«Silver Economy» ក្លាយជាស្ពានថ្មីភ្ជាប់ចិន និងកូរ៉េខាងត្បូង

ថ្វីដ្បិតតែប្រទេសចិន និងកូរ៉េខាងត្បូងប្រកួតប្រជែងគ្នាក្នុងវិស័យជាច្រើនក៏ដោយ ប៉ុន្តែប្រធានាធិបតីចិន ស៊ី ជីនពីង និងប្រធានាធិបតីកូរ៉េខាងត្បូង លី ជេម្យុង ក្នុងរយៈពេលប៉ុន្មានខែថ្មីៗនេះបានដាក់ការ​សន្យារួមគ្នាថា នឹងដោះស្រាយបញ្ហាប្រឈមរួមនៃចំនួនប្រជាជនវ័យចំណាស់​​ឲ្យ​បាន​ឆាប់រហ័ស។ នេះបើយោងតាមសារព័ត៌មាន SCMP បានរាយការណ៍កាលពីថ្ងៃទី ១៨ ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រម្លឹកទៅកាន់ខែវិច្ឆិកា ឆ្នាំ ២០២៥ នៅខាងក្រៅកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ក្នុងប្រទេសកូរ៉េខាងត្បូង ប្រទេសទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការលើ «សេដ្ឋកិច្ចប្រាក់» រួមទាំងឧស្សាហកម្មដែលមានស្រាប់ និងឧស្សាហកម្មដែលកំពុងរីកចម្រើនដែលបម្រើដល់មនុស្សចាស់។ លោក ស៊ី បានសង្កត់ធ្ងន់លើតម្រូវការសម្រាប់លទ្ធផលដែលផ្តល់ផលប្រយោជន៍ទៅវិញទៅមក នៅក្នុងវិស័យសហប្រតិបត្តិការនេះ។

យ៉ាងណា ក្នុងអំឡុងពេលទស្សនកិច្ចផ្លូវរដ្ឋទៅកាន់ប្រទេសចិនកាលពីខែមករា លោក លី ក៏បានពិពណ៌នាអំពីសេដ្ឋកិច្ចប្រាក់ថា ជាតំបន់ដែលមាន «ឱកាសគ្មានដែនកំណត់សម្រាប់កិច្ចសហប្រតិបត្តិការ» ទោះបីជាមានការប្រកួតប្រជែងរវាងប្រទេសទាំងពីរនៅក្នុងតំបន់ផ្សេងទៀតនៃទីផ្សារពិភពលោកក៏ដោយ។

ជារួម អ្នកវិភាគយល់ស្របនឹងការវាយតម្លៃនេះដោយលើកឡើងថា នេះអាចជាមូលដ្ឋានគ្រឹះសម្រាប់កិច្ចសហប្រតិបត្តិការនាពេលអនាគត រវាងសេដ្ឋកិច្ចឈានមុខគេទាំងពីររបស់អាស៊ី សូម្បីតែនៅក្នុងបរិបទនៃឧបសគ្គភូមិសាស្ត្រនយោបាយជាច្រើនក៏ដោយ។

លោក Xu Tianchen អ្នកសេដ្ឋកិច្ចជាន់ខ្ពស់នៅ Economist Intelligence Unit ដែលជាផ្នែកស្រាវជ្រាវនៃក្រុមប្រព័ន្ធផ្សព្វផ្សាយអង់គ្លេស The Economist Group បាននិយាយថា ទីមួយ នេះច្បាស់ណាស់ថាជាវិស័យមួយក្នុងចំណោមវិស័យដែលមិនសូវមានភាពរសើបបំផុតនៃកិច្ចសហប្រតិបត្តិការនៅក្នុងទំនាក់ទំនងចិន-កូរ៉េ។ ទីពីរ នេះគឺជាទីផ្សារកំណើន ១០០ ភាគរយនៅក្នុងប្រទេសទាំងពីរ។

ប្រជាជននៅកូរ៉េខាងត្បូង និងចិនកំពុងចាស់ជរាក្នុងអត្រាដែលមិនធ្លាប់មានពីមុនមក ហើយការប្រែប្រួលប្រជាសាស្ត្រកំពុងកើតឡើងលឿនជាងការរំពឹងទុករបស់អ្នកធ្វើគោលនយោបាយ។ កូរ៉េខាងត្បូងស្ថិតក្នុងចំណោមប្រទេសដែលមានអត្រាកំណើតទាបបំផុតនៅលើពិភពលោក ហើយត្រូវបានចាត់ថ្នាក់ជា សង្គមវ័យចំណាស់ខ្លាំង។ នៅឆ្នាំ ២០២៥ ប្រជាជនជាង ២១% នៃប្រទេស ឬ ១០.៨៤ លាននាក់ នឹងមានអាយុ ៦៥ ឆ្នាំ ឬចាស់ជាងនេះ។ ចំណែកឯចិនមិនទាន់ឈានដល់ដំណាក់កាលជ្រៅបែបនេះនៅឡើយទេ ប៉ុន្តែការធ្លាក់ចុះនៃអត្រាកំណើតកាន់តែខ្លាំង។ ចំនួនប្រជាជនក្នុងប្រទេសបានធ្លាក់ចុះជាលើកទី៤បួនជាប់ៗគ្នានៅឆ្នាំ ២០២៥ នៅពេលដែលចំនួនទារកបានធ្លាក់ចុះដល់កម្រិតទាបបំផុតចាប់តាំងពីឆ្នាំ ១៩៤៩។ នៅឆ្នាំ ២០៣៥ ចិនត្រូវបានគេព្យាករណ៍ថានឹងមានប្រជាជនជាង ៤០០ លាននាក់ដែលមានអាយុ ៦០ ឆ្នាំឡើងទៅ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អតីតប្រធានាធិបតីកូរ៉េខាងត្បូង ត្រូវបានរកឃើញថាមានទោសពីបទបះបោរ