អ៊ីស្រាអែលគ្រោង​បង្កើន​ថវិកាការពារជាតិឆ្នាំ ២០២៦ដល់​ជាង​៣៤​ពាន់​លាន​ដុល្លារ

ថវិកាការពារជាតិរបស់អ៊ីស្រាអែលសម្រាប់ឆ្នាំ​២០២៦ ត្រូវបានកំណត់ចំនួន​ប្រហែល ៣៤,៦៣​ពាន់លានដុល្លារ កើនឡើងពីជាង​២៧​ពាន់​លាន​ដុល្លារ​នៅ​ឆ្នាំ​២០២៥។ នេះ​បើតាម​សេចក្ដី​រាយការណ៍​ពី​ការិយាល័យរដ្ឋមន្ត្រីការពារជាតិ​នា​ថ្ងៃសុក្រ​ទី​៥​ខែ​ធ្នូ​ឆ្នាំ​២០២៥​ ខណៈដែលគណៈរដ្ឋមន្ត្រីបានចាប់ផ្តើមពិភាក្សាអំពីផែនការចំណាយសម្រាប់ឆ្នាំក្រោយ។

រដ្ឋមន្ត្រីការពារជាតិ លោក Israel Katz និងរដ្ឋមន្ត្រីហិរញ្ញវត្ថុ លោក Bezalel Smotrich បានឯកភាពលើក្របខ័ណ្ឌ​កញ្ចប់​ថវិកា​ថ្មី។ លោក Katz បាននិយាយថា កងកម្លាំងការពារជាតិអ៊ីស្រាអែល (IDF) នឹងបន្តផ្តោតលើការគាំទ្រទាហាន និងកាត់បន្ថយបន្ទុកលើកងទ័ពបម្រុង។ ការិយាល័យរបស់លោកបាន​លើក​ឡើង​ថា «យើងនឹងបន្តធ្វើសកម្មភាពយ៉ាងម៉ឺងម៉ាត់ ដើម្បីពង្រឹងកងទ័ព IDF និងដោះស្រាយតម្រូវការរបស់អ្នកប្រយុទ្ធ​ឲ្យ​បានពេញលេញ ព្រមទាំងកាត់បន្ថយបន្ទុកលើកងទ័ពបម្រុង ដើម្បីធានាសន្តិសុខរបស់រដ្ឋអ៊ីស្រាអែលនៅគ្រប់ជួរមុខ»។

យោងតាមការិយាល័យរបស់លោក Smotrich ថវិកាការពារជាតិឆ្នាំ២០២៦គឺកើនឡើង​ប្រមាណ១៤,៥​ពាន់​លាន​ដុល្លារ បើប្រៀបធៀបទៅនឹង​ឆ្នាំ​២០២៣ មុនពេលសង្រ្គាមហ្គាហ្សា​ផ្ទុះ​ឡើង។

សង្រ្គាមរបស់អ៊ីស្រាអែលនៅក្នុងតំបន់ហ្គាហ្សា និងជម្លោះឆ្លងព្រំដែនជាមួយក្រុម​ហេសបូឡា បានបង្កើនការចំណាយលើវិស័យការពារជាតិយ៉ាងខ្លាំង។ អ៊ីស្រាអែលបានចំណាយប្រហែល៣១​ពាន់លានដុល្លារ លើប្រតិបត្តិការនៅក្នុងតំបន់ហ្គាហ្សា និងលីបង់ក្នុងឆ្នាំ​២០២៤៕

ប្រែសម្រួល៖ ឈាង