អាជ្ញាធរសង្កាត់អូរឫស្សី ២ ចុះណែនាំម្ចាស់អាជីវកម្ម ១១ ទីតាំង ដកហូតស្លាកយីហោ​ដាក់លើចិញ្ចើមផ្លូវ

អាជ្ញាធរសង្កាត់អូរឫស្សី ២ បានដឹកនាំកម្លាំងចម្រុះ ចុះរៀបចំសណ្ដាប់ធ្នាប់សាធារណៈតាមដងផ្លូវ ក្នុងមូលដ្ឋានសង្កាត់ និង ណែនាំម្ចាស់អាជីវកម្ម ហាមមិនឲ្យមានការដាក់តាំងលក់លើចិញ្ចើមផ្លូវសាធារណៈ។

កាលពីថ្ងៃទី ២៧ ខែវិច្ឆិកា ឆ្នាំ ២០២៥ កម្លាំងនគរបាលប៉ុស្តិ៍អូរឫស្សីទី ២ សហការជាមួយកម្លាំងប្រជាការពារសង្កាត់ ចុះរៀបចំសណ្ដាប់ធ្នាប់នៅតាមដងផ្លូវលេខ ១៦៤ បណ្តោយផ្លូវ សាលាបឋមសិក្សាបាក់ទូក និងណែនាំដល់ម្ចាស់អាជីវកម្ម បានចំនួន ១១ ទីតាំង ធ្វើការដកស្លាកយីហោដែលដាក់នៅលើចិញ្ចើមផ្លូវ និងបណែនាំមិនឲ្យដាក់លើផ្លូវថ្មើជើងបន្តទៀតទេ។

 

គួររំលឹកផងដែរថា លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានណែនាំឲ្យអភិបាលខណ្ឌទាំង ១៤ យកចិត្តទុកដាក់ឲ្យបានខ្ពស់បំផុតលើការដោះស្រាយការកកស្ទះចរាចរណ៍ ពិសេសការចតយានយន្តគ្មានសណ្តាប់ធ្នាប់ ការរំលោភបំពានទ្រូងផ្លូវ និងចិញ្ចើមផ្លូវពីសំណាក់អាជីវករមួយចំនួន។

ក្នុង ១ សប្តាហ៍ កន្លងមកនេះ នៅរាជធានីភ្នំពេញ មានការកកស្ទះចរាចរណ៍យ៉ាងខ្លាំង ពិសេសនៅលើបណ្តោយផ្លូវធំៗ និងផ្លូវចេញចូលរាជធានីភ្នំពេញ។ តាមការសិក្សា ការកកស្ទះចរាចរណ៍នេះ បណ្តាលមកពីការចតយានយន្តមិនមានសណ្តាប់ធ្នាប់ និងមួយចំនួនទៀតមកពីពលរដ្ឋមកពីប្រទេសថៃ និងបណ្តាខេត្តផ្សេងៗ ទៀត សម្រុកមកភ្នំពេញ ដើម្បីរកការងារធ្វើ។

ជាមួយគ្នាផងដែរ អាជ្ញាធរសង្កាត់ នឹងនៅតែបន្តចុះរៀបចំសណ្ដាប់ធ្នាប់ របៀបរៀបរយតាមទីសាធារណៈ នៅបណ្តោផ្លូវផ្សេងៗ ទៀត ក្នុងមូលដ្ឋាន ដូច្នេះសង្ឃឹមថា អាជីវករដែលលក់ដូរនៅតាមចិញ្ចើមផ្លូវ ព្រមសហការជាមួយអាជ្ញាធរទាំងអស់គ្នា ដើម្បីធានាបាននូវសន្តិសុខសណ្ដាប់ធ្នាប់អនាម័យល្អក្នុងមូលដ្ឋាន៕

ដោយ ៖ ម៉េង