សហគ្រិនក្នុងស្រុកផលិតម្សៅស៊ុបដើម្បីជំនួសផលិតផលថៃ

ស្របពេលដែលជម្លោះព្រំដែនកម្ពុជា-ថៃ នៅតែបន្ត សហគ្រិនខ្មែរម្នាក់ ចាប់ផ្ដើមផលិតម្សៅស៊ុបដាក់លក់លើទីផ្សារ ជំនួសឱ្យផលិតផលដែលនាំចូលពីប្រទេសជិតខាង ខណៈបច្ចុប្បន្នផលិតផលនេះក៏កំពុងទទួលបានការគាំទ្រខ្លាំងពីអតិថិជនក្នុងស្រុកផងដែរ។

អ្នកស្រី សេង សំណាង ជាម្ចាស់សហគ្រាសកែច្នៃផលិតផលផ្លែឈើ (ជេអឹមអិលអេច) ប្រាប់ កម្ពុជាថ្មី ថា សម្រាប់ពេលបច្ចុប្បន្ន សហគ្រាសរបស់អ្នកស្រី បានដាក់ចេញនូវរូបមន្តថ្មីមួយទៀត នោះគឺម្សៅស៊ុបចុងភៅ ដែលជាផលិតផលថ្មីសម្រាប់សិប្បកម្មរបស់អ្នកស្រីផ្ទាល់។

អ្នកស្រី បន្តថា ទាក់ទងនឹងការផលិតម្សៅស៊ុបនេះដែរ វត្ថុធាតុដើមសុទ្ធសឹងតែផលិតចេញអំពីបន្លែធម្មជាតិដែលទិញមកពីកសិករក្នុងតំបន់ ពិសេសក៏បានជួយឱ្យកសិករអាចមានទីផ្សារខ្លះផងដែរ។

ម្ចាស់សហគ្រាសរូបនេះ បានឱ្យដឹងទៀតថា ចំពោះគុណភាពនៃម្សៅស៊ុបរបស់សហគ្រាសអ្នកស្រីវិញ ម្សៅស៊ុបចុងភៅនេះ ទាំងរសជាតិ និងគុណភាព​មិនចាញ់នឹងផលិតផលដែលនាំចូលពីប្រទេសជិតខាង នោះឡើយ។

យ៉ាងណាមិញ អ្នកស្រី សេង សំណាង ក៏បានបញ្ជាក់ដែរថា ម្សៅស៊ុបចុងភៅនេះ សម្រាប់ការផលិតដំបូងនេះ បច្ចុប្បន្នមានលក់ត្រឹមតែផ្សារទំនើប និងផ្សារមួយចំនួនដែលស្ថិតនៅតាមរាជធានីភ្នំពេញ និងបណ្ដាខេត្តមួយចំនួន តែប៉ុណ្ណោះ។

ក្រៅពីផលិតផលម្សៅស៊ុប សហគ្រាសរបស់ អ្នកស្រី សេង សំណាង ក៏មានផលិតផលដូចជា៖ ម្សៅចេកណាំវ៉ា ម្សៅរមៀត និងផលិតផលជាច្រើនមុខទៀត ដែលផលិតចេញអំពីកសិផលរបស់កសិកររស់នៅក្នុងខេត្តបាត់ដំបងផ្ទាល់ ផងដែរ។

សហគ្រាសកែច្នៃផលិតផលផ្លែឈើ របស់អ្នកស្រី សេង​​ សំណាង បានបង្កើតឡើងមកកាលពីដើមឆ្នាំ២០២១។ បច្ចុប្បន្ន សហគ្រាស មានទីតាំងស្ថិតនៅភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង៕

អត្ថបទ ៖​ សួស សិត