លោក ត្រាំ ទទួលស្គាល់ថា ការបញ្ចប់សង្គ្រាមកម្ពុជា-ថៃ មានផលលំបាកខ្លះ តែអាចដោះស្រាយបាន

ក្នុងសុន្ទកថាបើកនៃពិធីបំពាក់មេដាយការពារព្រំដែនម៉ិកស៊ិក ដែលធ្វើឡើងនៅការិយាល័យពងក្រពើ ក្នុងសេតវិមានកាលពីថ្ងៃចន្ទទី១៥ខែធ្នូឆ្នាំ២០២៥ ត្រូវនឹងថ្ងៃអង្គារទី១៦នៅកម្ពុជា ប្រធានាធិបតីអាមេរិក ក៏បានលើកឡើងពីសង្គ្រាមកម្ពុជា-ថៃ ផងដែរ។

តាមការផ្សាយរបស់ RSBN, ប្រមុខរដ្ឋាភិបាលទីក្រុងវ៉ាស៊ីនតោន ទទួលស្គាល់ថា ការលូកដៃបញ្ចប់សង្គ្រាមនេះមានផលលំបាកខ្លះ។ លោកត្រាំ មានប្រសាសន៍ថា៖ «ដូចដែលអ្នកបានដឹងហើយថា យើងបានដោះស្រាយសង្រ្គាមចំនួនប្រាំបី ហើយមួយក្នុងចំណោមនោះមានបញ្ហាបន្តិចបន្តួចកាលពីម្សិលមិញ។ ថៃនិងកម្ពុជា, យ៉ាងណាយើងអាចដោះស្រាយបាន។ មានការសម្លាប់គ្នាមួយចំនួនដែលមិនគួរកើតឡើងនោះទេ ហើយយើងសូមកោតសរសើរប្រទេសទាំងពីរ ដែលខិតខំដោះស្រាយ»។

ពាក់ព័ន្ធរឿងសង្គ្រាមនេះដែរ កាលពីចុងសប្តាហ៍ សេតវិមាន​បាន​ប្រកាសថា លោកត្រាំនឹង​ដាក់ទោស​ជន​ខ្លះ​តាម​ការចាំបាច់ ដើម្បី​បញ្ឈប់​ការ​សម្លាប់ បន្ទាប់ពី​ថៃ​​ផ្គើន​ និង​មិន​គោរព​តាម​សំណើ​បទ​ឈប់បាញ់​ថ្មី ដែល​ជា​កិច្ច​ខិតខំ​ប្រឹងប្រែង​របស់​ទីក្រុង​វ៉ាស៊ីនតោន។

តាមការឲ្យដឹងពីអ្នកនាំពាក្យសេតវិមាន, ប្រធានាធិបតីរំពឹងថា ភាគីទាំងអស់នឹងគោរពយ៉ាងពេញលេញនូវការប្តេជ្ញាចិត្តដែលពួកគេបានធ្វើក្នុងការចុះហត្ថលេខាលើកិច្ចព្រមព្រៀងទាំងនេះ ហើយលោកនឹងដាក់ទោសជន​ខ្លះ​តាមការចាំបាច់ ដើម្បីបញ្ឈប់ការសម្លាប់ និងធានាសន្តិភាពយូរអង្វែង។

លុះមកដល់ថ្ងៃចន្ទ លោកត្រាំបានចេញវិធានការក្តៅ ដោយគំរាមដំឡើង​ពន្ធគយលើថៃនិងកម្ពុជា ប្រសិនបើប្រទេសទាំងពីរ មិនព្រមបញ្ឈប់អរិភាពនៅតាមព្រំដែន។

ក្នុងបទសម្ភាសន៍ជាមួយកាសែត The Wall Street Journal លោក​ត្រាំ បញ្ជាក់ថា លោកបានព្រមានរដ្ឋាភិបាលទាំងពីរថា ការបន្តប្រយុទ្ធគ្នានឹងជំរុញ​ឲ្យ​អាមេរិកលុបចោលកិច្ចព្រមព្រៀងពាណិជ្ជកម្ម និងដំឡើង​ពន្ធគយជាការដាក់ទណ្ឌកម្ម បន្ទាប់ពីការហៅទូរសព្ទជាមួយនាយករដ្ឋមន្ត្រីថៃ លោក អានុទីន ឆានវីរៈគុល និងនាយករដ្ឋមន្ត្រីកម្ពុជា សម្ដេច ហ៊ុន ម៉ាណែត។

លោកត្រាំ​បញ្ជាក់​ថា មេដឹកនាំទាំងពីរបានយល់ព្រមបញ្ឈប់អរិភាពក្នុងរយៈពេល២៤ម៉ោង បើទោះបីជាការប៉ះទង្គិចគ្នា​​នៅតែបន្តកើតមាននៅពេលក្រោយក៏ដោយ។ លោកអះអាង​ថា ពន្ធគយគឺជាឧបករណ៍ចាំបាច់នៃគោលនយោបាយការបរទេសរបស់លោក៕

អត្ថបទ៖ សុខ សុវណ្ណ