​តម្លៃមាស​បំបែក​កំណត់ត្រា​ថ្មីជាង ​៦២០០ ​ដុល្លារ ​មួយ​តម្លឹង​

តម្លៃ​ហាងឆេងមាស​បាន​បន្តកើនឡើងខ្ពស់នៅព្រឹកថ្ងៃពុធទី ២៨ ខែមករា ឆ្នាំ ២០២៦ ដោយបានបំបែកកំណត់ត្រាខ្ពស់បំផុត ​៦២៣០ ដុល្លារ ក្នុងមួយតម្លឹង ដោយ​សារ​វិបត្តិសេដ្ឋកិច្ច ​ភូមិ​សាស្ត្រ​នយោបាយ ​នឹង​ការ​ប្រឈម​មុខ​នៃ​សម្ពាធ​ពន្ធរវាងសហរដ្ឋអាមេរិក ​និង​សហភាព​អឺរ៉ុប​។​​

​លោក ឡុង សំណាង ​ប្រធានផ្នែកប្រឹក្សា​យោបល់ហិរញ្ញវត្ថុក្រុមហ៊ុន ​PP Link securities ប្រាប់កម្ពុជា​ថ្មីថា ​តម្លៃមាស​ចាប់ផ្ដើមកើនឡើងខ្លាំងចាប់តាំងពីថ្ងៃចន្ទដើមសប្ដាហ៍នេះ ដោយសារ​សម្ពាធ​ពន្ធ​របស់លោក ដូណាល់ ត្រាំ ជាមួយសហភាពអឺរ៉ុប និងប្រទេសមួយចំនួន ដែលដាក់ពន្ធទៅវិញ​ទៅ​មក​លើការនាំចេញ។​

​វិនិយោគិនធំៗ ​រវាងអាមេរិក ​និងកាណាដា ​កំពុងប្រឈមុខក្នុងការដាក់ពន្ធ ១០០%​ ​ចំ​ពោះ​ទំនិញរបស់កាណាដា​ដែលនាំចូលទៅអាមេរិក ​ខណៈទំនិញពីអាមេរិកនាំចូលកាណាដា​ក៏​ប្រឈម​ដូចគ្នា ដែលធ្វើឱ្យសេដ្ឋកិច្ចនៅអាមេរិកខាងជើងធ្លាក់ចុះ ​ដោយសារសម្ពាធពន្ធ។

​​លោក ឡុង សំណាង ​អះអាងថា​ ​សហរដ្ឋអាមេរិកក៏មានមហិច្ឆតា​ ទៅលើកោះហ្គ្រីនលែនដែរ មាន​ពាក្យមួយចំនួនដែលជាបញ្ជារបស់លោក ដូណាល់ ត្រាំ ប្រធានាធិបតីសហរដ្ឋអាមេរិក វាជះ​ឥទ្ធិពល​ទៅដល់តម្លៃហាងឆេងមាស ដែលធ្វើឱ្យពិភពលោកច្របូកច្របល់ ខណៈវិនិយោគិន​មួយចំនួនផ្អាក​ក្នុងការដាក់ទុន ហើយដើរតាមទំនោររបស់លោក ត្រាំ វិញ ​ដែលជំរុញឱ្យមាសហក់ឡើង។​

ស្ថានភាពសន្តិសុខពិពលោក កាន់តែផុយស្រួយ ដែល​នឹងធ្វើឱ្យស្ថានភាពសេដ្ឋកិច្ចដុនដាបចុះ នោះហើយដែលជំរុញឱ្យតម្លៃមាស នឹងលោហៈធាតុ​មានតម្លៃមួយចំនួនត្រូវតែកើនឡើង៕​

អត្ថបទ៖ ឡេង ដេត