មិនរាងចាល ! សមត្ថកិច្ចខណ្ឌ៧មករា ដកហូតម៉ូតូក្មេងទំនើងម្នាក់ទុកកន្លះឆ្នាំ ក្រោយបង្ហោះតាមផ្លូវសាធារណៈ

ក្មេងទំន្មើងដែលបង្ហោះម៉ូតូតាមផ្លូវសាធារណៈ ក្នុងមូលដ្ឋានខណ្ឌ៧មករា ហើយបានបង្ហោះរូបវីឌីអូ ក្នុងបណ្ដាញសង្គម ត្រូវបានកម្លាំងនគរបាលប៉ុស្តិ៍រដ្ឋបាលសហការជាមួយនគរបាលនៃអធិការដ្ឋាននគរបាលខណ្ឌ៧មករា ស្រាវជ្រាវឃាត់ខ្លួនធ្វើការកិច្ចសន្យាអប់រំនិងដកហូតម៉ូតូទុករយះពេល៦ខែ ទើបអនុញ្ញាតឲ្យម៉ូតូត្រឡប់ទៅវិញ។

ជាក់ស្ដែងនៅរសៀលថ្ងៃទី២៥ ខែឧសភា ឆ្នាំ២០២៦នេះ ក្រោយឃើញក្នុងបណ្ដាញសង្គម នូវរូបវីឌីអូ បង្ហោះម៉ូតូ តាមបណ្ដោយផ្លូវ កម្ពុជាក្រោម មូលដ្ឋានសង្កាត់មិត្តភាព ខណ្ឌ៧មករា លោកវរសេនីយឯក ជុន ប៊ុនណាន អធិការនគរបាលខណ្ឌ៧មករា បានបញ្ជាដល់នគរបាលផែនជំនាញ ឲ្យស្រាវជ្រាវបន្ទាន់ កំណត់អត្ថសញ្ញាណ បានឈានដល់ការឃាត់ខ្លួន មកមកអធិការដ្ឋាននគរបាលខណ្ឌភ្លាមៗតែម្ដង។

លោកវរសេនីយ៍ឯក ជុន ប៊ុនណាន អធិការនគរបាលខណ្ឌ៧មករាបានបញ្ជាក់ប្រាប់ ឲ្យដឹងថា យុវជនរូបនេះ កាលពីអំឡុងឆ្នាំ២០២៤ បានធ្វើបង្ហោះម៉ូតូ កម្លាំងនៃអធិការឃាត់និងដកហូតម៉ូតូទុករយះពេល៣ ខែម្ដងរួចហើយ ។ ប៉ុន្តែមិនរាងចាល នៅពេលថ្មីនេះ យុវជនបានធ្វើការបង្ហោះម្ដងទៀតជាលើកទី២ ដូច្នេះកម្លាំងនគរបាលនៃអធិការដ្ឋាននគរបាលខណ្ឌ ធ្វើការឃាត់ ធ្វើកិច្ចសន្យាអប់រំ និងអាណាព្យាបាលមកធានា និងដកហូតម៉ូតូទុករយះពេល៦ខែ។ លោកអធិការបានបញ្ជាក់បន្ថែម ក្នុងករណីបង្ហោះម៉ូតូតាមផ្លូវសាធារណៈ ជាលើកទី៣ នោះនិងត្រូវដកហូតម៉ូតូរក្សាទុកតែម្ដង មិនអនុញ្ញាឲ្យវិញនោះទេ។

គួរបញ្ជាក់ផងដែរ កន្លងមករហូតដល់បច្ចុប្បន្ន លោកឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការដ្ឋាននគរបាលរាជធានីភ្នំពេញ តែងក្រើនរំលឹកដល់ អធិការដ្ឋានទាំង១៤ខណ្ឌ រួមទាំងការិយាល័យជំនាញពាក់ព័ន្ធ ត្រូវបង្កើនការបង្ការ ទប់ស្កាត់ និងបង្ក្រាប រាល់បទល្មើស ក្នុងភូមិសាស្ត្ររាជធានីភ្នំពេញ បានល្អដើម្បី សន្តិសុខសុវត្ថិភាព ជូនបងប្អូនប្រជាពលរដ្ឋ៕ អត្ថបទ៖ សុភា