ក្រុម​សិទ្ធិ​មនុស្ស​៖ របប​អ៊ី​រ៉ង់​​អាចចាប់​ពល​រដ្ឋ​អាមេរិក​​ធ្វើជា​​ចំណាប់​ខ្មាំង​

ក្រុម​​អ្នក​តស៊ូ​មតិ បាន​​អះអាងថា អ៊ីរ៉ង់​កំពុង​ឃុំ​ខ្លួន​ពល​រដ្ឋ​អាមេរិក​យ៉ាង​ហោច​ណាស់​៦នាក់ ឬ​អ្នក​រស់​នៅទី​នោះដោយ​ផ្ទាល់ ជាពិសេស​មាន​ជន​ជាតិ​អាមេរិក​រាប់ពាន់នាក់ជាប់​គាំងក្នុង​ប្រទេស​នេះ អាចត្រូវបានប្រើជា​ថ្នូរ​ក្នុង​ការ​ដោះ​ដូរ​ សម្រាប់​ការ​ចរចា​ក្នុងសង្គ្រាម​កំពុង​កើន​ឡើង​ជា​មួយ​សហរដ្ឋអាមេរិក និង​អ៊ី​ស្រាអែល​។

យោង​តាម​​ការ​ចេញផ្សាយ​របស់​រ៉យ​ទ័រ​ នៅ​​ថ្ងៃ​ទី​០២ ខែ​មីនា ឆ្នាំ​២០២៦ ​​ក្រុម​អ្នកជំនាញ​​បាន​​ប៉ាន់​ស្មាន​ថា ក្នុង​ចំណោម​អ្នក​ជាប់​ឃុំ​ឃាំង​ទាំង​នោះ អាចមានជនជាតិអាមេរិក-អ៊ីរ៉ង់​រាប់​ពាន់​នាក់ស្ថិត​​ក្នុង​ប្រទេស​អ៊ីរ៉ង់ ទោះ​បី​​ជាមាន​ការព្រមាន​ម្តងហើយម្តងទៀត​ពី​សហរដ្ឋអាមេរិក​មិន​ឱ្យ​ធ្វើ​​ដំណើរទៅ​ទីនោះ ដោយ​សារ​តែការ​គំរាមកំហែង​នៃការចាប់ខ្លួនក៏ដោយ។

លោក Ryan Fayhee សមាជិក​ក្រុម​ប្រឹក្សា​ភិបាលនៃក្រុមតស៊ូមតិ​ Foley Foundation និយាយថា៖«ប្រវត្តិរបស់​របប​​គ្រប់គ្រងនៅអ៊ីរ៉ង់​ ​គឺ​ការ​ស្វែង​រក​ឥទ្ធិពល​លើ​ជនជាតិ​អាមេរិក​សម្រាប់គោល​បំណង​នយោបាយ​មាន​ជា​យូរ​មក​ហើយ​។ ខ្ញុំអាច​ស្រមៃ​ដឹង​ថាជនជាតិអាមេរិកទាំង​នោះ​អាច​ប្រឈម​​នឹងហានិ​ភ័យ»។

ចំណែក លោក Kieran Ramsey ជា​ក្រុម​តស៊ូមតិ​ពី​ Global Reach របស់​សហរដ្ឋ​អាមេរិក​ បាន​និយាយ​ថា៖«​មាន​ជនជាតិ​អាមេរិក​រាប់​រយនាក់​ ឬ​ច្រើន​ជាង​នេះ​នៅ​ទីនោះ ទោះ​បី​ជា​មាន​​ ​ចំណង​គ្រួសារ​ក៏​ដោយ ក៏មាន​ហានិភ័យផង​ដែរ​»។

គួរ​បញ្ជាក់​ថា អ៊ីរ៉ង់​មិន​ទទួលស្គាល់ពល​រដ្ឋ​មាន​​សញ្ជាតិ​ពីរ​ទេ ដែល​មាន​ន័យ​ថា ​រដ្ឋាភិបាល​ផ្សេងទៀត​ក៏​មិនអាច​ផ្តល់ការការពារ​​ផ្នែក​​ការទូត ឬ​សេវាកម្ម​កុង​ស៊ុល​ដល់​ពលរដ្ឋ​របស់ពួកគេ​ដែល​មានសញ្ជាតិអ៊ីរ៉ង់ផង​ដែរ​។

យ៉ាងណា​ក៏ដោយ​ អ្នកនាំពាក្យសេតវិមាន អ្នក​នាង Anna Kelly លើក​ឡើង​ក្នុង​សេច​ក្តី​ថ្លែង​ការណ៍​តាម​អ៊ីមែល​ថា៖ « ប្រធានាធិបតី ត្រាំ បាន​បញ្ជាក់​យ៉ាង​ច្បាស់ថា លោក​ចង់​ឱ្យជនជាតិអាមេរិក​គ្រប់​រូប​ដែល​ត្រូវ​បាន​ឃុំ​ខ្លួន​ដោយខុស​ច្បាប់​ ត្រូវបញ្ជូន​ត្រឡប់​មក​ផ្ទះ​វិញ​ដោយ​សុវត្ថិភាព។

អ្នកនាង បាន​ព្រមាន​ទៀត​ថា ប្រទេស​អ៊រ៉ង់​​នឹង​មាន​ផល​វិបាក​ធ្ងន់​ធ្ងរ​សម្រាប់​របប​ណា​ដែល​ចាត់​ទុក​ជន​ជាតិ​អាមេរិក​ជា​កូន​អុកនយោបាយ​។​

ចំណែក​ក្រុម​បេសកកម្ម​របស់​អ៊ីរ៉ង់​ នៅ​អង្គការសហប្រជាជាតិ​ក៏​មិន​បាន​ឆ្លើយ​តប​លើ​បញ្ហា​នេះ​នៅ​ឡើយ​៕

ប្រែសម្រួល៖ ណឺ មិនា