អ៊ីរ៉ង់ ថា ជនស្លូតត្រង់ ៥នាក់ ស្លាប់ ក្នុង​ការ​វាយ​ប្រហាររបស់​​អាមេរិ​​ក នៅច្រកសមុទ្រ​ហ័រមូស

ស្ថានការណ៍នៅច្រកសមុទ្រហ័រមូស បានប្រែជាក្ដៅគគុកសាជាថ្មី បន្ទាប់ពីមានរបាយការណ៍ថា មនុស្សស្លូតត្រង់ចំនួន ៥នាក់ បានបាត់បង់ជីវិត នៅក្នុងការវាយប្រហាររបស់កងកម្លាំងអាមេរិក ទៅលើទូកដឹកទំនិញតូចៗ។

យោងតាមភ្នាក់ងារព័ត៌មានអ៊ីរ៉ង់ Tasnim ចុះផ្សាយ​ថ្ងៃ​ទី​៥ ខែ​ឧសភា នេះ ការស៊ើបអង្កេត បានបង្ហាញថា ទូកដែលរងគ្រោះ គឺជាទូកដឹកទំនិញរបស់ប្រជាពលរដ្ឋធម្មតា ដែលកំពុងធ្វើដំណើរពីឆ្នេរសមុទ្រនៃប្រទេសអូម៉ង់ សំដៅទៅកាន់ប្រទេសអ៊ីរ៉ង់ មិនមែនជាទូកចម្បាំង ដូចការចោទប្រកាន់នោះទេ។

ខាងភាគីអ៊ីរ៉ង់ បានច្រានចោលទាំងស្រុងនូវការអះអាងរបស់យោធាអាមេរិក ដែលថា ពួកគេបានកម្ទេចទូកល្បឿនលឿនរបស់កងឆ្មាំបដិវត្តន៍អ៊ីរ៉ង់ (IRGC)។ ប្រភពពីយោធាអ៊ីរ៉ង់ បានលើកឡើងថា គ្មានទូកចម្បាំងណាមួយរបស់ខ្លួន រងការវាយប្រហារឡើយ ហើយការបាញ់ប្រហារលើទូកស៊ីវិលនេះ គឺជាទង្វើដែលកើតចេញពី «ភាពភ័យខ្លាច» របស់អាមេរិក ចំពោះប្រតិបត្តិការយោធារបស់អ៊ីរ៉ង់នៅក្នុងតំបន់។ អ៊ីរ៉ង់ បានចាត់ទុកសកម្មភាពនេះថាជា ការសម្រេចចិត្តដ៏ប្រញាប់ប្រញាល់ និងខ្វះការពិចារណា ដែលបង្កឲ្យ​មានគ្រោះថ្នាក់ដល់ជីវិតមនុស្សស្លូតត្រង់។

ដោយឡែក បញ្ជាការដ្ឋានកណ្ដាលរបស់សហរដ្ឋអាមេរិក (CENTCOM) បានចេញមុខមកបកស្រាយខុសពីនេះ ដោយបញ្ជាក់ថា ឧទ្ធម្ភាគចក្ររបស់ខ្លួន ពិតជាបានកម្ទេចទូកតូចៗទាំងនោះមែន ដោយសារតែទូកទាំងនោះ បានបង្កការគំរាមកំហែងដល់នាវាពាណិជ្ជកម្ម។ អាមេរិក ថែមទាំងបានចោទប្រកាន់អ៊ីរ៉ង់ទៀតថា បានបើកការបាញ់ប្រហារលើនាវាចម្បាំង និងនាវាដឹកទំនិញរបស់ខ្លួន កាលពីថ្ងៃចន្ទ កន្លងទៅ ដែលជាហេតុធ្វើឲ្យ​អាមេរិក ត្រូវចាត់វិធានការដើម្បីការពារសុវត្ថិភាពផ្លូវទឹកដ៏សំខាន់មួយនេះ។

ជម្លោះនៅក្នុងតំបន់នេះ បានចាប់ផ្ដើមឆេះឡើងជាលំដាប់ ចាប់តាំងពីមានការវាយប្រហារគ្នាទៅវិញទៅមករវាងអាមេរិក-អ៊ីស្រាអែល និងអ៊ីរ៉ង់ កាលពីចុងខែកុម្ភៈ។ ថ្វីដ្បិត​ធ្លាប់មានការព្រមព្រៀងឈប់បាញ់គ្នា ក្រោមការសម្រុះសម្រួលពីប៉ាគីស្ថាន ក៏ដោយ ក៏​កិច្ចចរចាកន្លងមក មិនទាន់ឈានដល់កិច្ចព្រមព្រៀងយូរអង្វែងណាមួយឡើយ។ បច្ចុប្បន្ន អាមេរិកនៅតែបន្តការបិទខ្ទប់ផ្លូវទឹក ប្រឆាំងនឹងការដឹកជញ្ជូនរបស់អ៊ីរ៉ង់ ដែលធ្វើឲ្យ​ស្ថានភាពសន្តិសុខ នៅក្នុងច្រកសមុទ្រហ័រមូស​ កាន់តែមានភាពប្រកាសអាសន្ន៕

ប្រែសម្រួល៖ ឈាង