្តបង្កបើករថយន្តថយក្រោយបន្តិច រួចធ្វើការវាស់វែង និងនាំតៃកុង រថយន្តបង្ក ព្រមទាំងម្ចាស់ផ្ទះរងគ្រោះទៅដោះស្រាយគ្នានៅអធិការដ្ឋាននគរបាលខណ្ឌច្បារអំពៅ តាមនីតិវិធី៕

ដោយៈ ឧត្តរ៉ា