យុវជនចំនួន៣នាក់បានស្លាប់ភ្លាមៗយ៉ាងអាណោចអាធម៌នៅកន្លែងកើតហេតុ ខណៈជិះម៉ូតូមួយគ្រឿងឌុបគ្នាជ្រុលទៅបុកពីក្រោយរថយន្តកែច្នៃមួយគ្រឿងខូចទុកចោលនៅលើផ្លូវសម្តេចសង្ឃ ត្រង់ចំណុចផ្លូវបំបែកឡើងទៅផ្លូវល្បឿនលឿន។

ករណីគ្រោះថ្នាក់ចរាចរណ៍នេះ បានកើតមានឡើងនៅម៉ោង៨និង២០នាទីយប់ថ្ងៃទី១៩ ខែកុម្ភៈ ឆ្នាំ២០២៣ ស្ថិតនៅលើផ្លូវសម្តេចសង្ឃទេពវង្ស(ផ្លូវលេខ១៤៦B)ក្នុង ចន្លោះគីឡូម៉ែត្រលេខ២១-២២ ស្ថិតនៅភូមិ១ ឃុំទំនប់រលក ស្រុកស្ទឹងហាវ​ ខេត្តព្រះសីហនុ។

សមត្ថកិច្ចមូលដ្ឋានបានប្រាប់ថា គ្រោះថ្នាក់ចរាចរណ៍នេះបង្កឡើងដោយសាររថយន្តកែច្នៃដឹកកំណាត់ឈើមូល១គ្រឿងបានខូចទុកចេាលនៅលើផ្លូវ មិនមានដាក់ស្លាកសញ្ញាឬភ្លើងបំភ្លឺពេលយប់ គាប់ជួនម៉ូតូ ម៉ាកC125 ផលិតនៅឆ្នាំ២០២០ ពណ៍ក្រហម ផ្លាកលេខ កំពត 1M 4958 ជិះឌុបគ្នាចំនួន៣នាក់ បានបុកពីក្រេាយយ៉ាងពេញទំហឹង បណ្តាលអេាយ ភាគីខាងម៉ូតូ ស្លាប់ទាំង៣នាក់នៅកន្លែងកើតហេតុ។

សមត្ថកិច្ចបានឲ្យដឹងថា សពជនរងគ្រោះមានឈ្មោះ១ ឈ្មោះ ស្រៀង ហួយហ័រ ភេទប្រុស អាយុ១៧ឆ្នាំ មុខរបរសិស្ស មានទីទំនៅភូមិ០៣ ឃុំអូត្រេះ ស្រុកស្ទឹងហាវ ខេត្តព្រះសីហនុ។ ២ ឈ្មោះ ផន លីអុី ភេទប្រុស អាយុ១៥ឆ្នាំ មុខរបរ សិស្ស មានទីលំនៅភូមិ១ ឃុំកំពេញ ស្រុកស្ទឹងហាវ ខេត្តព្រះសីហហនុ។ ៣ ឈ្មោះ​ ជឿន បញ្ញា ភេទប្រុស អាយុ ១៨ឆ្នាំ មុខរបរសិស្ស មានទីលំនៅភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ។

ក្រោយកើតហេតុសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ចំនែកវត្ថុតាងបានយករក្សារទុកនៅអធិការស្រុកស្ទឹងហាវដើម្បីបន្តនីតិវិធី៕

អត្ថបទ៖ ស៊ុយ ចាន់ធា