អ៊ីរ៉ង់ គំរាមកម្ទេចទីក្រុង តេអាវីវ មុនគេ បើអាមេរិក ហ៊ានវាយប្រហារខ្លួនមែន

កាន់តែក្តៅហើយសភាពការណ៍នៅមជ្ឈិមបូព៌ាពេលនេះ ដែលមិនមែនត្រឹមអាមេរិកនិងអ៊ីរ៉ង់ប៉ុណ្ណោះទេ ពោលគឺអ៊ីស្រាអែល ក៏ស្ថិតក្នុងគោលដៅរបស់អ៊ីរ៉ង់ដែរ ដោយទីក្រុងតេហេរ៉ង់គំរាមថា ទីក្រុង តេអាវីវ នឹងក្លាយជាគោលដៅទីមួយដែលខ្លួននឹងកម្ទេច បើអាមេរិក ហ៊ានវាយប្រហារខ្លួនមែន។

ការព្រមាននេះគឺចេញពីមាត់ទីប្រឹក្សាមេដឹកនាំអ៊ីរ៉ង់ Ali Shamkhani ដែលប្រកាសកាលពីថ្ងៃពុធទី២៨ខែមករាឆ្នាំ២០២៦ថា៖ រាល់សកម្មភាពយោធាពីសំណាក់សហរដ្ឋអាមេរិក ទោះជាមានប្រភពចេញពីណា ឬមានទ្រង់ទ្រាយកម្រិតណាក៏ដោយ នោះនឹងត្រូវចាត់ទុកថាជាការប្រកាសសង្គ្រាមហើយ។ ការឆ្លើយតបនឹងធ្វើឡើងភ្លាមៗ ក្នុងទ្រង់ទ្រាយធំដែលមិនធ្លាប់មានពីមុនមក ជាពិសេសកំណត់គោលដៅចំបេះដូងនៃទីក្រុងតេអាវីវនិងអ្នកទាំងឡាយណាដែលគាំទ្រជនឈ្លានពានតែម្តង។

តាមការផ្សាយរបស់ AFP, នេះគឺជាការគំរាមកំហែងដោយផ្ទាល់ទៅលើអ៊ីស្រាអែល ដែលអ៊ីរ៉ង់ចាត់ទុកថាជាដៃជើងរបស់អាមេរិកនៅក្នុងតំបន់ ហើយចុះហេតុអ្វីបានជាអ៊ីរ៉ង់ នឹងបាញ់មីស៊ីលវាយប្រហារទីក្រុងតេអាវីវ?

ទីក្រុងតេអាវីវ គឺជាមជ្ឈមណ្ឌលសេដ្ឋកិច្ចនិងបច្ចេកវិទ្យារបស់អ៊ីស្រាអែល។ ម្យ៉ាង អ៊ីស្រាអែលគឺជាសម្ព័ន្ធមិត្តដ៏ជិតស្និទ្ធរបស់សហរដ្ឋអាមេរិក ដែលទទួលបានការគាំទ្រយ៉ាងខ្លាំងក្លាក្នុងអំឡុងពេលមានជម្លោះជាមួយអ៊ីរ៉ង់ កាលពីខែមិថុនាឆ្នាំ២០២៥ កន្លងទៅ។

ការគំរាមនេះកើតឡើងស្របពេលប្រធានាធិបតីអាមេរិក ដូណាល់ ត្រាំ ព្រមានថា អ៊ីរ៉ង់ ជិតអស់ពេលហើយក្នុងការចរចាលើកម្មវិធីនុយក្លេអ៊ែររបស់ខ្លួន។

លោកត្រាំបានបង្ហោះលើបណ្តាញសង្គម Truth Social កាលពីថ្ងៃពុធទី២៨ខែមករាឆ្នាំ២០២៦ថា ក្រុមនាវាចម្បាំងអាមេរិកដែលលោកបានបញ្ជាឲ្យទៅកាន់តំបន់មជ្ឈិមបូព៌ា ដឹកនាំដោយនាវាផ្ទុកយន្តហោះ USS Abraham Lincoln គឺត្រៀមខ្លួនរួចជាស្រេច មានឆន្ទៈនិងអាចបំពេញបេសកកម្មរបស់ខ្លួនបានយ៉ាងឆាប់រហ័ស ទាំងល្បឿននិងកម្លាំង ប្រសិនបើចាំបាច់។

លោកសរសេរថា៖ «សង្ឃឹមថា អ៊ីរ៉ង់នឹងប្រញាប់មកកាន់តុចរចា ហើយនិយាយគ្នាលើកិច្ចព្រមព្រៀងមួយដែលត្រឹមត្រូវនិងយុត្តិធម៌ គឺមិនមានអាវុធនុយក្លេអ៊ែរ ដែលជាកិច្ចព្រមព្រៀងដ៏ល្អសម្រាប់គ្រប់ភាគី»។

ដោយសំដៅទៅការវាយប្រហាររបស់សហរដ្ឋអាមេរិក លើទីតាំងនុយក្លេអ៊ែរអ៊ីរ៉ង់កាលពីខែមិថុនាឆ្នាំមុន, ប្រធានាធិបតីអាមេរិកគំរាមថា៖ «ការវាយប្រហារលើកក្រោយនឹងកាន់តែធ្ងន់ជាងនេះទៅទៀត! កុំបណ្តោយឲ្យរឿងនោះកើតឡើងជាថ្មីឲ្យសោះ»៕

អត្ថបទ៖ សុខ សុវណ្ណ