លោកត្រាំ គំរាមដំឡើង​ពន្ធគយ ជា​វិធានការ​​បញ្ឈប់​សង្គ្រាម​​កម្ពុជា-ថៃ

ប្រធានាធិបតីអាមេរិក លោក ដូណាល់ ត្រាំ បានថ្លែងថា លោកបានគំរាមដាក់ពន្ធគយថ្មីលើប្រទេសថៃ និងកម្ពុជា ប្រសិនបើប្រទេសទាំងពីរបរាជ័យក្នុងការបញ្ឈប់អរិភាពនៅតាមព្រំដែនជម្លោះរបស់ពួកគេ ដោយចាត់ទុកពន្ធគយជាឧបករណ៍ដ៏សំខាន់នៅក្នុងកិច្ចខិតខំប្រឹងប្រែងរបស់ទីក្រុងវ៉ាស៊ីនតោន ដើម្បីបង្ខំ​ឲ្យ​មានបទឈប់បាញ់។ នេះ​បើ​យោង​​តាម​ការ​ចុះ​ផ្សាយ​របស់​សារព័ត៌មាន TASS កាល​ពីថ្ងៃ​​អាទិត្យ​ទី​១៤​ខែ​ធ្នូ​ឆ្នាំ​២០២៥។

នៅក្នុងបទសម្ភាសន៍ជាមួយកាសែត The Wall Street Journal ដែលត្រូវបានថត​ទុក​កាលពីថ្ងៃសុក្រ​ លោក​ត្រាំ បាននិយាយថា លោកបានព្រមានរដ្ឋាភិបាលទាំងពីរថា ការបន្តប្រយុទ្ធគ្នានឹងជំរុញ​ឲ្យ​អាមេរិកលុបចោលកិច្ចព្រមព្រៀងពាណិជ្ជកម្ម និងដំឡើង​ពន្ធគយជាការដាក់ទណ្ឌកម្ម បន្ទាប់ពីការហៅទូរសព្ទជាមួយនាយករដ្ឋមន្ត្រីថៃ លោក អានុទីន ឆានវីរៈគុល និងនាយករដ្ឋមន្ត្រីកម្ពុជា សម្ដេច ហ៊ុន ម៉ាណែត។ លោកត្រាំ បាន​បញ្ជាក់​ថា មេដឹកនាំទាំងពីរបានយល់ព្រមបញ្ឈប់អរិភាពក្នុងរយៈពេល២៤ម៉ោង បើទោះបីជាការប៉ះទង្គិចគ្នា​​នៅតែបន្តកើតមាននៅពេលក្រោយក៏ដោយ។

លោកត្រាំ បានអះអាង​ថា ពន្ធគយគឺជាឧបករណ៍ចាំបាច់នៃគោលនយោបាយការបរទេសរបស់លោក។ សម្ដីនេះបានកើតឡើងចំពេលដែលមានអំពើហិង្សាជាថ្មីនៅតាមព្រំដែនកម្ពុជា-ថៃ ដែលការប៉ះទង្គិចគ្នានៃកងកម្លាំងប្រដាប់អាវុធបានផ្ទុះឡើងកាលពីថ្ងៃទី៧​ធ្នូ ហើយបានរីករាលដាលទៅជាការវាយប្រហារតាមផ្លូវអាកាស និងការបាញ់ផ្លោងកាំភ្លើងធំ។

ប្រទេសកម្ពុជា និង​ថៃ​ ធ្លាប់បានចុះហត្ថលេខាលើសេចក្តីថ្លែងការណ៍រួមមួយកាលពីខែតុលា ក្រោមវត្តមានរបស់លោកត្រាំ នៅខាងក្រៅកិច្ចប្រជុំកំពូលអាស៊ាន ដោយប្តេជ្ញាចិត្តក្នុងការកាត់បន្ថយភាពតានតឹង។ ពាក់ព័ន្ធ​នឹងការ​អំពាវនាវ​ចុង​ក្រោយ​នេះ​របស់​លោក​ត្រាំ ​លោកអានុទីន ប្រកែក​មិន​ព្រម​ស្ដាប់ ហើយថែម​ទាំង​​និយាយ​ដោយ​ផ្គើន​​ថា គ្មាន​កិច្ចព្រមព្រៀង​បទឈប់បាញ់​ណាមួយ​ត្រូវ​បាន​ដាក់​ឲ្យ​ប្រើប្រាស់​ទេ ហើយ​ប្រទេស​ថៃ​នឹង​បន្ត​ប្រយុទ្ធ​ដោយ​មិន​ខ្វល់​ពី​ការ​អំពាវនាវ​របស់​អន្តរជាតិ​ឡើយ ខណៈ​​យន្តហោះ​ចម្បាំង​ថៃ​បាន​បើក​​ការ​​វាយប្រហារ​គោលដៅ​ថ្មី​​ក្បែរ​ព្រំដែន​ប៉ុន្មាន​ម៉ោង​ក្រោយ​​ការ​ប្រកាស​របស់មេ​ដឹកនាំអាមេរិក៕

ប្រែសម្រួល៖ ឈាង