រថយន្ដបែនដឹកដីបុក និងកិនសិស្សសាលា២នាក់ស្លាប់ភ្លាមៗនៅកន្លែងកើតហេតុ

យុវជនជាសិស្សសាលា២នាក់ បានស្លាប់ភ្លាមៗយ៉ាងអណោចអធម៍ដោយសាររថយន្ដបែនដឹកដីបើកបុកពីក្រោយ និងកិនអូសប្រហែល៥០ម៉ែត្រ ចំណែកម៉ូតូកល់ជាប់ក្រោមរថយន្ដ។

ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោង១រសៀល ថ្ងៃទី៤ ខែសីហា ឆ្នាំ២០២២ នៅតាមបណ្ដោយផ្លូវជាតិលេខ២ សង្កាត់ព្រែកកំពិស ខណ្ឌដង្កោ រាជធានីភ្នំពេញ។

ប្រភពពីកន្លែងកើតហេតុបានឲ្យដឹងថា ជនរងគ្រោះជាសិស្សសាលា២នាក់ បានជិះម៉ូតូឌុបគ្នាដើម្បីទៅសាលារៀន ហើយពេលមកដល់ទីតាំងកើតហេតុក៏ត្រូវរថយន្ដបែនដឹកដីបើកបុកពីក្រោយ និងកិនអូសប្រហែល៥០ម៉ែត្រ បណ្ដាលឲ្យសិស្សសាលាទាំង២នាក់បែកក្បាលធ្លាយខួរស្លាប់ភ្លាមៗតែម្ដង។

សពជនរងគ្រោះត្រូវបានកម្លាំងសមត្ថកិច្ចទំនាក់ទំនងសាច់ញាតិដើម្បីយកទៅធ្វើបុណ្យតាមប្រពៃណី រីឯរថយន្ដបង្កនិងម៉ូតូ សមត្ថកិច្ចធ្វើការវាស់វែងយកទៅក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយតាមផ្លូវច្បាប់៕