តម្លៃទឹកឃ្ញុំមានការធ្លាក់ជាងឆ្នាំមុន ខណៈ​ទិន្នផលទឹកឃ្មុំចិញ្ចឹមឆ្នាំនេះមានការធ្លាក់បន្តិច ​

កសិករចិញ្ចឹមឃ្មុំនៅខេត្តត្បូងឃ្មុំបានថ្លែងប្រាប់កម្ពុជាថ្មីថា ទិន្នផលទឹកឃ្មុំចិញ្ចឹមរបស់កសិករ​មានការធ្លាក់ចុះបន្តិច ខណៈ​តម្លៃទឹកឃ្មុំក៏ធ្លាក់ចុះជាងឆ្នាំមុនៗបន្តិចផងដែរ។

លោក ហ៊ន់ សៀងហៃ ជាម្ចាស់កសិដ្ឋានចិញ្ចឹមឃ្មុំខ្មែរ ស្ថិតនៅតាមចម្ការកៅស៊ូ ខេត្តត្បូងឃ្មុំ បានឱ្យដឹងថា ឆ្នាំនេះ ទិន្នផលទឹកឃ្មុំហាក់ប្រមូលផលបានតិចជាងឆ្នាំមុនៗ ចំណែកតម្លៃវិញក៏រៀងធ្លាក់ថ្លៃជាងមុនផងដែរ។

លោកសៀងហៃគូសបញ្ជាក់ទៀតថា មូលហេតុដែលទឹកឃ្មុំឆ្នាំនេះប្រមូលផលបានតិចដោយសារតែបញ្ហាអាកាសធាតុក្ដៅខ្លាំង និងដោយសារតែការចិញ្ចឹមរបស់លោកត្រូវជួបប្រទះនឹងបញ្ហាថ្នាំបាញ់សម្លាប់សត្វល្អិតពីម្ចាស់ចម្ការកៅស៊ូ និងចម្ការមៀនធ្វើឱ្យមេឃ្មុំងាប់ច្រើន ទើបនាំឱ្យទិន្នផលទឹកឃ្មុំមានការធ្លាក់ចុះបែបនេះ។

យ៉ាងណាមិញ ចំពោះតម្លៃវិញ លោកបានឱ្យដឹងដែរថា ទឹកឃ្មុំ១លីត្រ បច្ចុប្បន្នអាចលក់ចេញទៅកាន់ទីផ្សារបានចន្លោះពី ៥ម៉ឺនរៀល ទៅ ៦ម៉ឺនរៀល តែប៉ុណ្ណោះ​ បើធៀបនឹងឆ្នាំមុនៗ ទឹកឃ្មុំអាចលក់បានចន្លោះពី ៧ម៉ឺនរៀល ទៅដល់ ៨ម៉ឺនរៀល ក្នុង១លីត្រ ដែលកាលនោះពុំសូវមានអ្នកចិញ្ចឹមឃ្មុំច្រើនដូចសព្វថ្ងៃនោះឡើយ។

កសិដ្ឋានចិញ្ចឹមឃ្មុំខ្មែររបស់លោក ហ៊ន់ សៀងហៃ បច្ចុប្ប​ន្នមានធុងចិញ្ចឹមឃ្មុំ ប្រមាណជាង៣០០ធុង សម្រាប់ធ្វើជាជម្រកសត្វឃ្មុំ និងផលិតទឹកឃ្មុំសម្រាប់ផ្គត់ផ្គង់ទីផ្សារបានចន្លោះពី ៥០០០លីត្រ ទៅ៦០០០លីត្រ ក្នុងមួយខែ៕

អត្ថបទ ៖ សួស សិត