​ផ្សារប្រចាំសប្តាហ៍ខេត្តបាត់ដំបង ផលិតផលខ្មែរ​កាន់តែ​សំបូរ ខណៈពលរដ្ឋបន្ត​គាំទ្រ​ឥត​ថមថយ

មន្ត្រីពាណិជ្ជកម្មខេត្តបាត់ដំបង​បាន​អះអាងថា ផ្សារប្រចាំសប្តាហ៍ខេត្តបាត់ដំបង ផលិតផលខ្មែរកាន់តែមានសន្ទុះខ្លាំង ខណៈអតិថិជនមានការគាំទ្រច្រើន។

ការអះអាងពីមន្ត្រីពាណិជ្ជកម្មបែបនេះ សង្កេតឃើញផលិតផលខ្មែរចម្រុះ ត្រូវបានបង្កើនដាក់តាំងលក់ ហើយចំនួនអតិថិជនក៏កាន់តែមានចំនួនច្រើនគួរឲ្យកត់សម្គាល់ បង្កជាបរិយាកាសសប្បាយរីករាយអ៊ួអរប្រៀប​បានជាកន្លែងកម្សាន្តអារម្មណ៍របស់មហាជន។

អ្នកស្រី​ អុី មៀន ពលរដ្ឋរស់នៅក្រុង​បាត់ដំបង​បានសម្តែងការ​ចាប់អារម្មណ៍ ក្រោយ​អ្នកស្រីទើបតែចូលមកទិញ​ផលិតផលក្នុងស្រុក ដោយ​មិននឹកស្មានថាសំបូរបន្លែ ត្រីសាច់ ហើយគ្រប់បន្លែសុទ្ធតែនៅស្រស់បំព្រង មិនដូចក្នុងផ្សារនានាដែលអ្នកស្រីធ្លាប់ដើរទិញពីមុននោះទេ។

បើតាមអ្នកស្រី មៀន “ពេលដើរមើលឃើញ បន្លែ ត្រីសាច់ច្រើនបែបនេះ ខ្ញុំចេះតែចង់ទិញច្រើនស្ទើរភ្លេចខ្លួន ណាមួយបរិយាកាសក៏ល្អ ហើយសប្បាយរីករាយ ពេលដើរជួបអ្នកស្គាល់គ្នា រាក់ទាក់គ្នាយ៉ាងសប្បាយ។ វាប្រៀប​បានដូចជារូបខ្ញុំកំពុងតែដើរនៅលើទីតាំងកម្សាន្តមួយកន្លែងអីចឹងដែរ”។

មន្ត្រីពាណិជ្ជកម្មខេត្តបាត់ដំបង​បានបញ្ជាក់ថា រាល់សប្តាហ៍ដំណើរការលក់ផលិតផលខ្មែរនៅក្នុងស្រុក មាន​បន្លែសុវត្ថិភាព ផ្លែឈើ សាច់សត្វ អង្ករ និងអាហារកែច្នៃនានា កាន់តែមានសន្ទុះមិនមានការថមថយណាមួយនោះទេ ហើយអតិថិជនក៏បានគាំទ្រច្រើន ជាក់ស្តែងដូចនៅព្រឹកថ្ងៃ​សៅរ៍ជាដើម។

បើតាមមន្ត្រីដដែល ផ្សារផលិតផលខ្មែរនៅខេត្តបាត់ដំបង សហការរៀបចំដោយមន្ទីរពាណិជ្ជកម្មខេត្តបាត់ដំបង និងសមាគមនិរន្តរភាពដីដើម្បីជីវិត កំពុងដំណើរការលក់កសិផលផលិតផលខ្មែរ រៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង ៦:០០ព្រឹក ដល់៦:០០ល្ងាច នៅបរិវេណខាងមុខផ្សារទំនើប-បុរីថ្មី (តាមបណ្តោយផ្លូវលេខ៣) ក្រុងបាត់ដំបង ខេត្តបាត់ដំបង៕

អត្ថបទ÷សៅ សារិទ្ធ