តម្លៃប្រេងអន្តរជាតិធ្លាក់ចុះជាង ២% ពេលបិទការជួញដូរថ្ងៃសុក្រ

តម្លៃប្រេងអន្តរជាតិ​បានធ្លាក់ចុះជាង ២% ពេលបិទការជួញដូរនៅថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍ ដោយសារតែការផ្គត់ផ្គង់លើសតម្រូវការរបស់សកល ខណៈវិនិយោគិន​​តាមដាន​វឌ្ឍនភាពនៃការស្វែងរកដំណោះស្រាយសន្តិភាពអ៊ុយក្រែន-រុស្ស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។ ​

តម្លៃប្រេងឆៅអន្តរជាតិម៉ាក Brent បានធ្លាក់ចុះ ​១,៦០ ដុល្លារ ​ឬ ២,៥៧% ​ដោយបិទការជួញដូរនៅតម្លៃ ៦០,៦៤ ដុល្លារ/បារ៉ែល។ ​តម្លៃប្រេងឆៅអាមេរិក ម៉ាក West Texas Intermediate (WTI) ​វិញ បានធ្លាក់ចុះ ១,៦១ ដុល្លារ ​ឬ ២,៧៨% មកត្រឹម ៥៦,៧៤ ដុល្លារ/បារ៉ែល។​

តម្លៃប្រេងបានស្ទុះឡើងបន្តិចមកវិញនៅថ្មីៗនេះ ដោយសារតែការរំខាន​ផ្នែកផ្គត់ផ្គង់ ប៉ុន្តែ​វានៅតែអាចធ្លាក់ចុះក្នុងអត្រាតម្លៃប្រចាំឆ្នាំ​ធំបំផុតចាប់តាំងពីឆ្នាំ ២០២០ ដោយសារតែការផ្គត់ផ្គង់លើសតម្រូវការ និងសង្រ្គាមពាណិជ្ជកម្ម​។ រាប់តាំងពីដើមឆ្នាំមក តម្លៃប្រេងប្រភេទម៉ាក​ Brent បានធ្លាក់ចុះ ១៩% និង WTI ធ្លាក់ចុះ ២១%។

អ្នកវិភាគនិយាយថា ភាពតានតឹងផ្នែកភូមិសាស្ត្រនយោបាយបាន​ជំរុញតម្លៃក្នុងរយៈពេលខ្លីប៉ុណ្ណោះ ​ប៉ុន្តែមិនអាចផ្លាស់ប្ដូរទស្សនវិស័យរយៈពេលវែងនោះទេ។ ភ្នាក់ងារថាមពលអន្តរជាតិ (IEA) រំពឹងថា ការផ្គត់ផ្គង់ប្រេងសកលប្រចាំឆ្នាំ ២០២៥ នឹងលើសពីតម្រូវការប្រហែល ៣,៨ លានបារ៉ែល/ថ្ងៃ។

យ៉ាងណាមិញ ការធ្លាក់ចុះតម្លៃប្រេងកាលពីថ្ងៃសុក្រ ក៏រួមចំណែកផងដែរ​ដោយការរំពឹងទុកពីដំណោះស្រាយសន្តិភាពលើជម្លោះអ៊ុយក្រែន-រុស្ស៊ី ខណៈប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី គ្រោងនឹងជួបប្រធានាធិបតីអាមេរិក លោក ដូណាល់ នាថ្ងៃអាទិត្យនេះ៕