សភាកម្ពុជាចុះ MoU ជាមួយសភាម៉ារ៉ុក ក្នុងការពង្រឹងកិច្ចសហប្រតិបត្តិការអន្តរសភា

សភាកម្ពុជា បានពង្រឹងកិច្ចសហប្រតិបត្តិការអន្តរសភាឱ្យកាន់តែស៊ីជម្រៅជាមួយសភាម៉ារ៉ុក តាមរយៈការចុះអនុស្សរណៈនៃការយោគយល់គ្នា ដែលMoUនេះត្រូវបានចុះហត្ថលេខាជាផ្លូវការនៅឯក្រៅមហាសន្និបាតលើកទី១៥២ នៃសហភាពអន្តរសភា (IPU) ក្នុងទីក្រុងអ៊ីស្តង់ប៊ុល ប្រទេសតួកគី កាលពីថ្ងៃទី១៦ ខែមេសា ឆ្នាំ២០២៦។

ពិធីចុះអនុស្សរណៈនៃការយោគយល់នេះ ត្រូវបានធ្វើឡើងរវាងលោក អ៊ុច បូររិទ្ធ អនុប្រធានទី១នៃព្រឹទ្ធសភាកម្ពុជា និងលោក ស៊ីឌី ម៉ូហាម៉េដ អ៊ូល អេរ៉ាស៊ីដ (Sidi Mohamed OULD ERRACHID) ប្រធានព្រឹទ្ធសភាម៉ារ៉ុក។

ក្រៅពីជួបពិភាក្សាការងារទ្វេភាគី និងចុះ MoU ជាមួយសភាម៉ារ៉ុក ប្រតិភូសភាកម្ពុជាតាមរយៈលោកបណ្ឌិត សម តារា អនុប្រធានគណៈកម្មការទី១នៃរដ្ឋសភា ក៏បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍ ស្តីពីការអភិវឌ្ឍប្រកបដោយចីរភាព។

ក្នុងវេទិកានេះ លោក សម តារា បានឡើងថ្លែងបទអន្តរាគមន៍ និងពិភាក្សាលើសេចក្តីសម្រេចស្តីពី «ការកសាងសេដ្ឋកិច្ចពិភពលោកប្រកបដោយយុត្តិធម៌ និងចីរភាព» ដោយផ្តោតលើតួនាទីសភាក្នុងការប្រយុទ្ធប្រឆាំងនឹងការគាំពារនិយម ការកាត់បន្ថយពន្ធគយ និងការការពារការគេចពន្ធសាជីវកម្ម ដែលដឹកនាំដោយសភាអារ៉ាប់រួម។ បន្ថែមពីនេះ នៅរសៀលថ្ងៃដដែល លោក សម តារា ក៏បានអញ្ជើញចូលរួមក្នុងវេទិកាសមាជិកសភាវ័យក្មេងនៃ IPU ដឹកនាំដោយសភាហ្សកដង់ផងដែរ។

វេទិកានេះ បានពិភាក្សាលើការធ្វើបច្ចុប្បន្នភាព និងលើកកម្ពស់ការចូលរួមរបស់យុវជននៅក្នុងសភា ព្រមទាំងប្រមូលធាតុចូល និងទស្សនៈរបស់យុវជន ដើម្បីបញ្ចូលទៅក្នុងប្រធានបទស្នូលនៃមហាសន្និបាតលើកទី១៥២ ឱ្យកាន់តែមានសុពលភាព និងបរិយាបន្ន៕