ក្រុម​អ្នក​ចរចា​កំពុង​ញាប់ដៃញាប់ជើង បង្កើត​សំណើ​ឈប់បាញ់​​២ដំណាក់កាល មុន​ឱសានវាទ​លោកត្រាំ

អ្នកចរចាអាមេរិក និងអ៊ីរ៉ង់ រួមជាមួយក្រុមអ្នកសម្របសម្រួលក្នុងតំបន់ កំពុងពិភាក្សាលើសំណើកិច្ចព្រមព្រៀងពីរដំណាក់កាល ដើម្បីសម្រេច​ឲ្យ​បាននូវបទឈប់បាញ់រយៈពេល​៤៥​ថ្ងៃ និងការបញ្ចប់សង្គ្រាមជាអចិន្ត្រៃយ៍។ នេះ​បើយោង​​តាម​សារព័ត៌មាន TRT World ចុះផ្សាយ​ថ្ងៃ​ចន្ទ​ទី​៦​ខែមេសា​ឆ្នាំ​២០២៦។

ការចរចាដ៏សំខាន់នេះ ដែលមានការចូលរួមពីប៉ាគីស្ថាន អេហ្ស៊ីប និងតួកគី ព្រមទាំងការទាក់ទងផ្ទាល់រវាងបេសកជនអាមេរិក Steve Witkoff និងរដ្ឋមន្ត្រីការបរទេសអ៊ីរ៉ង់ Abbas Araghchi គឺជាឱកាសចុងក្រោយដើម្បីបង្ការការរីករាលដាលនៃជម្លោះ។ ក្រុមអ្នកសម្របសម្រួលបានសង្កត់ធ្ងន់ថា នេះគឺជាផ្លូវតែមួយគត់ដើម្បីបើកច្រកសមុទ្រ Hormuz ឡើងវិញ ហើយបានព្រមានមន្ត្រីអ៊ីរ៉ង់ថា គ្មានពេលសម្រាប់ពន្យារពេលទៀតទេ ក្នុងរយៈពេល៤៨ម៉ោងចុងក្រោយនេះ។

ប្រធានាធិបតី ដូណាល់ ត្រាំ បានពន្យារពេលឱសានវាទរបស់លោកចំនួន២០​ម៉ោងបន្ថែមទៀត ដោយកំណត់យកត្រឹមថ្ងៃអង្គារ វេលាម៉ោង៨​យប់ (ម៉ោងនៅអាមេរិក) មុននឹងចាប់ផ្តើម «ការវាយប្រហារទ្រង់ទ្រាយធំ» លើហេដ្ឋារចនាសម្ព័ន្ធស៊ីវិលរបស់អ៊ីរ៉ង់។ ថ្លែងប្រាប់សារព័ត៌មាន Axios លោកប្រធានាធិបតីបានបញ្ជាក់ថា សហរដ្ឋអាមេរិកកំពុងស្ថិតក្នុង «ការចរចាយ៉ាងស៊ីជម្រៅ» ប៉ុន្តែលោកនៅតែរក្សាជំហរតឹងរ៉ឹង​ដោយលើកឡើងថា «ប្រសិនបើពួកគេមិនព្រមចុះកិច្ចព្រមព្រៀងទេ ខ្ញុំនឹងកម្ទេចអ្វីៗគ្រប់យ៉ាងនៅទីនោះ»។ ការគំរាមកំហែងនេះបានបង្កើនសន្ទុះកាន់តែខ្លាំងក្នុងការស្វែងរកដំណោះស្រាយលើការបិទខ្ទប់ផ្លូវទឹក និងបញ្ហាសារធាតុអ៊ុយរ៉ាញ៉ូមរបស់អ៊ីរ៉ង់។

ទោះបីជាមានការប្រឹងប្រែងផ្នែកការទូតក៏ដោយ ស្ថានភាពនៅតែមានភាពមិនច្បាស់លាស់ ខណៈដែលកងទ័ពជើងទឹក IRGC របស់អ៊ីរ៉ង់នៅតែប្រកាន់ជំហរដាច់ខាតដោយប្រកាសថា ស្ថានភាពនៅច្រកសមុទ្រ Hormuz នឹង​មិនត្រឡប់ទៅរកសភាពដើមវិញឡើយ។ ចំណែកខាងមន្ត្រីអ៊ីរ៉ង់បានបញ្ជាក់ច្បាស់ថា ពួកគេមិនចង់​ឲ្យ​មាន «ស្ថានភាពដូចនៅហ្គាហ្សា ឬលីបង់» ដែលបទឈប់បាញ់មានតែនៅលើក្រដាសនោះទេ៕

ប្រែសម្រួល៖ ឈាង