នគរបាលព្រំដែន៦នាក់ ត្រូវបានចាប់ខ្លួន ដោយសារនាំជនជាតិថៃ​ឆ្លងដែន​ចូល​មកកម្ពុជា​ដោយខុសច្បាប់​

កម្លាំងយោធានៃកងពល​លេខ៥១​ សហការជាមួយកម្លាំងកងរាជ​អាវុធ​ហត្ថ​ខេត្ត​បន្ទាយមានជ័យ​ បានចាប់ឃាត់ខ្លួនមន្ត្រីនគរបាលវរសេនាតូចការពារព្រំដែនលេខ៨៩១ សរុបចំនួន៦នាក់ ដែលជាប់ពាក់ព័ន្ធនឹងបទល្មើស​នាំជនជាតិថៃ​ឆ្លងដែន​ចូល​មកកម្ពុជា​ដោយខុសច្បាប់​។

ប្រតិបត្តិការនេះ បានធ្វើឡើងកាលពីយប់ថ្ងៃទី​៨​ ខែ​តុលា​ ឆ្នាំ​២០២៥​ នៅ​ចំណុច​ប៉ុស្តិ៍​ការពារ​ព្រំដែន​អូរល្ហុង​ ដែលក្រោមការដឹកនាំបញ្ជាដោយលោកឧត្ដមសេនីយ៍ទោ​ សេង​ ធារិន​ មេបញ្ជាការ​រង និង​ជា​នាយសេនាធិការ​យោធភូមិភាគ​ទី៥​។

មន្ត្រីនគរបាលដែលត្រូវបានចាប់ខ្លួនទាំងនេះ រួមមានទាំងមេបញ្ជាការរងវរសេនាតូចការពារព្រំដែន៨៩១​ ចំនួន២នាក់ គឺលោក​វរសេនីយ៍​ត្រី​ សុខ សំអុល​ និងលោកវរៈសេនីយ៍ត្រី​ ព្រឹម​ ដែន ព្រមទាំងមេប៉ុស្តិ៍នគរបាលការពារ​ព្រំដែន​គោក​អូរល្ហុង លោកវរៈសេនីយ៍ត្រី​ ព្រំ ផូរ។ ចំណែកមនុស្សចំនួន៣នាក់ផ្សេងទៀត គឺជាមន្ត្រីនៃវរសេនាតូច​ការពារព្រំដែន៨៩១​ រួមមានឈ្មោះ​ ព្រឹម​ ឌុន​ កាក់​ សេងទ្រី​ ​ និងភុំ​ ចំរើន​។ ខណៈម្នាក់ទៀត ឈ្មោះ​ ងុិក​ មិថុនា​ ជាចុងភៅ​ គឺមិនជាប់ពាក់​ព័ន្ធ​ឡើយ។

អ្នកនាំពាក្យរងក្រសួងមហាផ្ទៃ លោក ទូច សុឃៈ បានថ្លែងប្រាប់កម្ពុជាថ្មី នៅព្រឹកថ្ងៃទី៩​ ខែតុលានេះ ថា ក្រោយការ​ចាប់​ខ្លួន ​មន្ត្រី​នគរបាល​ទាំង៦នាក់នោះ​ កំពុងស្ថិតក្រោមសមត្ថកិច្ចរបស់កងរាជ​អាវុធ​ហត្ថ​ខេត្ត​បន្ទាយមានជ័យ​ ដើម្បី​ចាត់​ការ​បន្ត​តាមនីតិវិធីច្បាប់ក្នុងការកសាង​សំណុំ​រឿង​​បញ្ជូន​ទៅតុលាការ​។

ការចាប់ខ្លួនមន្ត្រីនគរបាលព្រំដែនខាងលើ ត្រូវបានគេមើលឃើញថា បានធ្វើឡើងក្រោយមានការស្នើពីសំណាក់ប្រធានព្រឹទ្ធសភា សម្ដេចតេជោ ហ៊ុន សែន ដែលសុំឱ្យរាជរដ្ឋាភិបាល និងអាជ្ញាធរគ្រប់លំដាប់ថ្នាក់កំចាត់ចោលមន្ត្រី និងឈ្មួញដែលនៅបន្តលួចនាំទំនិញថៃចូលកម្ពុជាក្នុងពេលព្រំដែនបន្តបិទ បើទោះជាករណីនេះមិនបានបញ្ជាក់ថា មានជាប់ពាក់ព័ន្ធនឹងការលួចនាំទំនិញពីថៃក៏ដោយ តែនេះជាករណីដែលមន្ត្រីខិលខូចលួចនាំមនុស្សឆ្លងដែនខុសច្បាប់។

ជាមួយនឹងការស្នើទាំងយប់មិញនេះ សម្ដេចតេជោ ហ៊ុន សែន តាមរយៈសំណេរនៅលើបណ្ដាញសង្គមហ្វេសប៊ុក បានសង្កត់ធ្ងន់ថា«ប្រសិនបើខ្ញុំនៅធ្វើនាយករដ្ឋមន្ត្រីដូចពេលមុន ខ្ញុំមិនបាច់និយាយភាសានេះទេ គឺចេញបញ្ជាចាប់ខ្លួន ឬដកចេញពីមន្ត្រីតែម្តង ប៉ុន្តែសូមកុំគិតថា (ឆ្មាមិននៅកណ្តុរឡើងរាជ្យឲ្យសោះ)»៕

ដោយ៖ ធឿន វ៉ាន់សុង