ផឹកស៊ីមិនឲ្យលុយ ថែមទាំងបើករថយន្ដបំបុកម៉ូតូច្រើនគ្រឿងនៅមុខហាង រួចគេចខ្លួនបាត់

យ៉ាងហោចណាស់ក៏មានម៉ូតូចំនួន៥គ្រឿងរងការខូចខាត និងមនុស្សម្នាក់ត្រូវបានបញ្ជូនទៅមន្ទីរពេទ្យ ខណ:ដែលមានរថយន្តមួយគ្រឿង ដែលម្ចាស់វាចេញពីកន្លែងផឹកសុីមានទំនាស់គ្នាផង និងមិនបានចាយលុយក្នុងការផឹកសុីផង បានបើករថយន្ដបំបុកម៉ូតូទាំងអស់នោះហើយបើករត់គេចតែម្តង ។

ករណីគ្រោះថ្នាក់ចរាចរណ៍ដោយចេតនានេះបានកើតឡើងនៅថ្ងៃទី១៩ ខែកញ្ញា ឆ្នាំ២០២២ វេលាម៉ោង២ រំលងអាធ្រាត្រ ដែលបង្កឡេីងដោយរថយន្តម៉ាកTundra មួយគ្រឿង ពាក់ស្លាកលេខ ភ្នំពេញ 2AK-4260 បានបុករះម៉ូតូជាច្រើនគ្រឿងនៅផ្លូវមាត់ស្ទឹងសង្កែ ចុងស្ពានថ្មថ្មីត្រើយខាងកើត ខាងមុខហាងលក់ស្រាក្រឡុក ក្នុងភូមិរំចេក៤ សង្កាត់រតន: ក្រុងបាត់ដំបង ខេត្តបាត់ដំបង ។

បើតាមការអះអាងពីម្ចាស់ហាងបានបញ្ជាក់ថា ម្ចាស់រថយន្តខាងលើ បានចូលទៅផឹកស៊ីនៅកន្លែងគាត់ ហើយមិនបានអោយលុយ មុនចាកចេញគាត់ក៏បានទាលុយ តែម្ចាស់ឡានក៏បេីកឡានបំបុកម៉ូតូដែលចតនៅមុខគាត់ រួចបេីករត់គេចភ្លាមៗតែម្តង បណ្តាលអោយខូចខាតម៉ូតូជាច្រេីនគ្រឿង និងមនុស្សម្នាក់ទៀតរងរបួសធ្ងន់ផងដែរ ។

ក្រោយពេលកើតហេតុ មន្ត្រីជំនាញបានចុះមកវាស់វែងរួចក៏យកវត្ថុតាងទៅរក្សាទុកនៅការិយាល័យចរាចរណ៍ផ្លូវ​គោក រីឯជនរងគ្រោះម្នាក់ក៏ត្រូវបានបញ្ជូនទៅមន្ទីរពេទ្យភ្លាមៗផងដែរ។

លោក ចាន់ សុធី នាយការិយាល័យចរាចរផ្លូវគោក បានបញ្ជាក់ប្រាប់ កម្ពុជាថ្មី នៅព្រឹកថ្ងៃទី១៩ កញ្ញា នេះថា លោកកំពុងដាក់កម្លាំងស្រាវជ្រាវទៅតាមស្លាកលេខរថយន្តនោះហើយ ដើម្បីកោះហៅអ្នកបើកបរអោយចូលខ្លួនមកសាកសួរ ដោយឡែកសម្រាប់ម៉ូតូសរុបចំនួន៥គ្រឿង ដែលរងការខូចខាត គឺកម្លាំងរបស់លោកនាំយកមកកាន់ការិយាល័យ​តែ២​គ្រឿងប៉ុណ្ណោះ ដែលខូចខាតធ្ងន់ធ្ងរ ចំណែកជនរងគ្រោះកំពុងព្យាបាយនៅមន្ទីរពេទ្យ ៕

អត្ថបទ៖ សោ និយមរ័ត្ន