អ៊ីរ៉ង់បង្អួតបណ្តាញរូង​ក្រោម​សមុទ្រ ផ្ទុក​សុទ្ធ​តែ​មីស៊ីល ក្រោយ​មាន​ការ​គំរាម​រឹតតែ​ខ្លាំង​ពី​អាមេរិក

ប្រទេសអ៊ីរ៉ង់បានដាក់បង្ហាញបណ្តាញរូង​ក្រោមសមុទ្រ​ដ៏ទំនើប ដែលជាកន្លែងផ្ទុកមីស៊ីលគ្រូសរយៈចម្ងាយឆ្ងាយរាប់រយ​ពាន់​គ្រាប់ ដែលនេះត្រូវ​គេ​យល់​ថា​​ជាការប្រឹង​បង្អួត​សាច់ដុំ​យោធាយ៉ាងខ្លាំងក្លា​ដាក់​សហរដ្ឋ​អាមេរិក។​ នេះ​បើ​យោង​តាម​ការ​ចេញផ្សាយ​នៅ​លើ​សារព័ត៌មាន New Arab កាល​ពី​ថ្ងៃ​ទី​២៨​​ខែ​មករា​ឆ្នាំ​២០២៦។

រូបភាពដែលផ្សាយដោយទូរទស្សន៍រដ្ឋ បានបង្ហាញពីលោក Alireza Tangsiri មេបញ្ជាការកងទ័ពជើងទឹកនៃកងឆ្មាំបដិវត្តន៍អ៊ីរ៉ង់ (IRGC) នៅក្នុងទីតាំងក្រោមសមុទ្រ​ដ៏ធំល្វឹងល្វើយ ដោយបង្ហាញពីមីស៊ីលប្រភេទ «Qader 380 L» ដែលមានសមត្ថភាពបាញ់បានចម្ងាយលើសពី ១០០០គីឡូម៉ែត្រ និងបំពាក់ដោយប្រព័ន្ធនាំផ្លូវឆ្លាតវៃសម្រាប់តាមដាន និងវាយប្រហារគោលដៅជានាវាឲ្យមានប្រសិទ្ធភាពបំផុត។

មន្ត្រីអ៊ីរ៉ង់បានលើកឡើងថា គ្រឿងយុទ្ធោបករណ៍ទាំងនេះ ត្រូវបានរៀបចំឡើងដើម្បីប្រឆាំងនឹងវត្តមានកងទ័ពជើងទឹកអាមេរិកនៅក្នុងតំបន់ឈូងសមុទ្រ និងសមុទ្រអូម៉ង់ ព្រមទាំងបានព្រមានថា ការវាយប្រហារណាមួយលើអ៊ីរ៉ង់ នឹងធ្វើ​ឲ្យ​ច្រកសមុទ្រ Hormuz ដែលជាផ្លូវដឹកជញ្ជូនប្រេង​៣៧ភាគរយនៃពិភពលោក ក្លាយជាតំបន់មិនមានសុវត្ថិភាពសម្រាប់ការដឹកជញ្ជូនអន្តរជាតិ។

មេបញ្ជាការ Tangsiri បានសង្កត់ធ្ងន់ថា «ទីក្រុងមីស៊ីល» ទាំងនេះអនុញ្ញាតឲ្យ​កងកម្លាំងអ៊ីរ៉ង់អាចបាញ់ប្រហារចេញពីទីតាំងដែលមានសុវត្ថិភាព និងលាក់កំបាំង ដែលជាគុណសម្បត្តិដ៏សំខាន់ក្នុងសង្គ្រាមក្រោមទឹក។

ការបង្ហាញកម្លាំងយោធានេះ គឺជាការព្រមានដោយផ្ទាល់ទៅកាន់អាមេរិក ជាពិសេសគឺសំដៅលើវត្តមានរបស់ក្រុមនាវាដឹកយន្តហោះចម្បាំង USS Abraham Lincoln។ អ៊ីរ៉ង់បានបញ្ជាក់បន្ថែមថា ចរាចរណ៍ដឹកជញ្ជូនប្រេងសកល ដែលពឹងផ្អែកខ្លាំងលើច្រកសមុទ្រ Hormuz នឹងមានសុវត្ថិភាព លុះត្រាតែផលប្រយោជន៍ជាតិ និងបូរណភាពទឹកដីរបស់អ៊ីរ៉ង់ត្រូវបានគោរពដោយមហាអំណាចបរទេស។

សូម​ជម្រាប​ថា កាល​ពី​ពេលថ្មីៗ​នេះ ប្រធានាធិបតីអាមេរិក ដូណាល់ ត្រាំ បានដាក់ពង្រាយកម្លាំងជើងទឹកបន្ថែមទៅកាន់​តំបន់​មជ្ឈិមបូព៌ា ខណៈដែលលោកបានថ្លែងជាសាធារណៈថា «ជម្រើសគ្រប់យ៉ាងនៅតែស្ថិតលើតុ» ហើយ​លោកនៅតែបន្តបង្ហាញក្តីសង្ឃឹមសម្រាប់ការចរចាជាមួយថ្នាក់ដឹកនាំអ៊ីរ៉ង់៕

ប្រែសម្រួល៖ ឈាង