ជីដូន​វ័យ ៧៤ ឆ្នាំ គ្មានទីពឹង ទទួលបាន​ការ​ឧបត្ថម្ភ​ពីព្រះគ្រូអនុគណក្រុងក្រចេះ

លោកយាយ យឹម ទូច អាយុ ៧៤ឆ្នាំ ជាទុរគតជន រស់នៅភូមិអូរឫស្សី១ សង្កាត់អូរឫស្សី ក្រុងក្រចេះ ខេត្តក្រចេះ ដែល​រស់នៅតែម្នាក់ឯង និងមានជីវភាពខ្វះខាត និងកំពុងមានជំងឺប្រចាំកាយផងនោះ បាន​ទទួល​អំណោយ​ជា​គ្រឿងឧបភោគបរិភោគនិង​បច្ច័យពី​ព្រះគ្រូសីលគន្ធប្បជ្ជោតរតនបាលោ ភួង រតនា ព្រះគ្រូអនុគណក្រុងក្រចេះ និងជាគ្រូចៅអធិការវត្តវេឡុគង្គារាម អូរឫស្សី។

ព្រះអង្គ ភួង រតនា ព្រះគ្រូអនុគណក្រុងក្រចេះ មានសង្ឃដីកាថា បន្ទាប់ពីទទួលព័ត៌មានអំពីការរស់នៅរបស់លោក​យាយ​ភ្លាមនោះ ព្រះអង្គបានរៀបចំនិងនាំយកអំណោយមកផ្ដល់ជូនដល់គាត់ ដេីម្បីជួយសម្រាលដល់ការលំបាកមួយគ្រា និងបានលេីកទឹកចិត្តលោកយាយឲ្យពង្រឹងស្មារតី រស់នៅកុំបាក់ទឹកចិត្ត។

ព្រះអង្គមានសង្ឃដីកា​បន្តថា អំណោយដែលបានប្រគល់ជូននៅពេលនេះ គឺបានមកពីពុទ្ធបរិស័ទដែលបានប្រគេនព្រះអង្គក្នុងកម្មវិធីកម្មបែបព្រះពុទ្ធសាសនាផ្សេងៗ ដែល​សម្ភារៈទាំងអស់នោះរួមមាមាន -អង្ករចំនួន ២៥ គីឡូគ្រាម, មីចំនួន ១ កេះ, ទឹកត្រីចំនួន ១ យួរ, ត្រីខចំនួន ១ យួរ, ទឹកបរិសុទ្ធចំនួន ១ កេះ, ទឹកសុីអុីវចំនួន ១ យួរ, បន្លុងចំនួន ១ និងបច្ច័យចំនួនចំនួន ១៥ មុឺនរៀល។

ក្រោយពេលទទួលបានអំណោយ លោកយាយ ញឹម ទូច បានសម្ដែងនូវសេចក្ដីសោមនស្សរីករាយ និងថ្លែងអំណរអរព្រះគុណយ៉ាងជ្រាលជ្រៅ ចំពោះទឹកព្រះទ័យរបស់ព្រះអង្គ ដែលបានជួយឧបត្ថម្ភដល់រូបគាត់ដែលកំពុងតែជួបការលំបាកក្នុងជីវភាពប្រចាំថ្ងៃ៕

អត្ថបទ៖ ប្រុញ វិធិន