លោក Rubio ធ្វើដំណើរទៅជួបសម្ដេចប៉ាប ដើម្បីសម្រួលភាពតានតឹងជាមួយលោក ត្រាំ

ក្នុងសប្តាហ៍នេះ រដ្ឋមន្ត្រីការបរទេសអាមេរិក លោក Marco Rubio នឹងត្រូវធ្វើដំណើរទៅកាន់ទីក្រុងរ៉ូម ដើម្បីបំពេញភារកិច្ចដ៏សំខាន់មួយ គឺការចូលជួបសម្ដែងការគួរសមជាមួយសម្ដេចប៉ាប Leo។ ជំនួបនេះ ត្រូវបានគេមើលឃើញថា ជាការព្យាយាមបន្ធូរបន្ថយភាពរកាំរកូស បន្ទាប់ពីលោកប្រធានាធិបតី ដូណាល់ ត្រាំ បានផ្ទុះសម្តីវាយប្រហារយ៉ាងខ្លាំងៗទៅលើសម្ដេចប៉ាប កាលពីប៉ុន្មានសប្តាហ៍មុន។

តាម​ការ​ផ្សាយ​របស់ The Guardian នា​ថ្ងៃទី​៤ ខែ​ឧសភា ឆ្នាំ​២០២៦ ភាពតានតឹងនេះ បានចាប់ផ្តើមឡើង នៅពេលដែលសម្ដេចប៉ាប Leo ដែលជាមេដឹកនាំសាសនាកាតូលិកដំបូងគេបង្អស់មកពី​អាមេរិក បានចេញមុខរិះគន់គោលនយោបាយសង្គ្រាមរបស់លោក ត្រាំ ជាពិសេស ការវាយប្រហាររបស់អាមេរិកទៅលើប្រទេសអ៊ីរ៉ង់។ សម្ដេចប៉ាប បានអំពាវនាវឲ្យ​ពិភពលោកស្វែងរកសន្តិភាព និងបានហៅការគំរាមកំហែងរបស់លោក ត្រាំ ថាជាទង្វើ ដែលមិនអាចទទួលយកបាន។ ជាការឆ្លើយតប លោក ត្រាំ បានប្រើប្រាស់បណ្ដាញសង្គមរិះគន់សម្ដេចប៉ាបវិញចំៗថា ជាមនុស្សទន់ជ្រាយ និងមិនយល់ពីនយោបាយការបរទេស ដែលបង្កឲ្យ​មានការភ្ញាក់ផ្អើលយ៉ាងខ្លាំងដល់អ្នក​កាន់​សាសនា​កាតូលិកចំនួន ​១,៤​ពាន់​លាន​នាក់​ ជុំវិញពិភពលោក។

ក្រៅពីការជួបសម្ដេចប៉ាប លោក Rubio ក៏មានគម្រោងជួបពិភាក្សាជាមួយមន្ត្រីជាន់ខ្ពស់របស់អ៊ីតាលីផងដែរ។ ទោះជាយ៉ាងណាក៏ដោយ ស្ថានភាពនេះ ហាក់មានភាពស្មុគស្មាញបន្តិច ដោយសារលោក ត្រាំ ក៏បានបង្ហាញការមិនពេញចិត្ត ចំពោះលោកស្រីនាយករដ្ឋមន្ត្រីអ៊ីតាលី Giorgia Meloni ផងដែរ បន្ទាប់ពីលោកស្រី បានចេញមុខការពារសម្ដេចប៉ាប។ លោក ត្រាំ ថែមទាំងបានគំរាមដកទ័ពអាមេរិកចេញពីប្រទេសអ៊ីតាលី និងប្រទេសមួយចំនួនទៀតក្នុងអឺរ៉ុប ដោយសារលោកយល់ថា ប្រទេសទាំងនោះ មិនបានជួយជ្រោមជ្រែងអាមេរិក ក្នុងរឿងសង្គ្រាមនៅមជ្ឈិមបូព៌ា។

បេសកកម្មរបស់លោក Marco Rubio នាពេលនេះ គឺជាការសាកល្បងសមត្ថភាពការទូតដ៏ធំមួយ ដើម្បីផ្សះផ្សាទំនាក់ទំនងរវាងសេតវិមាន និងវិមានវ៉ាទីកង់ ខណៈដែលសម្ដេចប៉ាប Leo កំពុងត្រៀមប្រារព្ធខួបមួយឆ្នាំនៃការឡើងកាន់តំណែងរបស់ទ្រង់ នា​ថ្ងៃទី​៨ ខែ​ឧសភា ខាង​មុខ៕

ប្រែសម្រួល៖ ឈាង